SomaliTalk HTML CD


Home | Webs | Email | TellFriend | Search | Feedback |
w w w . s o m a l i t a l k . c o m
SOMALITALK  - MAQAAL

Dulmiga Raacatada Hubeysan

Ahmed Yusuf Gaani
Gaani99@hotmail.com 

Mahad Qaadir baaleh naga dhigay qoomkii ugu dambeeyey qoomamkiisa. Taasi ka dhigan inaan ka quusano soo dirida rasuul ama nabi saxa qaladaadkeena.

Waa qarni qabqabluhu qadarin muto halka qunyar socodku quursi ku jiro
Waa qarni maalin quutuhu uu nolosha qax ka yahay
Waa qarni cibaadadu ku yaraatay culumaa’udiinkii
Waa qarni cirooluhu ka caageen in codkooda la maqlo
Waa qarni calooshiis u shqeystuhu uu aad u ciil baxay
Waa qarni caan bixidu ay colaad kuu keeni karto
Waa qarni gar gooyuhu ka eed batay gefaha
Waana qarni aad qoraalkaada qoomameyneysid hadii aadan qumaati u qorin

Soomaalida oo intooda badan ku abtirsata xoola raacato ayaa lagu yiqiin iney ku noolaayeen nolol ku dhisan is maquunin, oo ah in qabiilba qabiilka uu ka xoog bato ka qaado ceelka, carshinta, iyo xoolaha. Isu xulafeysigaasi waxuu xoogeysan jiray marba marka ay duruufuhu kasii qalafsanaadaan waxaana laga dhaxli jirey iney noqoto gardaradu mid gar og, ayna sababto in kii laga adkaaday sheegato ku dhex noqdo kuwii kale.

Hadaba si loogu noolaado jawigaas, tarbiyada uu waalidku siiyo ubadkiisa ayaa aheyd geel raacid, lagdan, gaawe qaadid, barida qabweynida qabiilkiisa iyo quursiga kuwa kale, taasoo u dhiganta kan ay qaataan ciidamadu sida dhibow, qaalma rogad, rarid, iyo dab ridid, sababta ay isku cashar u qaateena waa ka mideysnaanta hal hadaf oo ah u googol xaarasho goob colaadeed.

Inkastoo raacatadii waqti yar magaalooyinka joogay ay qeyb lixaad leh ka qaateen halgankii xornimo u dirirka waxaaney bedelin casharadii ay miyiga kasoo qaateen oo aan ku wajahneyn nolosha magaalo, taasoo ku saleysan wada noolaasho, dan guud iyo sinaan, waxeyna dabeecadii miyiga ka dhex abuurantay in yar kadib calansaarkii xafiis, baarlamaan, iskuul, ciidan iyo wasaarad, waana tan ay maanta dhaxalkeedu noqotay dowlad la’aan iyo dad la’aan.

Jabhadihii qabiilka lagu aasaasay iyo kuwii dhigooda loo unkay ayaa weli ka duulaya fikradii miyiga, oo ah in qabiilkani noqdo midka wax walba hela.

Raacatada hubeysan oo ay taageerayaan siyaasiyiinta raacatada ayaa isku haya dhul beereedkii koofurta Soomaaliya, iyagoo ujeedadoodu tahay kala riixashadii baadka iyo biyaha, waxaaneyse weli garwaaqsan ineysan beeridu u howl fududeyn sida raacida xoolaha una baahan tahay qodid, suuqgeyn iyo khuburo. Waxaaney dhaxalsiiyeen beeraleydii dhulka laheyd iney u qaxaan magaalooyinka kana raadsadaan nolol maalmeedkooda.

Dulmigu waa dembiga awgii rasuulo iyo nabiyo loosoo diray, kutubo loosoo dejiyey, dowladuhuna darted u dhismeen. Dowladnimadu waxey ilaalisaa nafta, maalka iyo sharafta qofka, si karaamadii bini aadmigu u lumen.

Dulmiga raacatada hubeysani geysanayaan wuxuu sababi doonaa in beeraleydu kaalmo ciidan ka raadsadaan Itoobiya si ay isaga kiciyaan dulmiga raacatada hubeysan.

Si kale hadaanu u fiirino, dabeecada raacadatadu waa iney gar qaataan, waxeyna ku maahmaahaan “garawsiiyo waa geel” taasoo macnaheedu yahay “qof raali ahow ku yidhi geel kusii”. Cadliga oo la helo waxaan tusaale usoo qaadan karnaa waqtigii ay maxkamaduhu ka jireen Muqdisho, Luuq iyo Buulo Xaawo oo ay shacabku kusii badanayeen goobahaasi iyagoo qabiilo kala duwan ah, waxeyna ka dugsanayeen cadli aan lagu dulmin.

Akhristow hadii qabiil walba degaanka uu degen yahay ama sheeganayo uu dulmiga ka tirtiro amaba ka yareeyo ma dowlad baa inaga maqan?!!!. Iyadoo ay lama huraan tahay in qabiil walba uu isku noqdo oo uu cadli doorto, ogowna hufnaanta reerku iney taariikh geli doonto.

Ahmed Yusuf Gaani
gaani99@hotmail.com 
 

AFEEF: Aragtida qoraalkan waa mid u gaara qoraaga ku saxiixan

FAAFIN: SOMALITALK.COM | AGOOSTO 12, 2002

MAQAALKA XIGA - GUJI   

 

Bogga Maqaalada: www.somalitalk.com/maqaal
Powered by www.SomaliTalk.com
All About Somalia and More...
>> Usheeg Asxaabtaada
Allah Is Great
CTML CD
MACLUUMAADKA INTERNETKA
Bogga Maqaalada: www.somalitalk.com/maqaal
. GUURKA.&.GURIGA MUSLIMKA 
. DHIBAATOOYONKA QURABAHA |
. IS-XISAABI INTAAN LAGU XISAABIN
. GEERAAR ALLAH AMMAAN AH
. AHMIYADDA SALAADDA...
. QORAALADII WARDHEERE
. QORAALADII IBRAAHIM SAALAX..

NOLOSHII SAXAABIGA ABUU DAR AL QHIFAARI
Casharkii 23aad ee Saxaabadii Rasuulka (scw)
DHISITAANKII MASJIDKA RASUULKA SCW
Casharkii 33aad ee Siiradii Rasuulka (scw) 


Copyright © somalitalk.com. All rights reserved.

HTML CD