SomaliTalk DALSAN
Home | Webs | Email | TellFriend | Search | Feedback |
w w w . s o m a l i t a l k . c o m
SOMALITALK - WARQAD FURAN
Cabasho Furan : Maxay BBC-du u dhalan rogtaa wararka Ogaadeenya ?
wq. Abdullahi Maxamed Abdullahi_mahamed@yahoo.com
KAAH

Feb 28, 2003

Waxaan jeclaystay inaan halkan ku soo gudbiyo cabasho ku saabsan sababta ay BBC-da laanteeda Af-Somaligu u soo tabin la’dahay wararka dalka Ogaadeenya. Cabashadan oo ah dareen ay wada qabaan dadka Somaliyeed ee ka soo jeeda dalka Ogaadeenya, waxaan ku soo gudbinaynnaa warqad furan, waxaana BBC-da laanteeda Af-Soomaliga uga dacwoonaynaa madaxdeeda, shaqaalaheeda iyo dadka Somaliyeed iyo waliba ruux walba oo damiir bini’aadamnimo ku jirto.

Ujeeddadii loo aasaasay idaacadda BBC-da laanteeda Af-soomaliga waxay ahayd in wararka adduunka iyo kuwa Soomalidaba ay gaadhsiiso dadka af Soomaliga ku hadla. Haddaba, wuxuu caqliga fayow ina dareensiinayaa in BBC-da ay ahayd inay muhiimad isku mid ah siiso gobolada iyo aagagga ay degaan dadka Soomalida ah. Nasiib darro, BBC-da Laanteeda Af Soomaliga wax war ah oo la taaban karo kama soo wariso dalka Ogaadeenya.

Sida la wada og yahay dhacdooyin aad u badan ayaa ka dhaca dhulkaas oo saameeya xag dhaqaale, siyaasad, nabadgalyo iyo arrimaha bulshada. Arrimahaas oo warar ahaan aan ka liidanin kuwa ay BBC-du ka soo tabiso aagagga kale ee Soomalidu degan tahay sida Waqooyi, Bari, Gobolada Dhexe, Gobolada Koonfureed iyo waliba NFD.

Waxaa yaab leh in BBC-du wararka yar ee ay soo tabiso ay ka soo xigato wariyaha u jooga Adis Ababa, taas oo labo sababood dartoodba aan xaqiiqada ka turjumi karin :

Waa marka hore, Adis Ababa oo aad uga fog dalka Ogaadeenya wax xidhiidh ah oo toos ahna aan la lahayn degmooyinka Ogaadeenya. Waa ta labaade, wariyaha halkaas jooga oo nabadgalyadiisa darteed aan soo tabin karin xaqiiqda wararka.

Haddaba, iyadoo dad ku dhow lix milyan oo reer Ogaadenya ah ay BBC-da Af Soomaliga ka dhagaystaan gudaha Ogaadeenya iyo dibaddisaba, waxaan aaminsanahay in BBC-du ay ku khaldan tahay inay xaqirto wararka ay tirada intaa le’eg xiisaynayaan inay maqlaan.

"BBC-du Maskaxda Soomaalida ayay Quudisaa."  Yusuf Garaad July 2002

Waxaa Jira ururo badan oo sheegtay inay taabacsan yihiin dawladda Itoobiya iyo kuwo mucaarad ku ah oo Itoobiya la dagaalama. Waxaa haddaba jirta in BBC-du aynan siinin shakhsiyaadka ka soo jeeda dalka Ogaadeenya saamiga ay xaqa u leeyihiin xagga waraysiyada iyo sheegista bayaanada ay soo saaraan. Haddaba, miyeynan ku habboonayn in la fahmo sida BBC-du ku xulato wararka ay sii dayso. Sidoo kale, lixda milyan ee Soomalida ah ee BBC-da Af Soomaliga ka dhagaysata dalka Ogaadeenya, waxay xaq u leeyihiin inay BBC-du u sharaxdo sababta wararka Ogaadeenya ay ugu yar yihiin BBC-da Af-Soomaliga.

Waxaaba intaas ka sii daran iyadoo mararka dhifka ah ee ay BBC-du sii dayso wararka Ogaadeenya, ay dhalan rogto ayna ku xidhan tahay hadba sida uu rabo wariyaha markaa soo tabinaya. Dinaca kale, wararka ku saabsan xukuumadda Itoobiya, BBC-du way buunbuunisaa, waxayna badanaabana u sheegaan sida ay xukuumadda Itoobiya jeceshahay, waa YAAB!

Waxaan kala garan la’ahay inay arrintu tahay siyaasad ka socota BBC-da nafteeda iyo inay tahay mid ka socota shakhsiyaadka ka shaqeeya. Dad badan waxay aaminsan yihiin inay tahay arrin ay ka dambeeyaan qaar ka mid ah wariyayaasha BBC-da, waxaana taa ay dadkaasi caddayn uga dhigayaan iyadoo wariyayaasha BBC-du uu ninba siduu doona wararka u soo tabiyo, xitaa magacyada dalka uu ninba waxa uu doono ugu yeedho.

Waxaan dhagaystaayasha qaayaha leh ka codsanaynnaa bal inay hadda ka dib u fiirsadaan habka ay wariyayaasha BBC-du u soo tabiyaan wararka Ogaadeenya iyo kuwa dawladda Itoobiya, ka dibna ay iyagu caqligooda isticmaalaan. Arrimahan waxaa tusaale fiican u ah waraysigii uu wariye ka mid ah BBC-du la yeeshay Melez Maarso 2002 iyo habkii uu isla wariyahas u soo tabiyey bannaanbax ay Jaalliyadda Ogaadeenya ee Ingriisku kaga hortageen booqasho uu Ra’iisal wasaaraha Itoobiya, Melez ku tagay Ingiriiska Febraayo 2003.

Cabashadan waxaan u soo bandhigaynnaa dadka Soomaaliyeed oo sababtii doontaba ha keentee, nasiibka u helay inay wararka degaankooda sax loo soo tabiyo iyo kuwa kale ee iyaguna sidaananada oo kale la gacan bidixeeyey. Sidoo kale, cabashadan waxaan si toos ah ugu bandhigaynnaa maamulka iyo shaqaalaha laanta Af-Soomaliga ee BBC-da. Aniga iyo inta ila ra’yiga ahba, gartaanadii waan sheeganay, jawaabna waxay la jirtaa Laanta Af-Soomliga ee BBC-da.

Waad Mahadsan tihiin

Fadlan wixii faallo, su’aal ama taageero ah ku soo hagaaji qoraaga.

Abdullahi Maxamed Abdullahi_mahamed@yahoo.com  

Afeef: Aragtida qoraalkan waa mid u gaar ah qoraaga ku saxiixan

I  I  D  H  E  H

LIFAAQ:

HEERARKII BBC-da AF-SOOMAALIGA

  • 18kii Luuliyo, 1957kii ayaa BBC-da Afka Soomaaligu shaqadeeda bilowday, waxay waagaas hadlijirtey labajeer toddobaadkiiba oo midkiiba yahay 15daqiiqo oo qura. Xilligaan Soomaalidu waxa ay ku hoos noolayd Gumaysi. [1948 ayaa qaramada midoobey guddi u direen Soomaaliya, si ay usoo ogaadaan cidda ay Soomaalidu rabaan. 21 kii bishii Nofeembar ee sannadkii 1949 ayaa qaramada midoobey xukuntay xornima gaarsiinta Soomaaliya iyo in 10 sano Talyaanigu ka ahaado wakiil. April 1, 1950 ayaa talyaaniga lagu wareejiyey koonfurta Soomaaliya si uu xorriyad u gaarsiiyo. July 1, 1960 ayey ahayd xilligii ay Koonfurta Soomaaliya xorowdey.]
  • Sebtembar 1958kii ayaa lagadhigay in ay hadasho 15daqiiqo maalinkasta, waqtigan sida kor ku cad waxaa soo dhowaadey xoriyadii Soomaaliya. [Maarso 1959: waxaa dhacday doorashadii ugu horeysey ee Soomaaliya. 83 kursi oo kamida 90 kii kursi oo loo tartamayey waxaa ku guulaystey xisbigii SYL.]
  • 1dii Luulyo, 1961-kii, waa markii halsano kasoo wareegtey xoriyadii Soomaaliya ayaa lagadhigay in ay hadasho 30-daqiiqo. [1 July 1960 waxay ahay xorriyadii Koonfurta Soomaaliya, iyo israacii Woqooyi iyo Koonfur]
  • 25kii Maarso 2000-kii, waa burburkii Soomaaliya kaddib'e, waxaa waqtigii lagadhiagy 45-daqiiqo oo Sabti-Arbaca ah iyo 1-saac oo Khamiis iyo Jimce ah. [August 26, 2000 waxaa soo gabagaboobey shirkii Carta, Jabuuti]
  • Sannadka 2002 waxaa lookordhiyey waqtiga iyadoo lagusoo daray saacado dheeraad ah eeg: BBC.11:00 | BBC.14:00 | BBC.16:00 | BBC.18:00.[Waxaa soo fool lahaa shirka Nairobi ee dib u heshiisiinta Soomaalida]

<><><> DADWEYNAHA<><><>

DADWEYNAHA & BBC-DA LAANTA AFKA SOOMAALIGA AKHRI.HALKAN...  

 

Powered by www.SomaliTalk.com
All About Somalia and More...
>> Usheeg Asxaabtaada
Allah Is Great


Copyright © somalitalk.com. All rights reserved.

HTML CD [an error occurred while processing this directive]