Sawirkana waa xarunta Mbagathi ee KCCT.

Xarunta shirka Dib u heshiisiinta soomaaliyeed ee Mbagathi waxaa wada hadalada soomaalidu ay ka furmeen horaantii sanadka 2003da kadib markii laga soo wareejiyay shirka soomaalida Magaalada Eldoret  oo dib u heshiisiintu ay ka furantay, waxaana xiligaas furay wada hadalada soomaalida madaxwaynihii hore ee dalkaasi Danial Arab Moi.

Mbagathi Sababta loogu soo wareejiyay shirka waxaa ugu horaysay sidii hoos loogu dhigi lahaa dhaqaalaha ku baxayay hoteelada waawayn ee eldoret oo xiligaas soo bandhigay daymaha ay ku leeyihiin IGAD iyo dawlada kenya in si dag dag ah loo siiyo hadii kale aysan ogolaanayn in ergooyinku ay sii daganaadaan hoteeladaas.

Waxaana dhaqaalaha ku baxa shirka inta badan ugu deeqa midawga reer yurub iyo dawladaha ama ururada kale ee shirka goobjooga ku ah sida maraykanka, jaamacada carabta iyo kuwo kale, waxaana marwalba ay muujiyaan muhimada ay leedahay dawlad loo dhiso soomaaliya.

Kadib markii ergooyinka loo soo raray Xarunta Mabagathi oo loo yaqaano KCCT ahna machad lagu barto culuumta Tiknoolajiyada ee ugu baaxada wayn dalalka Uganda, Tanzania yo kenya waxaa dhaqaalihii loo soo wareejiyay Xaruntaas iyo dhowr hoteel oo kale oo la dajiyay ergooyinka soomaalida.

Dhowr shir oo lagu qabtay Nairobi ayaa dawladaha shirka dhaqaalihiisa bixiya ay su’aalo ku waydiiyeen Danjire Kiblagat iyo IGAD si ay uga shaki baxaan tuhuno badan oo ku saabsan in dhaqaalaha shirka siyaabo guracan loo dhunsado isla markaana ay soo kordheen cabashooyinka ergooyinka ee dhibaatooyinka kala kulma cunada iyo seexadka sida ay ii xaqiijiyeen Xubno ka tirsan Jaamacadda carabta iyo Maraykanka.

Dhaqaalaha ku baxay shirka oo isugu jira kuwo aan si toos ah IGAD loo siiyo iyo kuwo qaabab kale lagu helo waxaa ay kor udhaafayaan sida masuuliyiin shirka ku sugan ay sheegayaan in kabadan 15 million oo doolar , waxaase iyada xaqiiqdu ay tahay in hogaamiyayaasha shirka iyo ergooyinka laga ilaaliyo in la siiyo lacag cad iyaguna ay ku qanacsanyihiin.

Dhaqaalaha ku baxa shirka Mbagathi waxaa ay wax wayn ka tari lahayd dib u dhiska dalka soomaaliya ee bur buray hadii shirku uu dhamaan lahaa oo laga gudbi lahaa khilaafka u dhexeeya hogaamiyayaasha oo runtu ay tahay khilaaf ku salaysan qabiil iyo xukun doon, waxaana xataa cid walba ay dareemi kartaa in intii uu shirku socday 100laal rayid ah ay ku dhinteen dagaalada qabiileed iyo kuwa siyaasadeed ee soomaaliya ka socda.

Mudadaii aan shirka ku sugnaa ee 15ka bilood waxyaabaha iga yaabiyay waxaa kamid ah in hogaamiyayaal badan ay ka cabanayaan dhaqaalo xumo haysa iyo edaymo ku wajahan IGAD oo ay leeyihiin Lacagihii soomaaliya iyaga ayaa dhacay.

Ridwaan Xaaji Cabdiwali

London, UK.

ridwanhaji@yahoo.com