MUSTAQBAL MA LEH HORJOOGAYAASHA HUBAYSANI

Wariye: Abdifitahaam Ahmed
Mogadishu - Somalia
 abdifitahaam@hotmail.com

Midda an ka hadlaynaa, waa mustaqbalka waddaniga ah meesha dheer wax ka eegaysa, ee ma aha mid nin lacag keliya hadafkiisa tahay, mid madaxnimo keliya doonaya ma aha, mid inuu daaro waa wayn dhisto doonaya, mid qabiilkiisu inuu kuwa kale xukumo hadafkiisa u hiigsanayaa tahay, I.W.M.

Kuwaasi ma aha Mustaqbal yo rabitaan dadka ka dhexeeya ee waa mid qofeed ama kooxeed, Haddaba ma soo martay Soomaalida hoggaamiyayaal hadafkooda ama u jeedadoodu tahay danta dadka Soomaaliyeed iyo dalkooda keliya, kuwaasoo danahooda gaarka ah hilmaamay oo danta ummadda uga tagey. Hadday xoolo lahaayeen ku baxshay, Naftooda u huray oo u hibeeyay, loo xiray, u gaajooday, u dhintay?

Dad caynkaas sameeyay way ku jiraan taariikhdeena, waa kuwii xornimada aan sheeganayno Calanka buluugga ah, iyo Midnimo dhaliyay waa raggii S.Y.L iyo S.N.L - USP, kala hoggaaminaayey ILLaahay ha ka abaal mariyo intii dhimatayna jannadii farduusa ha ka waraabsho.

Innaga abaal iyo aqoonsi midna inaga helimaayaan, maxaa yeelay Magacyadoodaba ma naqaan, Ubadkana lama baro, maxaa yeelay dareen waddaniya ma lahan bulshadeena Soomaaliyeed, kaas beddelkiisa waxa inna buuxa mid qabiil.

Haddaba Horjoogayaasha hubaysan ee haybta qabiil huwan, kuwa jooga iyo kuwii ka horreeyay ee jabhadaha ahaa, ma lahayn ujeeddo wanaagsan oo qarameed mid waliba Barnaamij qarsoon ayaa jeebka ugu jiray.

Waxa la joogaa wakhtigii runta la sheegi lahaa, dalkeena waxa ka dhacay qof walba sida ay la tahay waa lagu kala duwanaan karaa, taasina dhib maleh. Anigu waxaan qabaa dhibaatada inagu dhacday, ee burburka qarameed ee dhan walba, dhimasho, qax, kala tag, dowlad la’aan, nabad la’aan, nolal la’aan iyo wax kasta oo xun oo inagu dhacay, waxa mas’uuliyaddeeda qaadaya oo aanay dhanna u dhaafayn taariikhduna qoraysaa, afar qolo:- (1) Dowladdii jirtay (2) S.S.D.F (3) S.N.M (4) U.S.C.

Inay sidaas tahayna waxa markhaati ka ah. Sedexda Jabhadood waxay awoodi waayeen markay Itoobiya joogeen intaanay waddanka soo gelin, inay midoobaan oo ay iswaydiiyaan innaga oo qaybsan haddaan waddanka gallo dhibaatada ay keeni karto, maalin keliya la iskuma soo qaadin.

Sedexda jabhadood mid keligeed ku baaqday in la midoobo intaan dowladda la ridin een dalka la gelin ma jirto.

Koox yar oo feker waddaniya ka duulaysa, oon ciidamo meel u jooga lahayn, ujeedadooduna ciidamo gaara samaysta aanay ahayn, ayaa u jeediyay, beelahii hubaysnaa inay midoobaan mar hadday waddan keliya loo wada socdo, nagama ay hoos qaadin taladii aannu ugu deeqnay, iyagoo na quudhsanaya oo nagu caayaya inaanu samaysan waynay ciidamo iyo hub.

Soomaalidu waxay hore u tiri " Qur’aan alifka ka qalloocday al-baqra kama tooso ", wax kasta oo bilawga ka xumaada marka u waynaado ee gaamuro lama hagaajin karo, amma dhibbaa lagala kulmaa. Arinteenu akhristow bilawgii bay ka xumaatay.

Wariye: Abdifitahaam Ahmed
Mogadishu - Somalia
 abdifitahaam@hotmail.com

Afeef: Aragtida qoraalkan waxaa leh qoraaga ku saxiixan