• Madexweyne C/laahi Yuusuf oo lagu eedeeyay in uu khiyaamo Qaran Galay
• Xasuuq ka dhacay xalay Magaalada Muqdisho
• Madexweynaha DFKG-ah Mudane C/laahi Yuusuf oo dib oogu soo laabtay Jowhar
• Midowga Yurub oo Lacag Dhan $50 Malyan oo Doolar ugu Deeqay Dawlada DFKG-ah ee Soomaaliya

Xubnaha labada gole ee ku sugan Magaalada Muqdisho ayaa qoraal ay maanta soo saareen kadib kulan 4 saac qaatay ka soo saaray war-saxaafadeed lagu cambaaraynayo safarkii madexweynuhu ku tagay qeyb ka mid ah Gobolka Hiiraan iyo ismaamulka kilinka shanaad ee soomalida itoobiya.

Qoraalkan loo qeybiyay maanta Saxaafada ayaa lagu sheegay in ujeedada dhaq-dhaqaaqa Madexwenuhu wado tahay in uu ciidamo Itoobiyaan ah ku weeraro qaar ka tirsan Gobolada dalka, isagoo ugu horeyn bay yiraahdeen bar tilmaameedsanaya Gobolada Bakool ,Hiiraan iyo Bay. Kadibna ay u qorsheysan tahay in aakhirka uu weerar la beegsado Magaalooyinka Muqdisho, Marka iyo Kismaayo.

War-saxafadeedkan ayaa lagu xusay in Beesha Caalamka la ogeysiiyay ,in taliska Mene Zanawi mas'uul ka yahay dhibaatada Soomaaliya ka tagaan, isla markaana uu weli ku hawlan yahay sii fogeynta xal-uhelida arimaha gudaha ee Soomaaliya,iyadoo qoraalka lagu soo gaba-gabeeyay in colaada ka dhalata dhaq-dhaaqyada socda aysan ku-ekaan doonin Soomaaliya balse usii gudbi doonto Geeska Afrika oo markaasina ay wiiqi-karto nabada iyo xasiloonada ka jirta wadamada xuduuda la wadaaga Soomaaliya.

Dhanka kale xeeldheerayaaasha sharciga ayaa aaminsan in Baarlamaan uusan kooramkiisa dhameyn uusan mar-naba soo saari karin wax go'aan-ah, maadaama loo baahan yahay marka sharci la soo saarayo in la helo Xildhibaano gaarayo 138.

Xubnaha ku sugan magaalada Muqdisho ayaa mar-walba laga dareemaa dhaq-dhaqaaq, mar-alaale marka uu Madexweynuhu booqasho ku marayo Gobola dalka qaarkood. Sida wararka hoose ku cadna Madaxweynaha DFKMG maanta ayuu kusoo laabtay Jawhar.

Aug 11, 2005

Xasuuq abuuray xaalad naxdin iyo murugo xambaarsan ayaa ka dhacay xalay, xarun ay deganayaan beesha Aylo oo ku taal duleedka isbitaalka Digfeer, gaar-ahaan xero-qaxooti ay daganaayeen ,waxayna ku sugnaayeen xeradan sanadahii oogu dambeysay ka dib markii ay ka soo barakaceen deeganadoodii.

Hadaba waxaa xalay lagu baraarugay dhawaaqa rasaasta oo lala beegsaday dadkii maatada ahaa ee ku sugnaa xeradan ,kadib markii ay soo weerareen ciidan la sheegay in saldhigeedu yahay rugta Warshadii hore ee caanaha.

Ehelada dadka la xasuuqay oo ay ku  jirtay hooyo dhashay labo walaalo ah, oo lagu dilay goobtaas laguna magacaabo Mama-Karaama kana muuqatay argagax iyo murugo weyn,ayaa ka codsatay shacabka Muqdisho in loosoo gurmado.

Dhinace kale mar suaal la weydiiyay sarkaalka heysta ciidamada Maxkamada islaamka Warshada caanaha ayaa ka gaabsaday in uu jawaab cad ka bixiyo tuhunka loo heysto ciidamadiisa.

isku soo wada duuboo falkan lagu xasuuqayo shacabka ayaa dhacaya xili uu magaalada Muqdisho ku sugan yahay Gudoomiyihii Baarlamaanka iyo xubnihii awooda ciidan kulahaa magaalada Muqdisho.

 Wixii warar ah ee ku soo kordho dib ayaan idin kala socod siin doonaa hadii EEBE Idmo.

Madaxwaynaha Dawlada Federaalka KMG-ah ee Soomaaliya Mudane C/laahi Yuusuf ayaa duhurnimadii maanta dib oogu soo laabtay xarunta Kmg-ah ee dawalada magaalada Jowhar.

Socdaalka madexweynaha ayaa sida la sheegayo waxaa ku weheliya qaar ka tirsan Xogheyntiisa gaarka-ah ,garoonka markii uu soo caga dhiganayey waxaa ku soo dhaweeyay xubno isugu jiro wasiiro iyo xildhibaan ka tirsan dawlada FKMG.

Madaxweynaha ayaa ka soo kicitimay deegaanka Mustaxiil oo ka tirsan qeybta ismaamulka Soomaalida ee itoobiya ,isagoo halkaasi u joogay in uu wada-xaajood lagalo waxgaradka deegaanka gobolka Hiiraan, waa sida aan warka ku helnaye.

Safarka madexweynaha oo markii hore la shaaciyay in uu ku wajahan yahay deegaano ka tirsan gobolka Bakool ayaan la aqoon waxa keenay isbedelka deg-deg ah.