Warbixinta shirka
32-aad ee Wasiiradda A.dibada ee Dalalaka Islaamka.
War- Magaalada Sanca ee
dalka Yaman ayaa 28-30,Juun,05 waxaa lagu qabtay shirkii
32-aad ee Dawlaha Caalamka Islaamka,Dawlada Federaalka KMG
ee Soomaalida ayaa waxaa shirkaasi uga qayb galay Wafdi uu
hogaaminayey Wasiir u Dawlaha A.Dibada ee xukuumada Federaalka
Soomaalida Muddane Eng. Ibraahim Sh.Cali (Jeebo),Xildhibaan
Sheekh Xasan Bile.
Xildhibaan Maxamed Maxamuud
Isaaq,Dr.Sh.Cabdulqadir Xasan Yabarow Agaasimaha Waaxda
Carabta iyo Islaamka ee Wasiirada A.Dibada ee Soomaalida iyo
Ambasator Prof.Mahdi Abuukar Maxamuud oo ka mid ahaa 26-kii
Musharax ee Madaxweynenimada Soomaaliya .
shirka Islaamka Go`aanadii
ka soo baxay ayaa waxaan ka wareystey Prof.Mahdi Abuukar oo
ii sheegay qoddobadii halkaasi looga hadlay ,Wasiiradii ay
la kulmeen iyo qoraalkii halkaasi ka soo baxay oo lagu
turjumay af-somaaliga sidan ayuu u qornaa.
OIC/ICFM-32/2005/POL/DR.3REV.2
(
QARAARKA LAMB. POL-32/3 OO KU SAABSAN XAALADDA
SOOMAALIYA)
Shirkii
Labo iyo Soddonaad ee Wasiirada Arrimaha dibadda Wadamada
Islaamka
Ee ka
furmay M.Sanca inta u dhaxaysay 21-23 Jumaadul awal 1426H.
kuna began 28-30 Juun 2005.
Ayadoo la xasuusanaayo
dhammaan go’aamadii ka soo baxay shirarkii Madaxda Wadamada
Islaamka ,laga soo bilaabo shirkii Lexaad ilaa shirkii
Tobanaad ee Madaxda Islaamka ,sidoo kale go’aamada ka soo
baxay shirarkii Wasiirada Arrimaha Dibadda ee Dalalka
Islaamka oo ugu dambeeyay Shirkii Kow iyo Soddonaad ee lagu
qabtay M. Istambuul -dalka Turkiga , waxaa mahad loo soo
jeediyay Madaxda Dalalka Islaamka sida ay iskugu
mashquuliyaan wax ka qabashada Dhibaatooyinka Soomaaliya iyo
xal u helideeda ,iyo sida ay Nabad buuxda iyo Degganaanba
loogu soo dabaali lahaay Wadanka Soomaaliya iyadoo laga
hergelinaayo dhammaan dalka oo dhan Dib u Heshiisiin qaran .
Sidoo kale waxaa la
tilmaamay dadaalka iyo iskaashiga Ururka Islaamka uu la
sameeyay Ururada Dowliga ah iyo kuwa goboleedba ,sida
Qramada Midoobay ,Jaamacadda Dalalka Carabta ,Ururka Midowga
Afrika ,iyo Hay’adda Horumarinta Dowladaha Bariga Afrika (
Igad ), iyadoo la xusuusanaayo dowrka ay Ururka Islaamka ka
qaateen gargaarkii balaarnaay iyo gurmudkii Soomaaliya loogu
gurmaday 1992, iyadoo sidoo kale la xusay dadaalka iyo
taakulada Banii -aadanimo ay ka geesteen arrintaas Bulshada
Caalamka kali-kali amaba koox ahaan.
Ka dib markii la arkay
warbixintii Xoghayaha Guud ee Wadamada Islaamka ee ku
saabsanayd Xaaladda Soomaaliya ( Lambar. OIC/ICFM-32/2005/POL/SG.REP.3
) :
1-Waxaa mar labaad la
adkaynayaa in midnimada dhuleed ee Soomaaliya ay tahay shay
Muqaddas ah ,sidoo kale in ay si buuxdo ugu madax banaanaato
goboladeeda iyo Siyaasadeedaba ,laguna dhowro.
2-Waxaa si buuxda loo
taageerayaa dowladda Ku Meel Gaarka ee ka dhalatay Shirkii
Dib u heshiisiinta Soomaaliya ee Nayroobi ,iyadoo waafaqsan
Axdiga ku meel gaarka Soomaaliya ,heshay kalsoonida
Barlaamnka ku meel gaarka ,waxaana loogu baaqayaa Dowladaha
Deriska la ah Soomaaliya iyo kuwo kalaba in ay ka joogsadaan
wax allaale waxii kicin kara Fitno hor leh oo cusub iyo kala
fur-furasho, Taa soo horseedi karta in Fashil ku yimaado
mirihii ka dhashay Shirkii dib u heshiisiinta Soomaaliya ,sidoo
kale waxaa lagu baaqayaa in la meel mariyo go’aankii Golaha
Amaanka horay ugu soo baxay kuna saabsanaa in Hoy ,Taakulayn
midna la siin kuwa Mucaarad ku noqda Dowladda Soomaaliya
,wax hub ahna loo dhoofinin dalka Soomaaliya.
3- Waxaa loogu baaqayaa
dhammaan Hoggaamiyaasha Soomaaliyeed in ay dhowraan ayna u
hoggaansamaan Natiijooyinkii ka soo baxay Shirkii dib u
heshiisiinta ee Nayroobi ,iyadoo laga hormarinaayo
Maslaxadda Shacabka Soomaaliyeed midda gaarka ah , waana in
dib u heshiisiinta Aasaas looga dhigaa dhowrista iyo ku
dhaqanka Axdi qarameedka ku meel gaarka ah iyo Sh. Islaamka
.
4- Dalalka Xubnaha ka ah
Ururka Islaamka waxaa loogu baaqayaa in ay kordhiyaan
gargaarka iyo Taakulaynta loo fidinaayo Dalka Soomaaliya ,iyadoo
la- tixgelinaayo dhibaatooyinka iyo khasaaraha ay soo
gaarsiiyeen Tuufaanta (Sunaami) ,iyo Haraaga Sunta
Nukliyarka ah ,taa soo sababtay in dad fara- badan,xoolo
miro beereed , Noolo badeed ay ku wax yeeloobeen .
5-Dhammaan Dowladaha
Aduunka waxaa loogu baaqayaa ,in ay Dowladda Soomaaliyeed u
fidiyaan deeq dhaqaalo oo deg deg ah ,si ay Dowladdu u
hanato soo celinta Nabadda iyo Xasiloonida , una
dhamaystirto dib u heshiisiinta qaran ,sidoo kale ay u
dhamaystirto waxa ka dhiman qaab dhismeedka Xukuumadda ,waxaa
kaloo loogu baaqayaa Hay’adaha Islaamka kuwa Dowliga ah
amaba kuwa aan ahaynba ,Bankiga Horumarinta Islaamka ,si
gaar ahaaneed Sanduuqa Midnimada Islaamka ,in ay si hab sami
ah ay u gutaan xilka kaga aadan Dalka Soomaaliya ,ayna u
muujiyaan Taageerada Midnimada Islaamka ay u hayaan
Xukuumada Soomaaliya ,sidoo kale waa in ay Taageero u
muujiyaan Dalalka Islaamka ay ka soo gaareen dhibaatooyinka
Qaxootiga Soomaalida oo ku qul qulaaya dalalkooda sida
Dowladda Jabuuti ,Dowladda Yemen .
6-Waxaa loogu baaqayaa
dalalka loo xilsaaray Arrimaha Soomaaliya in ay wax ka
qabtaan in ay dadaalkooda ku wajjahan arrintaas ay
kordhiyaan ,ayna kordhiyaan sidoo kale Xiriirka ay la
samaynayaan Dalalka daneeya Arrimaha Soomaaliya ,ayna u soo
gudbiyaan warbixintooda shirarka Islaamka .
7-Waxaa Dowladaha Xubnaha
ka ah Ururka Islaamka lagu boorinayaa in si tabarruc ah ay u
bixiyaa Miisaaniyadda ay ku shaqayn la haayeen Kooxda loo
xilsaaray arrimaha Soomaaliya ,si ay ugu fududaato gudashada
xilkooda ,iyo sidii loo sahli lahaay dhaq- dhaqaaqa Ergiga
gaarka ah ee Xoghayaha Guud ee Ururka Islaamka ee u xil
saran arrinta Soomaaliya .
8-Dhammaan Dowladaha
Xubnaha ka ah Ururka Islaamka waxaa lagu boorinayaa in ay ka
qayb qaataan Ciidamo Nabad ilaalineed ee Soomaaliya ,oo
hoos taga Qaramada Midoobay .
9- Dhammaan Xubnaha Ururka
Islaamka waxaa loogu baaqayaa iyagoo raali ka ah in ay gacan
ka gaystaan sidii Safaaradaha Soomaaliya ee Dalkooda ka
furan ay u gudan lahaayeen shaqadooda Diblomaasiyadeed ayna
ku taakuleeyaan dhaqaalo maaliyadeed si ay u daboolaan
baahidooda dhaqaale .
10- Waxaa lagu baaqayaa in
Cunaqabateyntii saarneyd Xoolaha ,Miraha Beeraha ee
Soomaaliya in la qaado .
11-Waxaa si buuxdo loo
cambaareeyay dhammaan falalka dhibta ah oo loo gaysta badda
Soomaaliya iyo Xeebaheedaba iyadoo lagu aasay Haraaga
Nukliyarka ah ,waxaana loogu baaqayaa Dowladaha iyo
Shirkadaha Shisheeyaba in ay joojiyaan ku xad gudabka iyo
boobka Khayraadka Badda Soomaaliyeed ay u gaystaan .
12-Waxaa laga codsanayaa
Xoghayaha Guud ee Ururka Islaamka in oo diyaariyo Daraasad
suurto gelinaysa in uu Ururku ka furto Xafiis Soomaaliya si
la iskugu duba rido dadaalka Ururku oo ku doonaayo in
Soomaaliya Dib u dhis lagu sameeyo ,loona siiyo Dowladda Ku
Meel Gaarka ,kaalmo iyo la Talin xagga Siyaasadda ahba ,oona
soo gudbiyo Miisaaniyadda looga baahanyahay furitaanka
Xafiiska kor ku soo xusnay .
13- Xoghayaha Guud waxaa
laga codsanayaa in oo dabagal ku sameeyo sidii ay u fuli
lahaay qaraarkan assaga ah , waana in oo u soo gudbiyaa war
bixin la xiriira fulitaanka qaraarkaan Shirka Ururka
Islaamka ee Wasiirada arrimaha Dibadda Dalalka Islaamka ee
Seddax iyo Soddonaad .
ugu danbeyn Prof.Mahdi waxa
uu ii sheegay in ay la kulmeen Inta badan wasiiradii
shirkaasi ka soo qayb galay waxayna kawada hadleen sidii Xukuumada
Soomaalida Gacan loo siin lahaa iyo sidii Iskaashi
waxwadaqabsi dhinacyo kala duwan dib loogu abuuri
lahaa,iyadoo arrimihii laga wada hadlay guul iyo afgarad ay
ku dhamaadeen.
dhamaad.
Abdikarim Aden Husein.
Nairobi,Kenya.
abdikarimhussein@hotmail.com
Faafin: SomaliTalk.com | July
8, 2005
Mareykanka oo ka digay dagaalo dhex mara siyaasiyiin
Soomaaliya
War maanta laga soo
saaray safaarada dowalada Maraykanku ay ku leedahay Nairobi
ayaa lagu sheegay in..
Guji... July 7
| 
Daabaco
Boggan | Print