KULMIYE
OO LUMIYEY KALSOONIDII BEELAHA LA HAYB-SOOCO
Minneapolis, Minnesota
USA
Doorashadii ka
dhacday Somaliland 2003 waxaa moodaysay in inta
badan beelaha la hay-sooco ay codkooda siiyeen
Xisbiga Kulmiye oo runtii aad moodaysay markii uu
doorashada galayey inuu ahaa Xisbiga qura ee soo
jiitay dadkaan oo ugu baaqay inuu dadkaan wax weyn u
qabanayo.
Waxaan tusaale u
soo qaadanaynaa shir ka dhacay Columbus, Ohio oo uu
lahaa Xisbigaas Kulmiye ay ka soo qayb galaan dad
badan oo ka tirsan beelahaan oo ka kala tagey San
Diago iyo Minneapolis. Laakiin waxaad moodaa inay
noqotay "Sidaan kuugu lisay iiguma aadan hanbaynin",
sababtoo ah wax hadal ah kamay soo saarin dilkii
khadar iyo xarigii loo geystay 100 qofood ee ka
mudaharaaday dilkiisaba, ogaadana "Libaax nin ganay
iyo nin galadayba oge".
Waxaa kale oo aan si
taxadar ku jiro aan u soo dhaweynaynaa booqashadii
uu ugu tagay Guddoomiyaha Xisbiga Ucud oo aan
leenahay "waa ciyi waa ka baryey", sababtoo ah
haddii uu isagu wadanka ka maqnaa waxaa joogay ku
xigeenkiisa iyo af-hayeenkii ururkaba kamana hadlin
Dilkii iyo xarigii midnaba.
Waxaan rabaa inaan
Su'aal weydiiyo Mr Saleebaan Gaal iyo Mr Qaybe,
dawlada garanaye idinku maadaama aad tihiin
guddoomiyayaasha Labada Gole maxaad uga hadli
weydeen dilkii Khadar iyo xabsigii loo geystay
dadkii mudaharaadayey? Mise waxaad tihiin la
haystayaal iyo dad uun ka hadla wixii ay iyaga dani
ugu jirto?
Ma
jecli Udub iyo Dawlada midna inaan wax weydiiyo
sababtoo ah waxaa u hadlay Ismaaciil Faqash oo
runtii BBC-da ka sheegay hadalo aan ku fiicneyn nin
mas'uul ahi inuu yiraahdo aadna moodid marka uu
hadlayo inuu dadka kala fogeeyo ma ahee inuusan
sheegin wax dadka isku keenaba, waxaase iigu yaab
badnaa markii uu yiri:-"Banaanbixii waxaa laga
cambaareeyey Misaajidada".
Su'aal baan rabaa
inaan weydiiyo hadiiba ay jiraan, maba u malaynayo
inay jirtee, culimadu may ka hadasho dhibta 500 oo
sano iyo ka badan dadkaan lagu hayo oo isugu jira
takoorka iyo aflagaadada waxaanse u malaynayaa inay
arrintu tahay"waxaa la yiri :-Qaylaa yeertaye xageen
u cararaa? Markaas baa la yiri Masjidka markaas baa
la yiri isagayba qayladu ka yeertay"!!!!!.
Waxaa jira 3 xubnood
oo uga jira golayaasha beelahaan laakiin nasiib daro
aad moodid inay yihiin "lax dhukani abaar moog" oo
dantoodii khaaska aheyd ay uga xoog badisay, tii
guud aadna moodid inay la haystayaal yihiin. Ogaada
"ninkii dilay walaalkaa adigana waa kuu dan leeyahay":
maanta khadar bari adiga!
Ma jecli inaan dadka u
dhashay beelahaan la hayb-sooco aan idin iraahdo
ciddaas doorta laakiin ogaada haddii aad UDUB
doorataan Ismaaciil Faqash baa idinku soo noqon
marka inta isku tagtiin waxgaradkiina isku raaca
inaad meeshii danta beeshu ay ku jirto aad siisaan
codkiina lana xisaabtantaan cida aad siinaysaan
codkiina.Su'aasha ugu dambeysa
waxaan rabaa inaan wediiyo waxgaradka iyo inta
nabada jecel haddii ninka wax dilay uu ka tirsanaan
lahaa beelahaan la hayb-sooco, Ka la dilayna Uu
yahay Beelaha isa sareysiiya maxaa dhici lahaa?
Imisa qofood baa u dhiman laheyd qofkaas la dilay
dartiis?
Saciid Cabdullahi
Ismaaciil (Saciid Tumaal)
saciidtumaal@yahoo.com
Daabaco
Boggan | Print