26ka, 27-ka Jun, 1da Luulyo iyo Soomaalida
Pakistan Ahmed
Ugaas | ugaas2@yahoo.com
Xuska Maalmaha Gobannimada Soomaalida oo lagu qabtay
Karachi-Pakistan
Ardeyda Soomaaliyeed ee wax ka
barata magaalada Karachi ee dalka Pakistan ayaa dabbaaldeg ballaaran u sameeyay
maalmaha gobannimada Soomaalida ee kala ah 26-ka, 27-ka Juun iyo 1da Luulyo.
Tartan cayaareed kubadda cagta
ah oo lagu xusayay maalmahaas ummadda Soomaaliyeed qaayaha weyn u leh ayaa lagu
qabtay garoonka cayaaraha ee Jaamacadda Karachi, waxaana tartankaas ka qeyb
galay 4 kooxood oo ka dhisan magaalada Karachi, kuwaasoo kala ah: 1. Tarik
Road, 2. Maskan Team, 3. SIMAD, iyo 4- Kaalaaboodh.
Tartankaas oo uu soo agaasimay
Bogga Waxbarashada ee Internet-ka (Somali Education) wuxuu ahaa mid is-arag
kaliya, waxaana tartankan la billaabay 26-kii Juun 2003, waxaana lagu furay
kooxaha Kaalaaboodh iyo Maskan Team, cayaartaasoo 5-1 ay guushii ku raacday
Kooxda Kaalaaboodh. Cayaar taas la mid ah oo la qabtay 27-kii Juun waxaa isaga
hor yimid labada kooxood ee kala ah: SIMAD iyo Tarik Road waxaa 4-0 ku badiyay
kooxda SIMAD. Sidoo kale cayaar kaalinta 3aad ah oo loo qabtay kooxaha Maskan
iyo Tarik Road waxaa 6-3 lagu suul-daaray Kooxda Tarik Road.
1da Luulyo iyo Soomaalida Minnesota
Soomaalida Minnesota oo wadada Lake Street
ku sameeyey xaflad aad u ballaaran oo ku saabsanayd maalmaha xoriya ee
26ka, 27ka Jun iyo 1da luulyo. |
Cayaartii kama-dambeysta ahayd
oo la qabtay 1dii Luulyo oo dhex martay labada kooxood ee SIMAD iyo Kaalaaboodh
ayaa ahayd mid aad u xiiso badan in badana la sugayay. Cayaartaas oo aad u
kululeyd awgeed labada midkoobda uma suurtogelin inay gool dhaliyaan qeybtii
hore ee cayaarta. Hase yeeshee qeybtii dambe ee tartanka ayaa Kooxda
Kaalaaboodh ay la soo gashay dardar cusub kadib markii weeraryahankooda Maxamed
C/kariim Daahir (Khadar) oo cayaarta kooxda Kaalaaboodh wax weyn ka beddelay
daqiiqado kadib markuu ku soo biiray. Kooxda SIMAD ayaa sidoo kale weerarro
isdaba-joog ah ku haysay goosha Kooxda Kaalaaboodh, hase yeeshee aysan u
suurtoobin inay gool helaan.
WIIL UBAAHAN
GARGAAR CAAFIMAAD |
Wiilkan
yar wuxuu ku dhasahay boosaaso Jan. 1995kii isagoo lafaha maduxu kala keceen taas oo ay sababtay biyo badan oo madaxa kaga jirey,
wuxuuna u baahana yahay
gargaar degdeg ah. |
Cayaartaas oo weerar iyo weerar-celin ku
socotay waxaa kooxda Kalaaboodh u suurtogashay inay 20 daqiiqo ee ugu dambeeyay
dhaliyaan 2 gool uu u saxiixay weeraryahankooda Haashim C/laahi Sabriye,
waxayna cayaartaasi ku soo gabagabowday 2-0 oo ay guushii ku raacday Kooxda
Kaalaaboodh.
Gabagabadii cayaarta xaflad
gaaban oo ka dhacday isla garoonka ayaa Guddigii qabanqaabada tartanka kaga
warrameen ujeeddada ka dambeysay in la soo abaabulo tartanka, waxayna sheegeen
inay ugu talo galeen in lagu xuso 26-ka Juun (oo ah markii gobollada Waqooyi ee
Soomaaliya ay gobannimadooda ka qaateen gumeysigii Ingiriiska), 27-ka Juun (oo
ah markii Jabuuti ay ka madaxbannaanaatay Faransiiskii addoonsan jiray), iyo
1-da Luulyo (oo ah markii gobollada Koonfureed ee Soomaaliya ay ka xoroobeen
gumeystihii Talyaaniga, isla markaana ay israacen labada gobol ee walaalaha ah
ee Waqooyi iyo Koonfur). Guddigu wuxuu sheegay inay tartanka ugu talo galeen
inay ardeyda Soomaaliyeed ku soo xusuusiyaan taariikhda dalkooda iyo halgankii
loo soo marayba.
Suugaan gobannimo-doon iyo
guubaabo isugu jirtay oo halkaasi maqal ahaan looga shiday iyo calanka
Soomaaliyeed oo halkaasi laga babinayay ayaa in badan oo damiir waddannimo leh
ku beertay qiiro weyn, waxayna sheegeen inay tahay markii ugu horreysay ee ay
dalka Pakistan ugu dabbaaldagaan munaasabadahan sidan oo kale ah.
Ugu dambeyntii Guddiga
qabanqaabada wuxuu abaalmarinno guddoonsiiyay:
-
* Axmed Weli Baarbe (Kooxda
SIMAD) oo loo aqoonsaday inuu yahay Gool-hayahii ugu wanaagsanaa tartanka.
-
* Jibriil Qaasim Faarax (Kooxda
Tarik Road) oo loo aqoonsaday inuu yahay Difaacii ugu wanaagsanaa tartanka.
-
* Maxamed C/kariim Daahir "Khadar"
(Kooxda Kaalaaboodh) oo loo aqoonsaday inuu yahay Weerar-yahankii ugu
wanaagsanaa tartanka.
-
* Eng. Xasan C/laahi Diiriye
"Nawabshah" (Kooxda Maskan Team) oo loo aqoonsaday inuu yahay
Khad-dhexe-hayihii ugu wanaagsanaa tartanka.
-
* Haashim C/laahi Sabriye (Kooxda
Kaalaaboodh) oo noqday cayaaryahankii ugu goolasha badnaa intuu tartanka
socday, kaasoo dhaliyay 4 gool.
Sidoo kale Guddiga
Qabanqaabada wuxuu abaalmarinno guddoonsiiyay, isla markaana mahadnaq u soo
jeediyay 4 guddoomiye-kooxeed oo kala ahaa:
-
1. C/laahi Aadan Cumar "Fuul"
- Guddoomiyaha Kooxda Kaalaaboodh (Kaalinta 1aad)
-
2. Maxamed Ibraahim Nuur -
Guddoomiyaha Kooxda SIMAD (Kaalinta 2aad)
-
3. Maxamed C/raxiim Sahriif
- Guddoomiyaha Kooxda Maskan Team (Kaalinta 3aad)
-
4. Cali Maxamed Xaaji "Catoosh"
- Guddoomiyaha Kooxda Tarik Road (Kaalinta 4aad).
Guddiga Qabanqaabada
Laxiriir:
Ahmed Ugaas |
ugaas2@yahoo.com
Faafin: SomaliTalk.com | July 5, 2003
....
Copyright
& Islaamku wuxuu ka qabo.... Akhri
Kulaabo bogga hore ee
www.somalitalk.com
|