Ma ahayn keliya khabiir hubka ah oo ka soo shaqeeyay Iraq, booqdayna Baqdaad in
ka badan 40 jeer, kuma ekeyn keliya shaqadiisa wasaaradda difaaca ee Briton iyo
shaqaale UN-ka ah, balse odaygaas garku caddaaday, ee ay ka muuqatay diiftu,
wuxuu fekerkiisu ka fogaa intaas oo dhan.
Kelly wuxuu noqday ninka keliya ee ka gelgishay xaq darrada ay maleegayaan kuwo
badan oon sawiradooda ka daawanno TV-yada, looga istaago kuraasta, loona
sacabbo tumo markay hadlayaan.
Maanta Kelly waxa uu boos u sii xaarxaarayaa George J. Tenet, madaxa sirdoonka
Maraykanka, labada nin oo ay ku xuubsiibteen Bush iyo Blair, balse Kelly waxa
uu kaga duwanaa Tenet isagoo runtii uu hayay faraha u geliyay Andrew Gilligan -
wariye BBC-da iyo Susan Watts oo iyaduna “Newsnight” ka BBC-da ka ah analyst .
[Daawo
Halkan - ITV]
Haddaan haddaba is weeydiinno ma ahayd inuu Kelly dhinto ciddii doontaba ha
dishee, mase ku filan tahay taasi inay meesha ku daminayso dabka hadda dogobada
la sii saarayo ee ka aloosan xukuumadaha loo caalwaayay ee Maraykanka iyo
Ingiriska, amaba si kale haddii loo dhigo ma tahay mid bannaanka soo dhigaysa
xaqiiqdii la raadinayay, si aan xaqiiqdaas u helno waa inaan wax yar taariikhda
dib u jalleecnaa, inagoon meel fog aaddina, keliya soo rog baalkii ay
baarayaasha hubku ku qornaayeen xilligii la daandaansanayay Ciraaq.
“Waqti ayay qadanaysaa ogaanshaha hubka ay haysto Ciraaq” Hans Blix.
“Nooma ogolaan Maraykanka iyo xulufadiisu inaan ka gungaarno hawlaheenna’
Mohamed El Baradei.
“Nolosheenu Qatar ayay ku jirtay labada dhinacba-dhanka Ciraaq iyo Dhanka
Xulufada, mana igu noqonayso lama filaan geerida Kelly, wuxuu ahaa nin aan
waqti badan isla soo shaqaynay, waan tabaynaa Kelly, wuxuuna u dhintay xaqiiq
uu sheegay awgeed” sidaas waxaa u sheegay Telefishanka Al-Jaziira Madaxii hore
ee baarayaashii hubka ee Ciraaq.
|
Waa maxay xaqiiqda dhabta ah ee uu u dhintay Kelly ?
BBC-daa xoogaa baalka ka feyd-day oo tiri “Waxaan kadib markaan ka cudur
daaranay eheladii Kelly, aan si dhab ah u sheegeynaa inuu ahaa Kelly isha aan
ka helnay Xaqiiqda aan hayno ee ku saabsan in la buunbuuniyay hubka Ciraaq”.
[Dhegeyso
Halkan VOA].
Meeshaas haddaba aqristoow waxaa nooga caddaanaysa :-
1-In Ciraaq loo burburriyay dano kale balse aysan ahayn tan lala wareegayay
saxaafadda horteeda ee ahayd inay haysatay hub qatar ah oo ay 24-saac gudahood
ku isticmaali karto.
2-In haddana lagu socdo isla waddadii loona danleeyahay waddamo ay ugu
hooreeyaan Iran iyo Syria.
3-In si kasta oo ay isugu dayaan kuwa awooda sheeganaya aysan marnaba qarin
karin soo if-baxa xaqiiqda maalinba maalinta ka dambeysa.
Guntii iyo gabagabadii, waan arki doonaa meesha uu ka biyo cabbo sahanka
xaqiiqo doonka ah ee uu garhayeenku ka yahay ninka dhintay ee David Kelly,
inagoo sidaas oo kale quud darraynaynaa inuu George Tenet-na soo bandhigo waxa
uu hayo dhankiisa.
Aan ku soo gabagabeeyo maqaalkeyga xusuusin ah maahmaahdii Soomaaliyeed ee
oranaysay "labadii Xaq Darro ku heshiisa Xaqa ku dirriraan."
