SomaliTalk DALSAN
Home | Webs | Email | TellFriend | Search | Feedback |
w w w . s o m a l i t a l k . c o m
SOMALITALK - MINNESOTA

Faallo: Dibu-heshiisiinta Doofaareey iyo Dibin-daabyada Dalalka Dariska ah

C/raxman Ceynte

Minnesota, USA

abdirahmanceynte@yahoo.com  

 Nov 14, 2003

 

Muddo sanad kor u dhaafeysa ayaa durbaba kasoo wareegatay billowgii shirka fadhiidka ah ee ka socda koleej-ka doofaarey ee duleedka magaalada Nairobi Kenya. Natiijada la taaban karo ee ilaa iyo imminka kasoo ifbaxdayna waa dilalka gaadmada wata ee sida waxashnimada ah loogu dilay laba kamid ah ka qeyb galayaashii shirkaas. Inkastoo eysan cadeyn masuuliyadda dilkaas, hadana dilalkani wexeey wataan sumado isu-dhow oo ishaaraya in maleegayaashii dilalkani eey yihiin quwado huwa qaac dowladeed. Walow eeysan Igad ku dhiiraneyn ku dhawaaqida fashilnaanta shirkan, haddana waxaan ummada Somaliyeed ka qarsooneyn in shirku afka dhulka la galay, sababo maamul-xumo, maslaxad dowlado iyo miidaamin siyaaadadeed isugu jira.

I  I  D  H  E  H

KAAH
GUJI HALKAN.......

Aan ku hormaree, sababta maamuleed ee uu shirku u fashilmay waa mid ku qotonta xirfad-xumida Igad ee daadihinta shir sidan oo kale ah. Sida eey qorayaan khubaro ku takhasusay xallinta isku-dhacyo sokeeye oo caalamka ka dhacay, heshiisiinta kooxo awood ahaan iskadaba dhow waa saldhiga ugu adag ee lagu dhameyn karo wada hadalo oo qura. 27 dagaal sokeeye oo ka dhacay caalamka qarnigii ina dhaafay ayaa 12 kamid ah waxaa lagu xaliyey: awood roonaansho eey xoog bateen dhinac kamid ah dhinacyadii is leynayey, halka 3 kamid ah dagaaladaas sokeeyana lagu dhameeyey muquunis millatari kaga yimid dowlad seddexaad, iyadoo illaa iyo haatana xal loo la'ayahay meel marinta dagaalo sokeeye oo qeybihii isku dhacay eey awood ahaan bar-bar dhig yihiin. Muhimadeydu waa inaan ifiyo in Igad eey isku dayday ineey dhexdhexaadiso mahligiin soo calaliyey dhuuxa iyo lafaha shacabka eey rabaan ineey horboodaan. Igad wexeey aheyd ineey si goodis ku dheehan yahay ugu hanjabto qeybahan, isla markaana xakameyso carooshada qaar kamid ah hogaamiye kooxeedyada oo ku laabtay dhulka eey xooga ku heystaan, inkabadan 4 goor, iyagoo markaas tu walba caro-celin gunad ah lagu soo sasabayey. Talaabadaas iyo kuwa kale oo suureyn ah oo Igad u muujisay raggan ayaa horseeday meel-mari-waaga ku habsaday shira xerada Doofaareey ka socda.

Maamul-xumo kaliyata ma aheyne, waxaa kaloo shirka marin habaabiyey maslaxadaha dowladaha dariska ah, oo mid walba wata liis dheer oo eey ku tixan yihiin agendayaal siyaasadeed. Waxaa laga yaabaa in qof isweydiiyo; maxeey noqon kartaa maslaxadda dalalka dariska ah naga leeyihiin? Ma shidaal baa noo aasan? Mise mooska iyo canbaha ayaa loo dig iyo dam leeyahay? Kolleey maslaxad dhaqaale kama marna dibin-daabyada eey wadaan dowladaha dariska ah. Ha yeeshee, maslaxado siyaasadeed ayaa ah la dhabarta xaasidnimada ku jirta dowladaha dariska ah. Ineey taas xaqiiqo tahayna waxaan ku ogaaday hadal uu Madaxweyne Moi ka yiri Jaamacadda Goerge Washington ee ku taala Washington D.C, halkaas oo uu booqasho aan rasmi aheyn ku yimid kal hore. Moi wuxuu si dadban u ifiyey cabsida fog ee dowladda Kenya ka qabto awood mideysan oo Somalia la yiraahdo, oo markale ka soo ifbaxda geeska Africa. Sidoo kale, Itoobiya iyadu wexeey si aan gabashaba laheyn u taageertaa dhamaan dib-jirada go'aansada ineey cinwaankooda hogaamiye kooxeednimo sii heystaan iyagoo waliba aan dhaqdhaqaaq siyaasadeed ama millatari heysan. Wexee kaloo hubka la isku gumaado usoo dhoofisaa xudunta Somalia, iyadoo iska dhaga tireysa cuna-qabateynta xagga hubka ah ee ku oogan Somalia. Intaas kaliya ma ahane, Itoobiya wexeey dhufeys soo jireen ah kaga jirtaa soo ifbax danbe oo ku yimaada calanka macnaha weyn xambaarsan ee shanta geesood ee itobiya geeska uga jirto ku dhaqshadeysan tahay. Aqoonyahano uu ugu horeeyo Prof.Cabdi Samatar-ka Jaamacadda Minnesota ayaana qoraal dheer oo bidhaaminaya lugooyada itoobiya shirka ku heyso diyaariyey, isagoo waliba xitaa loo goodiyey markii uu ahaa guddoomiyaha guddiga is-waafajinta, intii uu shirku car-cartiisa qabay. Jabuuti iyadu maslaxadda kaliya eey nagal leedahay waa mid walaaltinimo oo eey ku dooneyso ineey aragto dhulkoodii hooyo oo mar uun cagihiisii dib ugu istaagay. jabuuti wexeey nqotay cunug rajay ah oo hooyadiis geeriyootay isagoo 13 jir ah. Allahuma laga yaabee ineey jabuutiyaanku doonayaan ineey nabdeeyaan Somalia si eey ugu soo xagaa baxaan, marka kuleeylka biirta ahi huwiyo jamhuuriyada jabuuti.

Waxaa maamul-xumada siyaasadeed iyo maslaxada dowladaha dariska ah sii dheer, miidaamin siyaasadeed oo eey isticmaalayaan kooxaha isbaaradu u taal ee Somalida. Caadi ahaan, siyaasaga gaamuray laguma yaqaano inuu si is-biimeyn ah u rogo mabdi'iisa siyaasadeed, waliba si layaab leh. Taas waxaa lagu arkay Somalia. Waxaan maqalnaa hogaamiyo kooxeedyo qarniyo aflagaadeyn jiray kooxo siyaasadeed oo misana inta dhanka kale si anfariir leh uga soo jeestaan ku dhawaaqa la bohoobid kooxdii uu shalay naqdinaayey. Waxaad kaloo arkeysaa kuwa kale oo sidii iskuul marna iska qoraya marna isaga baxaya jiritaano siyaasadeed, iyagoo ku andocoonaya ineey "is-fahmi waayeen" kaabaha guruubkaas. War heedhe, shalay markii aad sii socotayba sow tii aad amaaneysay? Maxaa is bedelay oo aan adiga aheyn? Waxaa imminka ka abuurmay Somalia isbeheysiyo looga gol leeyahay in leysu gaashaanbuureysto kooxaha kale. Gaashaanbuureysiga noocani ahi waa mid aalaaba eey kooxaha isku biiray isku qabaan nikaax qudbo-siro ah, oo markii uu runta gaarana ku dhamaado furiin aan wax xuquuq ah leysku laheyn.

Ugu danbeyntii, dibu-heshiisiin ku sheega ka socota doofaareey waa mid eersatay oo sababsatay xakameyn xumida Igad, maslaxada dalalka nagu wareegsan iyo is--biimeynta siyaasadeed ee eey caanka ku yihiin dagaal-oogayaasha Somalia. Marka la daalacdo xaqiiqooyinkana, waxaa qofka caadiga ah usoo bidhaami kara muhimada eey leedahay in Igad dib ugu noqoto istiraatiijiyadeed ku beegan xal u helida arrinta Somalia. Aqoonyahano badani wexeey soo jeedin lahaayeen in walba eey dowladaha darisku si bareer ah u hubeeyaan qabiil hebel, si qabiilkaasi uu mar uun ugu dur-duriyo haraadiga qabiilada kale, isla markaana u askunto dowlad ku sheeg ka kooban nin, walaalihiis iyo wiilashiisa, sida khaliijka oo kale. Sababtuna waa fududahay: Xalka ugu macquulsan ee wadanku ma ahan shirar jiitama oo awood-qeybsi keena. Xalku waa fara-maroojin awoodeed, si loo helo nabad sandulle ah, sidii dowladii Siyad Barre-ba aheyd. Hadii eeysan intaas sameyna, dowladaha darisku wexeey iyana qeyb ka dha-dhamin doonaan marin-habaawga ka jira Somalia.

C/raxman Ceynte
Minnesota

abdirahmanceynte@yahoo.com


Copyright & Islaamku wuxuu ka qabo.... Akhri

QORAALADII HORE EE CEYNTE  

 

Powered by www.SomaliTalk.com
All About Somalia and More...
>> Usheeg Asxaabtaada
Allah Is Great
xayaysiis

mahuraan 
MAHURAAN
: Waa buug dhowaan soo baxay GUJI...



Copyright © somalitalk.com. All rights reserved.

HTML CD