Gaaladiid Axmed Darmaan [Abdi-Nur] oo dhowaan Xisbiga
Midnimada Jamhuurigu ay u doorteen Madaxweynaha Soomaaliya ayaa booqasho
maalmahaan ku gaalaa-bixinaayey wadammada Qadar, Jordan iyo Imaaraadka Carabta.
Dhinaca Imaaraadka Carabta Madaxweynuhu wuxuu kula shiray Taliyeyaasha
ciidammada waddankaas iyo madax kale, waxaana uu kala hadlay arrimo ku saabsan
sidii ay gacan uga geysan lahaayeen wax ka qabashada dhibaatada Soomaaliya.
Madaxweynuhu wuxuu tabarucaad dhinaca daaweynta ah u fidiyey bukaan
Soomaaliyeed oo xaaladdoodu ay halis ahayd oo gaaraya 50 qofood, bukaankaas oo
qabay cudurro halis ah, qaarkoodna ay dhinac dhan qalalnaayeen, qaar kalena ay
xabbado ka buuxeen ayaa hadda lala tacaalayaa.
Bukaankani waxay hadda ku jiraan isbitaallo kala duwan oo ku kala yaalla
waddanka Imaaraadka Carabta, halkaasoo ay ku qaadanayaan daaweyn, kaddib markii
badi lagu sameeyey qalliin aad u wanaagsan.
Howsha lagu badbaadinayo bukaankan ayaa ah mid aan horey loo qaban, waana
markii ugu horreysay ee hoggaamiye Soomaaliyeed uu dad ku waxyeelloobay
dagaalka sokeeye gacan ku siiyo taakuleyn daawo oo kharash fara badan lagu
bixinaayo.
President Gaaladiid Darmaan wuxuu kaloo la shiray ganacsatada Soomaaliyeed
ee fadhigoodu yahay magaalada Dubai, kuwaasoo ku ammaanay dadka bukaanka ah ee
uu daaweynta u fidiyey.
Madaxweynaha waxaa la filayaa in marka uu safaraddan soo dhammeysto uu dib
ugu noqdo caasimadda Muqdisho.
Maxamed Xaaji [Ingiriis]
ingiriis@yahoo.com
Dubai, UAE