Maxaad wadaagtaan nabadda?.
U hagarbax safarka nabadda Hadraawi ee Yurub.
Ururka Isbahaysiga Ummadda Soomaaliyeed iyo Somali PEN ee
Iswiidhan waxa ay sii ambaqaadayaan safarka nabadda ee abwaan Maxamed Ibrahim
Warsame ”Hadraawi” uu ka sameeyey dalka Sooomaaliya. Markana waxa uu ka sii
ambaqaadayaa soomaalida qurbaha Yurub iyo waqooyiga Ameerika.
Erayga nabad waa erayada af-soomaaliga ugu faca weyn, uguna
adeegsiga badan. Waxa ugu horreeya ee laba qof isweydiiso markay kulmaan waa
odhaahda,” Nabad ma sheegtay?”. Waana salaanta af-soomaaliga ee ugu caansan.
Tani waxa ay ina tusaysaa in nabaddu ay weligeed ahayd wax
taagan, welwel joogta ahna ku haya dadka soomaaliyeed. Waxaa soomaalidu soo
martay xilliyo nabaddarra ah oo uu ka mid yahay samanka la magac baxay, ”Xaaraama
cune” iyadoo xilliga ay hadda ku jirtaa uu yahay kaasoo ah kud kabo loo
tolay. Maadaama nabadu ay weligeed ahayd lafdhabarta aayaha dadweynaha, haddana
laguma guulaysan in sees adag loo dhigo nabadda, taasina waa in ay ahaataa
hurguma miirantay oo culaysinaysa damiirka waxgaradka iyo masuuliyiinta
soomaalida.
Abwaan Hadraawi wax uu safarkii nabadda ee uu dhowaan
Soomaaliya ku soo maray ku yiri ama halhays u ahaa:
“ Ujeedada safarkayagu waa,walaalayaal aan nabad doonno, oo
aanay waxba wehlin”. Wuxu sheegay in uusan jeclayn in
lagu magacaabo Boqor, waxuuna raaciyey, “boqoradii waxa haysta waad aragtaan!”.
Boqoraddaasna waxa uu ula jeedaai wa NABADDA.
Annagu taas ayaan sii wadaynaa, waxaana suurta gelinay in aan
Hadraawi Yurub keeno, safarkiina biloowno. Inta kale waxaan leenahay
“Haday taal iyo haday tubantahay waa tolla`ay oo looma kala tago”.
Annagu waxaan baaq u diraynaa Soomaalida qurbaha oo dhan,
ururada, ganacsatada, qalinlayda, ragga hal-abuurka, fannaaniinta iyo dhammaan
xirfadlayda kale. Dhamaana waxaan ugu baaqaynaa, aan biloowno dhaqdhaqaaq
nabadeed oo xasiliya nabaddarradda xasili la’ ee dhoowr iyo toban sanno
jirsatay ee Soomaaliya. Abwaanka Maxamed Ibrahim “Hadraawi” dhaqdhaqaaqan ayuu
bud-dhige iyo astaan u yahay.
Waxaanu ku tala jirnaa in safarkani tago dhammaan Yurub iyo
waqooyiga Ameerika. Taasina adiga(qofka Soomaaliyeed ee damiirkiisa iyo
soomaalinimadu gubayso) ayey kugu xiran tahay. Sida aad masuul isaga saarto ama
aad damiirkaaga u daryeeshid, sidii qooleeydii tidhi,
“biyo afkayga aan ku qaado ayaan ku bakhtiinayaa kayn holceysa, haddiise kayntu
bakhtiiyi weydo damiirkayga ayaa sidaa ku caafimaadaya, waayo waxba lama harin”.
Hadraawi waxa uu imaanyaa Stockholm 25 oktoobar, waxii
wakhtigan ka danbeeya waxaa suurta gal ah in uu booqdo dalalka kale haddii la
helo cid abbaabusha safarkiisa iyo maalgelinta looga fadhiyo soomaalida qurbaha.
Waxaanu si gaar ah u dhiiri gelinaynaa shirkaddaha
soomaaliyeed in ay ka qayb qaataan suurta gelinta safarkan nabaddeed ee Maxamed
Ibrahim “Hadraawi”.
Waxii fahfaahin ah fadlan la soo xiriir.Daladda Isbahaysiga
Soomaaliyeed(SRFS) ama Somali PEN
srfs@telia.com
ama
awad_hersi@spray.se
Yacqub Aaden Cabdi 46 73 626 74 92
Cawad C/raxmaan Xirsi 46 73 938 33 41
Abdi-Mahdi Axmed Warsame 46 73 989 52 24
Afeef: Fikradda qoraalkan waxaa leh qoraaga ku
saxiixan