SomaliTalk DALSAN
w w w . S o m a l i T a l k . c o m
SOMALITALK - WARAR
WAX QAYBSIGII HARTI OO LA ISKU MARI LA YAHAY

Warbixintii: Ibraahim Maxameddeeq
SomaliTalk | Nairobi | imdeeq@yahoo.com

Iyadoo ay badiba qabiilooyinka Soomaaliyeed gudiga fududaynta IGAD u soo gudbiyeen liisaskii xildhibaanadooda balse aysan weli beesha Daaroodku ku guulaysan inay ilaa iyo hadda wax liis ah soo gudbiyaan ayeey beesha Harti weli isku maan dhaafsan tahay sidii ay tirada ka dhaxaysa u qaybsan lahaayeen. Waxaana fashilmay oo guul darro ku dhamaaday kulamo ay uga gol lahaayeen inay wax ku qaybsadaan, kaddib markii ay qolo waliba soo ban dhigtay tiro kuwo kale aysan ku raacsanayn oo ay doonayaan. Gudigii loo saaray inay wax soo qaybiyaan ayaa markay laba fadhi qaateen oo ku heshiin waayeen qoraal u gudbiyey Isimada iyo hogaamiyaaysha siyaasadda ee Harti oo ahaa marjica loogu talo galay in loo soo noqdo haddii hab qaybta la isku mari waayo, waxayna qoraalkooda ku caddeeyeen inay qaybinta tirada u maaro waayeen.

Waxyse arrintu cirka isku sii shareertay markii ay Isimadii iyo hogaamiyaashii siyaasaduna tiraba ku laba goor ku kala fogaadeen fekrado is diiddan oo ku saabsan sida ay qolo waliba u doonayso in wax loo qaybsado. Dhulbahantaha ayaa dalbaday (10) xubnood, Majeerteenka ayaa soo jeediyey inay doonayaan (14) xubnood, Warsangeliguna waxay sheegteen (7) xubnood, Dashiishe ayaa dalbaday (3) xubnood, halka ay beesha Kaski Qabena ka doonayso (1). Doodihii hore waxay socdaanba waxaa aakhirkii dhinacna loo dhaafi waayey Dhulbahante oo Sagaal fadhiistay, Warsangeli oo taagan (6), iyo Majeerteen oo (13) doonaya. Ergada Dhulbahante oo uu hogaaminayo Boqor Cabdillaahi Axmed Cali ayaa weli si xooggan ugu dhegan inaysan aqbali Karin tiro Sagaal ka yar. Garaad Cabdillaahi Cali Ciid oo ergada Waresangeli hogaanka u hayaana wuxu ka dhaqaaqi layahay lix, Gen. Cadde Muuse oo ergada Majeerteen wax qaybsiga u meteleyaana wuxuu doonayaa inuu tolkii Saddex iyo Toban u qaado. Boqor Cabdillaahi Axmed Cali oo aan kula kulmay hoteelka uu degan yahay ee Ambasadure Hotel iyo Garaad Cabdillaahi Cali Ciid ayaa labaduiba rejo wanaagsan ka muujiyey in lagu heshiin doono qaybsiga xildhibaanada harti ka dhexeeya.

Si kastaba ha ahaatee hab qaybtan oo ah tii ugu kululayd ee beelaha Harti dhex marta ayaa mar kale galabta shantii galabnimo la isugu soo noqday, si loo sii wado ka wada hadalka arrintaas oo ku soo aaddey xili uu gabaabsi yahay wejigii saddexaad ee shirka, isla markaana la filayo in 19ka bishan xafladdii dhaarta xildhibaanada lagu qabto xerada Mbagathi ee uu shirka dib u heshiisiinta Soomaalidu ka socdo, taas oo la filayo inay ka soo qayb geli doonaan wasiirada arrimaha dibedda ee urur goboleedka IGAD oo iyagu shirka Soomaalida iminka si toos ah u daadihinaya.

Ibraahim Maxameddeeq
Somali Talk
Nairobi
imdeeq@yahoo.com

Faafin: SomaliTalk.com | August 16, 2004

WARARKII HORE..
Dagaalo ay kudhinteen 20 Qof oo ka dhacay Degmada Ceeldheer
Magacyada xildhibaanada beelaha Digil iyo Mirifle...
Urur la magac baxay SOJTO oo Muqdisho lagaga dhawaaqay
Dadweynaha Reer Cadaado oo la kulmay Waftigii Xaqiiqo Raadinta
Carwadii SIMAD oo la soo gabagabeeyay
Dhammaan ka akhri halkan...

Kulaabo bogga hore ee www.somalitalk.com 

© www.SomaliTalk.com
All About Somalia and More..
.
 
Allah Is Great
Habnololeedkii saxaabadii Rasuulka ...


Qiimaha Dhulka & Qadarin La'aanta Soomaalida: Waa buug cusub ee yaan lagaa dhamaysane GUJI halkan...


kaah

Copyright © somalitalk.com. All rights reserved.

HTML CD