Saaxiibkeen/walaalkeen
Zenawi waa isagii safka hore ahaaye maxaa Safari Park Hotel looga arki
waayey
C/Waaxid C/hi Khaliif
London, UK
cabdulwaxid@hotmail.com
Ilaah baa mahadleh. Nabadgelyo iyo naxariis
Nabi Muxamed korkiisa ha ahaato.
Waan jeclahay maahmaahyaha iyo suugaanta
Soomaaliyeed laakiin madaxdooda (dagaal-oogayaasha) ma jecli. Murtida
Soomaalidu waxay waafaqday diintii iyo fidradii. Diintu waxay tiri dhulka
kiisa xun waxaan geedo xun ahayn ma soo saaro. Teeda kale bacaadka ma waxaan
booc-booc ahayn baad ka filaysaa? Carabtoon isku dhaqan dhownahayna waxay
dhahaan “hal talidu xayatun cusfuuraa” oo ah: abeesadu ma dhashaa shimbir?
Waa meesha Soomaalidu ka tiraahdo: hal booli ahi nirig xalaal ah ma dhasho.
Soow ma aragtid murtida Soomaalidu waa toos? Dagaal-oogayaal Nairobi jooga
baa iigu horraysay cid tiraahda Xabashidu waa walaalaheen ama saaxiibbadeen.
Haddaad siyaasi tahay waad dhihi kartaa waa deriskeen. Derisku wax kasta buu
noqon karaa.
Sidii hal-abuurkii (ma aqaan qofkii tiriyey
magaciisa) u lahaa: Guduudo-carwooy, gugii la arkaba, yaa gashaanti kaa
dhiga. Yaa maalin kasta shirsiiya dagaal-oogayaasha oo Museveni u keena si
ay gacmaha isu qabsadaan oo Soomaaliyeey toosoo u qaadaan. Waxaanan fahmin
in dagaal-oogayaashu nagu diganayaan iyo inaysanba fahmin heestaas
micnaheeda. Kollay digasho meesha kuma jirto oo shacabka Soomaaliyeed mar
horuu dhintay marka qofka lagu digtaa waa qof meeli u bannaantahay laakiin
meel digasho naga gasho ma leh. Sidaan mar hore u xusay, haddaan toosno oo
dadkeena taagta daran taageerno, waa ayo cidda inta tunka la qabto, sharciga
lala tiigsanayo oo xabsi loo taxaabayo haddaanba xabbad lagu tirin? Waa
iyaga marka waxay ku heesayaan ma yaqaanaan?
Dagaal-oogayaashii caanka ahaa oo gacmaha
is-haysta la arag! Boggaggii internetka oo nimankaas taageeri jiray
inkastoon gacantoodu is-gaarin laakiin qolo kasta gacanteedii bay afka
saaratay labo siyoodba:
1. Yaab baa kasoo haray oo waa u qaadan
la’yihiin labo qof ooy nooga dhigi jireen inaysan isu imaan karin oo
hadda kaftamaya.
2. Iyagoo garan la’ si ay wax u qoraan
ilayn dagaal-oogahooda kama hor-dhici karaane. Marka maaddaama
dagaal-oogayaashu galayaan waxaan anigu u aqaan isu-tiriis/isu-dhaamin (waa
wadal hadal caay, faan iyo wax la mid ah ah), kuwa wax u qoraana waxay
qaadanayaan fasax marka tobanka beri oo soo socota haddii Ilaah idmo ma
aqaan waxay qori doonaan. Waa u cidla’ saaxadu qofkii awal wax iskula
haray,. Marka hadalkii waa ka xirmay qorayaashii qabqablayaasha.
Marka gacmo haysashadu ma sidii Sangub u
yiri baa:
· salaan aan niyo ahayn gacmaha la isa
saaraayo?
· siday noqon?
Waxaan ku jawaabayaa seddex beyt oo Khaliif
Shiikh Maxamuud lahaa:
· Rabbigay wuxuu maamulaa malo ka xoog
weyne
· hadduu maago mirir bay biyuhu maran
lahaayeene
· mucjisooyinkiisiyo ha gelin meherad
kaa dheere.
Dhowrkaas beyt ee Khaliif waxaan uga
danleeyahay labo arrimood. Midi waa kama jawaabi karo waxa gacan-qaadka
dagaal-oogayaashu ku dambayn. Tan kalana waa gabyaagan oo laga soo bilaabo
1979 ilaa 1982 joogay dhulka Xabashida (Adisababa) ama Soomaali Galbeed.
Gabyaagan wuxuu mucaarad ku ahaa Maxamed Siyaad oo dadka intiisa badan waa
yaqaan, waxuu tirshay gabayo uu ku kicinayo qabiilooyinka Soomaaliyeed si ay
taliskii Maxamed Siyaad u ridaan. Iyadooy Xabashidu taageeri jirtay SSDF
iyagoo uga dan leh in Soomaalidu isku jabto haddana weli ma arag gabyaagaas
oo Xabashi ammaanaya. Gabayadiisa mar waxaa ku jirtay isagoo Maxamed Siyaad
u dan leh:
· Rabbi idanki goor dhow sidii Xayle
wuu go’ine.
Xeylaha uu sheegayo ma Xeyla Salaasaa mise
1977 buu ka hadlayaa oo Xeyle Maaryam buu haystaa? Anigu waxaan u qaatay
inuu Xeyle Salaaso haysto. Dhowr jeer baa rag gabyaa ahi ku eedeeyeen in
Khaliif iyo SSDF ay Xabashida calalada u dhaqaan laakiin marna Khaliif ma
oran Xabashidu waa walaalaheen ama saaxiibadeen sida dagaal-oogayaashu u
dhahaan. Xattaa Khaliif marna ma xusin darisnimo. Bal wuxuu xusay inay
Xabashidu gaalo yihiin, waxa uu meesha u joogana ay tahay halgan uu rabo
inuu Maxamed Siyaad shacabka uga xoreeyo. Ilaah baan idin ku dhaarshee arka
sida gabyaagaas oo Xabashi marti u ahaa uu isaga beri yeelay Amxaaro. Wuxuu
yiri:
· inaanan gaalka madiidin u ahayn
meelna uwada joogin
· ee aan ka maago siduu bahalku kuu
maalo
· mashaa’iikhda Eebbiyo Allaa ii
markhaatiyahe.
Bahalka wuxuu ka wadaa Maxamed Siyaad.
Akhristayaal Khaliif Shiikh Maxamuud iyo saraakiil ka tirsan SSDF oo uu ku
jiro ninkii watay ciidanka SSDF ayaa Xabashidu waxay ku dishay Galdogob
sanadkii 1982 iyagoo adeegsaday madfac taangi iyo qoryihiisa kale. Waxaa
dadka intiisa badan aamminsanyihiin inay Xabashidu u dileen arrimahaas la
xiriira gabayadiisa. Wey run sheegeen hal-abuuradii tiriyey heesihii ahaa:
· nin abeeso koriyoow adigaa u aayine
· axdi malaha Xabashidu lagu aamminaaye.
Sidoo kale waa tay dhaheen:
· Ninkii dilay walaalkeen
· Ina wuu noo dan leeyahay.
Soomaalidu waxay tiraahdaa jinni ninkii
keenaa bixiyee waxaan dagaal-oogayaasha weydiinayaa meeye walaalaheen ama
saaxiibadeen Itoobiya, Hotel Safari Park kama soo xaadirine?
Dagaal-oogayaashu way ku runsheegeen markay dhaheen Itoobiya safka hore bay
uga jirtaa shirkaas laakiin waa dhanka cadaawadda. Ninkii u qaba in Zenawi
saas ku harayoow mar kale feker. Horta in uu Zenawi xanaaqsanyahay oo sida
wax loo wado ka xunyahay waa muuqataa laakiin waxay ila tahay inuu
isleeyahay sida Soomaalidu u tiraahdo geel carruuri qaaday ma dheera ama
dhallaan qayladu waa qaboonada, ana (Zenawi) qayladu waa barqo iyo duhur.
Waa tee qolada uu Zenawi u arki karo inay yihiin carruur caga weyn? Ma
dagaal-oogayaashaa mise waa Musaveni iyo Musyoka? Inkastoon filayo inay
Soomaalida u arkaan inay qab-qablayaasha yihiin laakiin ogaada Zenawi waa
nin qabweyn oo qaaradda Afrikaba waxaan Xusni Mubaarak ahayn wax uma oga
xattaa Qadafi wax weyn umuu arko. Koonfur Afrika iyada Afrika laguma tirayo
oo siyaasadda waddanka waxaa gacanta ku haya caddaan.
Kaftankan yeysan dumarku run u qaadan. Nin
guurdoon ahaa ayaa nin kale weydiiyey dumarka tee ku fiican in la guursado?
Ninkii kale wuxuu yiri horta dumarku waa wada shar, marka markasta ood
sharka yaraysid baa fiican! Wuxuu ka wadaa kollay biyo kulul caga waad la
galaysaaye bal mid yar oo xoogaa ka sharyar fiiri. Waxay ku fiicantahay in
la yiraahdo shisheeye oo dhan waa shar badan yihiin marka hadday noqoto in
cid la soo dhowaysto waxaa la qaataa in kuwa dhibta yar la soo dhowaysto.
Hadday siyaasaddu nala gasho inaan Musaveni iyo Zenawi mid soo dhowaysano,
keen dooran lahayn? Waxay ila tahay inay caddahay cidda lasoo dhowaysanayo
waana arrintaas midda keentay in Soomaalidii oo dhami ay sii jaleecayso
shirkii 9/01/04. Musyokana waa ka sokeeyaa Zenawi marka loola kala baxo
kaftankaas dumarka loo isticmaalay. Marka dagaal-oogayaashu hanoo sheegeen
waxa ku dhacay Zenawi? Anigu waxaan Soomaalida khaasatan dagaal-oogayaasha
kula talin lahaa inay qaataan saarkii Carays Ciise Allaha u naxariistee oo
ahaa:
· wedeynimo kaama rabo
· waddankaas anaa iska leh
· aan kala weydaarannee
· waraaboow maalin wacan.
C/Waaxid C/hi Khaliif
London, UK
cabdulwaxid@hotmail.com
AFEEF: Aragtida qoraalkan waxaa leh qoraaga ku
saxiixan
Faafin: SomaliTalk.com |Jan 2, 2004
»C/waaxid
oo Dafiray Beel Degta Puntland
[DhegoCade]
QORAALADII HORE EE CABDULWAAXID
Wada-shaqayntu
Waa Furaha Guusha.. GUJI
|