SomaliTalk DALSAN
w w w . S o m a l i T a l k . c o m
SOMALITALK - WARAR

WARARKA SOOMAALIYA:

  • XUSEEN SIYAAD QOORGAAB: “Dabley shisheeye dalkayaga maya”

  • Arrin aad u fool xun oo ka dhacday Kismaayo

  • DAGAAL XALAY KA DHACAY MAGAALLADA KISMAANYO….

  • Siminnaar ku saabsan dib u heshiisiinta oo lagu soo gabagabeeyey xarunta  Resource Center..

  • General Morgan oo ay u yeertay dowladda Itoobiya…

WARAR KALE

  • QOWLAYSATA KA GANACSATA XUBNAHA CARRUURTA OO WAX LAGA NAXO KA SAMEEYAY DALKA AFGHANISTAN!

  • FADEEXAD LA SOO GUDBOONAATAY BOOLIISKA DALKA KUWAIT!!

  • DONALD RUMSFIELD “MAGACA BIN LADEN, MADAX XANUUN AYUU IGU RIDAY” 

 

Waxaa isku soo dubaridey
Amiin Yuusuf Khasaaro
E- Mail
amiinkhasaaro@hotmail.com
 

XUSEEN SIYAAD QOORGAAB: “Dabley shisheeye dalkayaga maya”

Xuseen Siyaad Qoorgaab oo ka mid ah siyaasiyiinta Soomaaliyeed ayaa warqad qoraal ah oo uu kaga hadlayo ciidammo shisheeye oo la damacsan yahay in la keeno dalka na soo gaarsiiyey, wuxuuna hadalkiisii ku bilaabay sidatan, “Baahida hub  ka dhigista Soomaaliya ma aha ciidan shisheeye ee waa dhismo dowlad loo dhan yahay, heshana dhaqaale lagu jiheeyo maleeshiyooyinka, laguna abaabulo hay’ado ammaanka Qaranka Soomaaliyeed, ciidammo shisheeye hub ka dhigis xoog ah kuma sameyn karaan Soomaaliya, waxaana caddeyn u ah guuldarradii ciidammada UNISOM, Afghanistan iyo Ciraaq, dhaqaalaha ku baxaya hal askari oo shisheeya ah waxa uu hubka ka dhigi karayaa laguna jiheyn karaa 30-wiil oo maleeshiyo Soomaali ah, qiyaastaas oo ah Askariga shisheeye waxaa Bishii ku bixi karta 3,000-Dollar, ninka Soomaaliga ahna waa 100-Dollar, haddii la keeno 20-kun oo Askari kharashka ku baxaya bishii oo u dhigma 60,000,000-Dollar waxaa lagu jiheyn karaa 600,000-Maleeshiyo ah, dhaqaalaha ku baxaya ciidammada shisheeye oo aan wax faa’iido ah u lahayn Soomaalida ayaa haddana lagu magacaabayaa dib u dhiska Soomaaliya sidii ku dhacday Afghanistan ama UNISOM/SOMALIA, waxaa ciidan shisheeye bur-burinaya hubka Soomaaliya yaalla ee malaayiin Dollar ku fadhiya, mana aqbali karno in hal Aake nalaga gubo mid kalena nalaga gado, hadhow waayo wiilka iyo qorigiisuba waa difaaca Mustaqbalka Soomaaliya, waxay halis ku yihiin ciidammada shisheeye madax bannaanida iyo kheyraadka Soomaaliya, waxaa ku soo gambanaya argagixisada caalamiga ah, waxay halis ku yihiin faragelin toos ah ama mid dadban, diinteenna Islaamka, gaar ahaan waxbarashada, waxaa iska hor imaan karaya maleeshiyada la maquuniyo iyo ciidammada shisheeye, waxaa la weynayaa kalsoonida shacabka, ugu dambeyntiina waxaa dowladaha daneeya arrimaha Soomaaliya ku wargelinayaa in ay xalka hub ka dhigista Soomaaliya aysan ku xirnayn ciidammo shisheeye ee la keeno, balse ay u baahan tahay dowlad”. 

Arrin aad u fool xun oo ka dhacday Kismaayo

Waxaa shalay subax dadweynaha ku nool magaallada Kismaayo ku soo baraarugeen meydka gabar taalla mid ka mid ah xaafadaha magaallada, gabadhaas oo loola dhaqmay si beni’aadannimada ka baxsan.

Gabadhan oo lagu magacaabi jirey Fartuun Aadan Hilowle ayaa jirkeeda waxaa ka muuqda dhaawacyo, iyadoo weliba goobihii dhaawaca ahaa looga shubay Basbaas, sidaana ay ka geeriyootay gabadhani.

Gabadhan ayaa waxaa dilay qoys ay u shaqeyneysay, kaddib markii lagu tuhmay in ay ka xadday faraanti Dahab ah, waxaana shalay magaallada Kismaayo ka dhacay bannaan-bax looga soo horjeeday falka lagula kacay gabadhaasi, waxaa kale oo cambaareeyey falkan hay’adaha xuquuqda Aadanaha ee ku sugan gudaha Kismaayo oo iyagu ku tilmaamay mid ka baxsan shareecada Islaamka, dhaqanka Soomaaliyeed iyo baaqa caalamiga ah ee xuquuqda Aadanaha.

DAGAAL XALAY KA DHACAY MAGAALLADA KISMAANYO….

Iyadoo waayadaanba xiisadi ay ka taagneyd dekedda magaallada Kismaayo ayaa haddana wararka naga soo gaaraya waxa ay sheegayaan in xalay dekeddaasi ay ka dheceen iska hor-imaad aad u ba’an oo la isku adeegsaday hubka culus iyo midka fudud, waxaana uu u dhexeeyey laba maleeshiyo oo ka wada tirsan isbahaysiga Dooxada Jubba, iyadoo la sheegay in ay labadoodu u dagaallamayaan gacan ku heynta dekeddaasi.

Waxaa la sheegay in laba qof ay ku dhinteen dhowr kalena ay ku dhaawacmeen, iyadoo doomihii iyo Maraakiibtii ku xirnaa dekeddaasi ay u carareen dhinaca Bad-weynta, iyagoo ka cabsi qaba in ay waxyeello ka soo gaarto rasaasta ay is weydaarsanayaan kooxaha maleeshiyada ah.

Siminnaar ku saabsan dib u heshiisiinta oo lagu soo gabagabeeyey xarunta  Resource Center..

Waxaa maalintii shalay ahayd xarunta Resource Center lagu soo gabagabeeyay siminnaar muddooyinkaanba halkaasi ka socday oo loo qabtay qaybaha kala duwan ee Bushada, waxaana soo qaban qaabiyay xoogga shaqo ee dib u heshiisiinta ee Hay’adda INXA, waxaana la isku weydaar-sanayay siminnaarkaan fikarado kala duwan oo la xiriira qaabka ugu habboon ee lagu wajahi karo dib u heshiisiinta Soomaaliyeed.

Siminnaarkaan oo uu furay madaxa barnaamijyada ee Hay’adda INXA Axmed Maxamed Cali Kiimiko ayaa waxa uu sheegay in siminnaarrada noocaan oo kale ah laga heli karo aaraa kala duwan oo xal u noqon kara dib u heshiisiinta Soomaaliyeed.

Waxaa kaloo halkaasi ka hadlay ku simaha xoogagga shaqo ee hay’adda INXA C/qaadir Khaliif Sheekh Yuusuf waxa uuna sheegay in siminnaarkaan ay ka qaybgaleen xooggooda odayaasha dhaqanka, culummaa’uddiinka iyo indheer garadka isagoo sheegay in ujeeddadu ay tahay sidii odayaasha dhaqanka looga heli lahaa fikrado, maadaama iyagu ay yihiin kuwo mar walba u taagan xal u helidda arrimaha Soomaaliya, wuxuuna sheegay in siminnaarkaan uu qayb ka ahaa siminnaaro ay qabteen xoogagga shaqo ee dib u heshiisiinta, kii hore wuxuu ahaa ka hortagga colaadaha, kii dhexena wuxuu ahaa dib u heshiisiinta, kan maantana waa dib u heshiisiin lala xiriiranayo dhaqanka.

Eng. Maxamed Cilmi Guure oo ka mid ah ka qaybgalayasha siminnaarkaan ayaa waxa uu sheegay in loo baahan yahay in odayaasha dhaqanku ay dadaal u galaan sidii nabad loogu soo dabbaali lahaa dalka, waxaana siminnaarkaan xiriirinayay oo casharo ka bixinayay C/naasir Axmed Cismaan.

General Morgan oo ay u yeertay dowladda Itoobiya…

Dhawaan ayaa General Maxamed Siciid Xirsi waxa uu ku gacan sayray codsi uga yimid dowladda Itoobiya, oo ahaa ka qaybgalka shirka dib u heshiisiinta Soomaaliyeed weji-giisa saddexaad, haddaba warar ina soo gaaray waxay sheega-yaan in Itoobiya ay u yeertay General Morgan, si ay uga dhaadhiciso sidii uu uga qaybgeli lahaa. Wararku waxay intaas ku darayaan in General Morgan uu soo jeediyay in wax laga beddelo qaar ka mid ah qodobbada dastuurka iyo weliba in xubnaha baarlamaanka ay soo xulaan hoggaamiyeyaasha siyaadda. Shirka dib u heshiisiinta Soomaaliyeed waxaa ka maqan hoggaamiyeyaal muhiim ah oo ay ka mid yihiin C/qaasim Salaad Xasan, Al-xaaji Muuse Suudi Yalaxow, Col. Barre Aadan Shire (Hiiraale), iyo siyaasiyiin kale.

WARARKA CAALAMKA KALE:

QOWLAYSATA KA GANACSATA XUBNAHA CARRUURTA OO WAX LAGA NAXO KA SAMEEYAY DALKA AFGHANISTAN!!!

 

Koox qowlaysato ah oo ka ganacsata xubnaha jirka Carruurta oo ka jirta dalka Afghanistan ayaa la sheegay in carruur fara badan ay gacantooda ku maqan tahay iyagoo aan u aabbo-yeelin nolosha carruurta. Ciidammada Booliiska ee dalka Afghanistan oo muddo dabo taagnaa kooxdaas qowlaysatada ah kaddib markii la soo gaarsiiyay laba carruur ah oo isla dhalatay oo ay kooxdaasi af-duubatay ayaa ku guulaystay in labadaasi cunug ay soo badbaadiyaan.

 

Inanka hore oo lagu magacaabo Ismaaciil oo 10-jir ah oo ka sheekeynayay wixii uu goobta la geeyay ku soo arkay ayaa hadal aad u hooseeya oo maqalkiisu yar yahay ku yiri: “Aniga iyo walaalkay  Ibraahiim (6-jir) ayay na kaxaysteen, waxayna na geeyeen meel buur ah oo aad u cabsi badan, waxaan ku soo arkay maydad fara badan oo carruur asaaggayga ah, dhammaantooda waxaa ka muuqda qalliinno lagu sameeyay oo muujinaya ina ay wax kala baxeen, maydadka badidooda lama aasin, intaa kaddib aniga iyo walaalkay mar kale ayay na sii kexeeyeen oo waxay na geeyeen meel ka sii fog buurtii aan maydadka ku soo arkay, waxaan meesha ugu tagnay carruur badan oo ila da’ ah, waxaana ii soo baxday in aan waqti badan sii noolaanayn, waana cabsanayay, waxaana laabtayda ka go’i waayay carruurtii sida xoolihii maydadkooda dhulka u yaalleen”.

 

Sarkaal ka tirsan ciidammada Sirdoonka dalka Afghanistan gaar ahaan gobollada koofureed oo lagu magacaabo Dr. C/llaahi Luqmaani ayaa xusay in ciidammada nabadgalyada ay heleen 4-mayd oo carruur ah oo mid ka mid ah laga helay gobolka Pangawi oo dhanka koonfur galbeed kaga aaddan Magaalada Qandahaar.

 

Luqmaan wuxuu intaa raaciyay inay hayaan macluumaad badan oo la xiriira kooxdaas qowlaysatada ah, isagoo sheegay inay heleen 5-carruur ah maydadkood oo madaxa laga wada gooyay, calooshana laga dillaaciyay, kilyahana laga saaray, sarkaalku wuxuu sheegay in kooxdaas ay kelyaha iyo xubnaha kaleba u dhoofiyaan dalka Pakistan oo looga sii iibsado iyagoo ka hela lacag culus, sarkaalku wuxuu kaloo xusay inay dabo taagan yihiin kooxdaasi isagoo tilmaamay in bilihii la soo dhaafay gobollada koofureed ee dalkaa laga waayay carruur fara badan.   

 

DONALD RUMSFIELD “MAGACA BIN LADEN, MADAX XANUUN AYUU IGU RIDAY” 

(Xaaskayga subax kasta waxay i su’aahaa halka uu ku nool yahay Bin Laden)

 

Wasiirka Gaashaan-dhigga ee Mareykanka ayaa wuxuu sheegay in Magaca Usame Bin Laden uu madax xanuun joogto ah ku rido maalin walba, “Xaaskayga subax walba marka aan soo kacno waxay igu tiraahdaa (Xaguu ku nool yahay UBL) oo ay ula jeeddo (Usame Binu Laden)”, wuxuu kaloo xusay in xaaskiisu ay mar kasta dabo-taagan tahay ogaanshaha halka uu ku sugan yahay Bin Laden oo ay Mareykanku u arkaan ninka ugu qatarsan waxa ay ugu yeeraan Argagaxisada. Ramsfield ayaana ciidammadiisa marna u sheegin jawaabta uu ka bixiyo subax walba su’aasha ay naagtiisu la dabo taagan tahay ee Madax xanuunka ku ridday ee ah xagguu ku nool yahay Bin Laden, wuxuu xusay in Pentagon-ka ay marnaba ka warqabin halka uu ku sugan yahay Bin Laden. “Bin Laden oo la soo qabtaa ma ahan arrin sahlan, dadka intiisa badan way raadinayaan, balse lama hayo” ayuu yiri Ramsfield oo intaa ku daray: “Haddii Mareykanku uu ogaan lahaa halka uu ku sugan yahay waaba soo xiri lahayn”.

 

FADEEXAD LA SOO GUDBOONAATAY BOOLIISKA DALKA KUWAIT!!


Saldhig ka mid ah saldhigyada booliiska ee magaalada Kuwait ayaa saddex ka mid ah ciidammada booliiska ee saldhiggaasi ay xadgudub ku sameeyeen naag u dhalatay dalka Philippine oo ka xoogasnaysay dalkooda. Mid ka mid ah saddexdaasi booliiska ah  oo magaciisa lagu soo gaabiyay (M.F) ayaa  saldhigga gudihiisa ku dhex kufsaday naagtaas iyadoo labada kalena ay gacan ku siiyeen. Safaaradda dalka Philippine ee dalka Kuwait  ayaa dacwad hordhigtay Maxkamadda sare ee dalka Kuwait, dacwadaasoo ku saabsanayd kufsigii loo gaystay Gabar u dhalatay dalka Philippine, taasoo keentay in saddexaasi nin ee booliiska ah la hor keeno maxkamad, iyagoo lagu eedeeyay in ay ka faa’iidaysteen awoodda ciidan ee ay lahaayeen. Labo ka mid ah saddexaan nin ayaa lagu eedeeyay inay gacan ku siiyeen (M.F) in uu saldhigga gudihiisa ku xoogo gabadhaa u dhalatay dalka Philippine oo lagu magacaabo Normina sharafteedana ay ku xadgudbeen. Normina ayay booliisku soo qabteen kaddib markii ay ka baxsatay guri ay ka ahayd Qaadimad, kuwaasoo saldhigga booliiska ku soo dacweeyay in ay ku tuhmayaan inay xoolo kala baxsatay. Garsoorihii difaacayay saddexda nin ee booliiska ah ayaa codsatay in saddexdaas nin oodda laga qaado laguna dhawaaqo inay wax dambi ah lahayn isagoo sabab uga dhiganaya dhowr arrimood oo kala ah in gabadha falka loo gaystay ay kala hadashay markii baarista lagu sameynayay, sidoo kalena ay safaaradda Philippine labo maalin dib ula soo dhacday dacwo ku soo oogista raggaasi booliiska ah.

W/D Amiin Yuusuf Khasaaro

E-Mai amiinkhasaaro@hotmail.com

Faafin: SomaliTalk.com | June 21, 2004

Habeenkii Ardayga Soomaaliyeed ee reer Malaysia
Xafladan oo loogu talagalay in lagu soo dhaweeyo ardayda sanadkan la aqbalay jaamacadaha Malaysia ayaa Guji June 21

Kulaabo bogga hore ee www.somalitalk.com 

© www.SomaliTalk.com
All About Somalia and More..
.
>> Usheeg Asxaabtaada
Allah Is Great
Habnololeedkii saxaabadii Rasuulka ...


Qiimaha Dhulka & Qadarin La'aanta Soomaalida: Waa buug cusub ee yaan lagaa dhamaysane GUJI halkan...


kaah

Copyright © somalitalk.com. All rights reserved.

HTML CD [an error occurred while processing this directive]