|
Dhibaatooyinka Bulshada Soomaaliyeed ee
Qurbaha iyo Xalka Islaamka (1)
Qaybta 1aad:
 Sh. Xasan Jaamici J.D, USA
xasanjaamici@yahoo.com
|
I I D H
E H
|
|
Intaan dhibaatooyinka na heysta iyo
xalkooda aanan u gelin waxaa haboon inaan si yara kooban aan uga hadlo laba
tiir oon aaminsanahay inay asal u yihiin xalalka aan soo hor dhigi doono
bulshada. Labada tiir waxay kala yihiin:
1)Fahamka Mabaadi'da Guud ee Islaamka iyo
2)Fahamka waaqaca aad ku nooshahay.
1.Fahamka Mabaadi'da Guud ee Islaamka
Qofka muslimka hadduu rabo inuu xal u
raadiyo dhib kasta ee na heysta muslimiin ahaan, waxaa hor imaanayo su'aal ah
xaggee buu u laabanayaa ee uu ka raadinayaa xalka dhibaatooyinka heysta shakhsi
ahaan ama bulshada guud ahaanteeda. Haddii si kale aan u dhigo waa inuu jiraa
ilo (sources) uu qofka kala soo bixi kara ee iftiimin kara xalka dhib kasta ee
jira.
Aayadda 59aad ee suuradda Al-nisaa waxaa
tilmaameysaa in Quraanka, Sunada Nabiga (NNK) iyo Culumada fasiraya ay yihiin
ilaha laga heli kara xalka dhib kasta ee soo waajiha muslimiinta meel weliba ha
joogeen. Haddaba naxriis Ilaahey xagiisa ka timid darteed ayaa qofka muslimka
waxaa loo soo dejiyey kitaab (Quran) iyo tafsiirkiisa (Sunada) Nabiga (NNK) kaa
soo noqonayo mabaadi'da guud ee uu ku salayn lahaa noloshiisa guud ahaan. Looma
baahna dad muslimiin ah amaba culumo kale inay fariistaan oo ay alifaan nidaam
cusub oo haga noloshooda, laakiin waxaa loo baahan yahay oo kaliya culumo
fahmaysa mabaadi'daasi Ilaahey soo dejiyey, isla markaana yaqaan qaabka waaqaca
ay ku nool yihiin u waafajin lahaayeen siduu Ilaahey rabo. Aayaddaa 38aad ee
suuradda Al-ancaam ayaa Ilaahey ku tilmaamay in wax weliba jawaabtooda Quraanka
laga helayo si toos ah ama si dadban (waa haddii macaanida Quraanka iy Sunnada
la dhuuxo, lana lafa guro ujeedooyinka Quraanka iyo Sunada loo soo dejiyey).
Taasi waxay tilmaamaysaa in qofka muslimka
marnaba u banaaneyn inuu xal ka raadiyo ilo aan Islaam aheyn marka laga hadlayo
xalinta arimaha adduunyada iyo aadamiga la xiriira. Taasi micnaheed ma ahan
inaan la kaashan karayn cilmiga sayniska hadduusan ka hor imaaneynin mabaadi'da
guud ee islaamka(sida ugxanta haweenta oo laga iibinayo haween ma dhalays waa
xaaraan). Waayo aayadda 7aad ee suuradda Al-anbiyaa, ayaa waxay tilmaameysaa in
la aado ilaha cilmiga oo dhan si loo ogaado gunta waxa la baarayo,! jawaabna
loogu helo su'aalaha dahsoon. Haddaba su'aashu waxaa tahay kumaad tahay
Mabaadi'da Islaamka? xaggeese lagaa helaa? yaa kaala soo bixi kara jawaabaha ay
ummaddu uu baahan tahay? waddadeese laguu maraa?
Akhri Qaybta 2aad... Guji
Qore: Sheekh Xasan Jaamici
(HASSAN Ali Mohamud)
Faafin: SomaliTalk.com | July 7, 2003
GALABTII "BARO XUQUUQDAADA" IYO SOOMAALIDA
MINNESOTA
http://somalitalk.com/usa/immgrnt.html
....
Copyright
& Islaamku wuxuu ka qabo.... Akhri
Kulaabo bogga hore ee
www.somalitalk.com
| 
