-
Annagoo matalayna Mawqifka
islamrkaasna ku hadlayna magaca beesha REER BICIDYAHAN { Cali Ibraahim} gaar
ahaanna jaaliyadaha Yurub, North America & Afrika, kaddib markaannu
yeelannay xiriir badan iyo wada tashiyo kala duwan dalkii iyo dibeddaba oo
dhex-maray bulshada isla beesha BICIDYAHAN ee ku dhaqan dalka gudihiisa iyo
dibeddiisaba:
-
Annagoo aad
uga damqanayna kana gubanayna colaaddii khasaaraha badani ka yimid ee ka
dhacday geyiga ama Gobollada Soomaaliyeed ee la isku yiraahdo PUNTLAND
iyo dhibkii kala gaarey dadka ehelkaa ee gobolladaas ku dhaqan oo lagu
waayey naf iyo maalba, wax kaloo badanba;
-
Annagoo og in
cawaaqibxumada colaaddan oo kale laga dhaxlaa, tii shalay iyo tan
maantaba, ay yihiin kuwa tafiir-xumo in
akaga
tegi kare tan iyo jiilasha dambbe(magac ahaan iyo mansab ahaanba) haddii
aan si taxaddar, indheergaradnimo, samir iyo isu-sarriigasho ku
dheehantahay loo dhammayn iyadoo wixii dhaawaca oo horay u dhacayna la
wada dhayanahayo;
-
Annagoo
garowsan inaan nabddu qaybsamin NABADANA dantennuna ku wada jirto oo
ninna nabad ku naalloon karin haddii ninka deriskaagaa oo dantiinnu isku
xirantahay gurigiisa uu colaad ku abaado;
-
Annagoo aad u
dareensan in mushkiladda weyn ee maanta gobollada Puntland lugta jiidday,
gadaalna uga dhigtay halkii ay horey u gaartay ama ay haatan higsanaysay
uu asalkeedu ahaa khilaaf siyaasdeed oo la xakamaynwaayey waqtigii ku
habboonaa, iyadoo uu jiro dareen ah in arrintu sii eersatay oo ay sii
cakireen gacmo ka baxsan dadka Gobolka oo danaynaya inay dhunto nabadda
iyo horumarka degaankaas ujeeddadoodu waxay rabto ha ahaato dhankay
rabaanna ha ka soo jeedeene;
-
Annagoo
xusuusan oo aad u qaddarinayna qiimaha dhabtaa oo ay leedahay
walaalnimada, nabad ku wada noolaanshaha iyo muhimadda is-garabsiga si
looga gudbo dhibaatooyinka waaweyn sida ee degaanka ka jira iyo
isku-kaalmaysiga horumarka dhinacyadiisa kala duwan ee bulshooyinka
degaanka iyo dantuba ka dhexeeyaan guud ahaan iyo, gaar ahaan, kuwa
xiriir hoose oo ehelnimo ka dhexeeyo sida bulshada reer Puntland;
-
Annagoo
tixgelinayna guud ahaan xaaladda maanta ka jirta dunida iyo gaar ahaan
tan geeska Afrika iyo Somaaliyaba oo shucuubtu ay ku taamayaan horumar
dhab ah iyo tartan xaddaaro ku salaysan kaasoo ka bilowda
unug-degaameedyada hoose (i.e. regional states) oo ay ka mid tahay
Puntland, kaasoo khasbaya tixgalinta dhaqankii wanaagsanaa ee
nabad-ku-wada-noolaanshaha ka sokow iskaashi aan loo kala maarmin laguna
kala tegi karin marna;
1. Waxaannu soo
jeedinaynaa BAAQ NABADEED oo ku waajahan dhammaan shacabka ku nool
gobollada Puntland: Waxaan ku baaqaybnaa in si deg-deg ah oo waarta loo
joojiyo fikir kasta oo colaadeed oo dambbe iyo fal kasta oo taas sabab u
noqon kara dhankuu rabo ha ka yimaadee iyadoo si gaara looga fogaanayo
tillabo kasta oo dhankaas noo dhaqaajin karta (provocation)
dhinac kastaba ha ka timaaddee;
2. Waxaan ugu baaqaynaa
kuna dhiirrigalinaynaa annagoo ku garabtaagan dhammaan Madaxda iyo
masuuliyiinta siyaasadeed, Hoggaammada dhaqanka iyo Isimada, culumada
diinta, saraakiisha ciidamada iyo cuqaasha, ganacsatada, aqoonyahanka
iyo urrurrada bulshada rayidkaa, ururrada haweenka, dhallinyarada iyo
dhammaan qaybaha kale ee bulshada iyo inta ay ku weyntahay DANTA UMMADDA
iyo NABAD KU WADA NOOLAANSHAHA in laga WADA SHAQEEYO iyadoo
isu-hagar-bax dheeri ah iyo isla-shaqayn dhab ah laga wada yeelanayo,
islamarkaasna fursad kasta oo la heli karo la siinayo sidii XAL KAMA
DAMBAYSA OO WAARA UNA WADA QALMA SHACABKA PUNTLAND loogu soo dabbaali
lahaa gobolka oo dadkiisu aad baahi ugu qabaan WAX KASTA oo aan ka ahyn
COLAAD AAN DHAMMAAN, KHILAAF, IS-BUR-BURIN (self-destruction) iyo
KALA IRDHOW;
3. Waxaannu ka
codsanaynaa dhammaan qaybaha kor ku xusan in ay la yimaadaan xilkasnimo
dheeri ah, dul-qaad dheeri ah, sabir dheeri ah, is-qaddarin,
isu-sarriigasho iyo in laga hormariyo wax kasta DANTA DADKA iyadoo meel
la iska dhigayo wax kasta oo QAB SIYAASDEED ah oo keeni kara in taas
laga durko. Waxaan soo jeedinaynaa inay cid kastaa MASUULIYADDEEDA ka
soo baxdo laguna tixgaliyo; Waxaa hubaal ah in cid kasta oo jiritaanka
iyoxuquuqda shacabka reer Puntland ku xadgudubta taariikhdu ay qori
doonto;
4. Waxaannu uga
tacsiyeynaynaa dhammaan ummadda reer Puntland dhibkii iyo khasaarihii ka
ay keentay colaaddii dhawaan ka dhacday isla geyigaas. Si gaar ah waxaan
ugu tacsiyeynaynaa ehelkii iyo qaraabadii intii halkaas ku nafweyday ama
ku naafowday;
5. Ugu dambayn waxaan
NABAD ugu baaqaynaa dhammaan shacabka soomaliyeed ee walaalahaa meel
kasta oo uu joogo annaga oo rajeynayna in aakhirtu sannadkani noqdo kii
Soomaaliya ay ka bixi lahayd bur-burka iyo meesha madow ee ay taariikhda
adduunka waayadaan dambe ka gashay, heshana Dawlad u qalanta Umadda
Soomaaliyeed oo caadila.
