Madaxwaynaha Dalka Kenya Danial Arab Moi oo shir gudoominaya shirka dib u
heshiisiinta soomaalida ee maanta ka furmay magaalada Eldoret ayaa isagu furay
shirkaasi waxaana uu ugu baaqay hogaamiyayaasha iyo wufuuda ka qayb galaya
shirka dib u heshiisiinta inay fahan iyo xilkasnimo layimaadaan si ay uga mira
dhaliyaan ujeedooyinka dib u heshiisiineed oo taladiisa ay umadda soomaaliyeed
leedahay.
Moi waxaa uu sheegay in dalalka IGAD iyo beesha caalamkauba ay gacan
kusiinayaan meel marinta go’aanada ay ergooyinka ku gaaraan shirkaas oo ay
kasoo qayb galeen Madaxwaynayaasha IGAD.
Moi wuxuu tilmaamay in kumanaan dad soomaaliyeed ah ay qabaan dhibaatooyin
isugu jira macluul , amaan darro iyo nolosha adag ee qaxootinimada iyadoo dalka
kenyana uu kujiro dalalka soo dhoweeyay qaxootiga soomaaliyeed kuwaasi oo lagu
qiyaaso ilaa 300’000 oo qaxooti soomaaliyeed kuwaasi oo kujira xeroouinka
qaxootiga ee dhadhaab iyo kaakuma.
Madaxwaynuhu waxaa uu sheegay in hogaamiyayaasha soomaalida looga baahanyahay
inay wax walba ka hor mariyaan danta guud oo qaran loo dhanyahay ay soomaalidu
dib u hesho.
Wufuuda ka kala socota beesha caalamka iyo ergooyinka bulshada soomaaliyeed
ayaa si rasmi ah shirkii dib u heshiisiinta manta uuga furmay magaalada Eldoret
oo 320km dhanka galbeedka kaga taala magaalada Nairobi.
Wariyaha idaacada IQRA Khadija Mayoow oo iminka kusugan goobta shirku uu ka
dhacayo ayaa kusoo waramaysa in jawiga shirkaas uu ku bilawday si dagan isla
markaana ay tahay goob aad loo qurxiyay.
Ilaa iyo hadda waxaa shirkaasi soo gaaray ergooyinka Puntland oo uu
hogaaminayo madaxwaynaha maamulkaas Col. Cabdulaahi Yuusuf Axmed , Gudoomiyaha
Baarlamaanka dawlda Kumeel Gaarka Cabdalla Derrow Isaq, Ra’izul wasaaraha DKM
Xasan Abshir Faarax, Ergooyin ka socda Ururka RRA, Dawxada Jubba , Xubno ka
tirsan SRRCda, Ergooyin uu Hogaaminayo maamulka Jawhar Maxamed Dheere.
Waxaa ilaa iyo haatan Shirkaasi aan ka qayb galin qaar kamid ah hogaamiya
kooxeedyada soomaaliyeed.
Furitaanka munaasabadaas waxaa ka qayb galay Diblomaasiyiin sar sare oo ka
tirsan Safaarada Maraykanka, Ingiriiska , Faransiiska, Talyaaniga iyo Masaarida.
