W/D: Faarax Maxamed Cali (Mr. Blue).
E-mail: farahblue_545@hotmail.com 

 

Qaybtii 5-aad:

Magiciisu waa Franze Beckenbauer, waxa uu ku dhashay waddanka Germany 11-kii September 1945-kii, wuxuuna u dhashay isla waddanka Germany, Beckenbauer waxa uu xulka qaranka waddankiisa u ciyaarayay muddo 10-sano ah, waxa uuna ku guuleystay abaalmarinno fara badan oo isugu jira Dahab, Qallin iyo Macdan, maxaa yeelay waxa uu ahaa Daaficii ugu wanaagsanaa adduunka ee qarnigii 20’aad iyo weliba waddanka Jarmalka.

Beckenbauer waxa uu xulkiisa kala qayb qaatay saddex Koob Adduun oo kala ahaa 1966-kii Koobkii lagu qabtay waddanka England oo isla xulka England ay 4-2 ugu awood sheegteen xulkii West Germany oo xilligaasi daafac uga ciyaarayay Franze Beckenbauer.         Sidoo kale waxa uu ka qayb galay Beckenbauer 1970-kii Koobkii Adduunka ee isna lagu qabtay waddanka Mexico, kaasoo xulka Brazil ay 4-1 uga qaadeen xulka Italia, iyo weliba kii ugu dambeeyey ee 1974-kii Koobkii Adduunka ee lagu qabtay West Ge rmany oo isla xulka West Germany uu ku guuleystay, kaddib markii 2-1 ay uga qaadeen waddanka Holland, isagoo markaasina West Germany uu daafac uga ciyaarayay Franze Beckenbauer.

Franze Beckenbauer waxa uu ahaa nin deggan marka uu banooniga helana ku adkeysan jirey in uu fiiro dheer u yeesho saaxiibadiisa kale ee ka dhinac ciyaarayay, waxaana xilliyadii uu ciyaarayay uu noqday kuwo ay la yaabeen weeraryahannadii Europe ee qarnigaasi.

Beckenbauer waxa uu ku guuleystay in uu noqdo macallinkii xulka Germany, isagoo u qaaday kaddib markii u qaaday Koobkii Adduunka ee 1990-kii lagu qabtay waddanka Italia, iyagoo 1-0, ku suuldaaray Xulka Qaranka Argentina.  Beckenbauer waxa uu naadiga Bayer Munich ku soo biiray isaga oo 18-jir ah, waxanaa uu kula guuleystay illaa iyo 27-Koob, waxaana loo magacaabay ciyaaryahankii ugu fiicnaa waddanka Germany 1966-kii, waana xilligaasi xilligii uu 4-gool ka dhaliyey Koobkii Adduunka ee 1966-kii, isagoo lugtiisana ugu saamaxay in West Germany ay timaaddo Final-ka Koobkii Adduunka ee 1966-kii.

Dad badan ayaa aminsanaa in Franze Beckenbauer uu yahay ciyaaryahan halyey ah, iyagoo u bixiyey magacyo ay ka mid ahaayeen “The Kaiser”, wuxuuna ahaa ciyaaryahan ku nuux-nuuxsan jirey booskiisa, isagoo soo marin kursiga keydka.          Sidoo kale xulka Germany ayuu taariikh kula reebay markii 1974-kii ay ciyaar quarter Final ah isaga hor yimaadeen xulkii Qaranka Ingiriiska, kaddibna halkaasi wacdaro uu ka dhigay isaga iyo saaxiibadiisii xilligaasi. Beckenbauer sanadihii 1971-kii iyo 1976-kii loo magacaabay (Best player of the year) Ciyaaryahanka sanadka ee Q/Yurub.

Franze Beckenbauer waxaa aad u jeclaa taageerayaal fara badan oo u dhashay waddanka Jarmalka, iyagoo ku faani jirey marka uu garoonka soo galo, waxa uuna saftay 18-kulan oo Koob Adduun ah, isagoo dhaliyeyna 5-gool, waxa uu haatan ku nool yahay waddankiisa Germany, waana ciyaaryahan haatan aad looga tixgeliyo guud ahaan isboortiga waddanka Jarmalka iyo caalamka.

Beckenbauer haatan waxa uu ku sugan yahay waddanka Portugal oo si habsami leh uga socdo Koobka Qarammada Yurub ee sanadkan, waxaana uu u soo daawasho tagaa kulammada ciyaareed ee xulka Qaranka Jarmalka iyo kooxaha waaweyn ee ka dhisan Jarmalka, sida Bayer Munich, isagoo dhiirrigelin iyo la talis siiya ciyaartoyda xulalka Jarmalka iyo Bayer Munich. 

W/D: Faarax Maxamed Cali (Mr. Blue).
E-mail: farahblue_545@hotmail.com