DHEGEYSI: Dhegeyso Warka Radio Xoriyo
Barnamujka caawa Radio Xoriyo ka baxaya waxuu ka koobanyahay.
. JWXO oo xukuumadda Addis Ababa ku
canbaaraysa arrimaha abaaraha.
.Roobkii Dayrta oo ka da’ay gobollo Ogadenya ka mid ah.
.Agaasime sare oo ka tirsanaa wasaarada ganacsiga Itoobiya oo baxsaday.
.Meles Zenawi oo guryo ka gatay magaalada New York.
.Xafiisyo uu Kililka Oromadu Addis Ababa ku lahaa oo laga raray.
.Abaaro fara ba’an ku haya gobolka Sool ee dalka Soomaaliya.
.Maqaal dheer oo aanu kaga hadlayno dhibaatada gumaysiga iyo waliba suugaan
halgameed.
Jabhadda Waddaniga Xoraynta Ogadenya JWXO ayaa xukuumadda Itoobiya ku eedaysay
inay cunnada mucaawanada ah u adeegsato hub ay kaga hortegto xoogagga ay
siyaasada isku diiddan yihiin ee Ogadenya, sidaas waxaa lagu sheegay bayaan ay
Jabhaddu talaadadii soo saartay.
Bayaankan waxay Jabhaddu kaga hadlaysay
dhibaatada ba’ an ee dadwaynaha Ogadenya ka soo gaadhay roobka Dayrta oo aan ka
di’in gobollo badan oo Ogadenya ka mid ah, qaar kalana si wayn uga soo dib
dhacay.
Bayaankaas waxaa lagu sheegay in xukuumadda
Addis Ababa ay diiday inay joojiso xayiraadda ay ku hayso hay’adaha warbaahinta
oo ay u diidday inay Ogadenya galaan, si ay beesha caalamka ugu soo tebiyaan
dhibaatada Ogadenya ka jirta inta ay dhan tahay.
Waxaa kaloo bayaankaas lagu sheegay in
ciidammada gumaysiga Itoobiya ay wali sii wadaan la wareegidda hantida
dadwaynaha, taasoo sii kordhisay dhibaatada macaluusha ah ee dadwaynaha haysa,
iyo iyadoo ciimmada gumaysiga Itoobiya ay joojiyeen gabi ahaanba xidhiidhkii
ganacsi ee u dhexeeyay Ogadenya iyo Soomaaliya.
Bayaankan waxaa lagu sheegay in xukuumadda
Itoobiya ayna rabin, isla markaana ayna awood u lahayn inay soo bandhigto
dhibaatada Ogadenya ka jirta.
Sidaas darteed waxay Jabhadda Waddaniga
Xoraynta Ogadenya beesha caalamka ugu baaqday inay kaalmada si toos ah ugu
dhiibaan ururrada aan xukuumiga ahayn ee hadda Ogadenya ka hawl-gala, isla
markaasna ayna xukuumadda Addis Ababa gacanta u gelinin kaalmooyinka ay
bixinayaan.
Waxay kaloo Jabhaddu beesha caalamka ugu
baaqday inay cadaadis saaraan xukuumadda Addis Ababa, si ay ciidammadeeda uga
qaaddo marinada muhiimka u ah ganacsiga u dhexeeya Ogadenya iyo Soomaaliya.
Jabhadda Waddaniga Xoraynta Ogadenya waxay
ururrada aan xukuumiga ahayn ee Ogadenya ka shaqeeya ku adkaysay inay tegaan
goobaha ay baahidu ka jirto oo dhan, isla markaana ay si toos ah ula shaqeeyaan
Jabhadda Waddaniga Xoraynta Ogadenya, si ay hawlohooda ugu sahasho.
Roobkii Dayrta oo ka da’ay gobollo Ogadenya ka
mid ah.
Waxaa gobollo badan oo dalka Ogadenya ka mid ah
ka da’ay roobkii Dayrta oo in muddo ahba la saadaalinayay, isla markaana dib uga
dhacay xilligiisii caadiga ahaa. Gobollada uu hadda roobku ka da’ay waxaa ka mid
ah gobollada Qorraxey iyo Doollo iyo nawaaxiga magaalooyinka Godey iyo Shilaabo.
Gobolka Dhegaxbuur ayaa isagana la filayaa in raxmaddaasi ay gaadhay.
Hay’adaha caalamiga ah ayaa dhawaan si wayn uga
dhawaaqay dhibaatada dalka Ogadenya uga imaan karta roobka Dayrta ee xilligiisii
ka dib dhacay, waxaanuu dhawaaqaasi ka denbeeyay, ka dib markii toddobo gobol oo
ka mid ah gobollada Ogadenya, oo sagaal ka kooban, uu roobku ka soo dib dhacay.
Sidaas darteed waxaa laga cabsi qabay inay ka
dhacdo macaluul ba’an oo la mid ah middii seddex sano ka hor ka dhacday, waxayna
hay’adahaasi dunida ugu baaqeen in dhibaatadaas laga hortego.
Dhinaca kale markii ay taariikhdu ahayd
16/11/03, waxaa tuulada Toon-ceeley, oo ka tirsan degmada Qabridaharre, soo
weeraray cutubyo ka tirsan ciidamada gumaysiga Itoobiya,
Waxayna halkaas ku dileen 13 ruux oo shacbi ah,
qaar kalana way dhaaweceen.
Waxaa ka mid ah dadka ay halkaas ciidammada
gumaysigu ku dileen, inta ay magacyadoodu na soo gaadheen:
Cabdulaahi Cumar Gar-daran.
Dadka halkaas ku dhaawacmayna waxaa
magacyadooda ka mid ah:
- 1- Cabdi Cali Ahmed.
- 2- Xakiim Muxumed Magan.
- 3- Cabdi Raxmaan…..
- 4- Ciwal Biixi Buraale.
- 5- Axmed iyo Dayib oo magacyadooda oo buuxa
aanaan haynin.
Waxay ciidammada gumaysigu boobeen wixii hanti
ahaa ee tuuladaas taallay.
Agaasime sare oo ka tirsanaa wasaarada
ganacsiga Itoobiya oo baxsaday.
Wariyaha Wakaalada Wararka Ogadenya u jooga
magaalda Addis Ababa ayaa sheegaya inuu dalka ka baxsaday nin agaasime sare ka
ahaa wasaarada ganacsiga ee
Itoobiya, kaasoo lagu magacaabo Gisaw Mola,
wuxuuna magangelyo siyaasadeed waydiistay dalka Maraykanka.
Gisaw Mola wuxuu dhawaan ka qayb galay shir
wayn oo lagu qaadaa-dhigayay xidhiidhka ganacsi ee Itoobiya ay la leedahay
dunida inteeda kale, kaasoo lagu qabtay dalka Switzerland.
Dhinaca kalana wararka ka imanaya isla
magaalada Addis Ababa ayaa sheegaya in xilkeedii laga qaadayo wasiirka
waxbarashada Genet Zewdhe, oo xilkan muddo dheer haysay, waxaana caydhinteeda
lala xidhiidhiyay arrimo siyaasadeed.
Meles Zenawi oo guryo ka gatay magaalada New
York.
Wararka naga soo gaadhaya nmagaalada Washington ayaa sheegaya in xaaska Meles
Zenawi, Azeb Golla ay labo guri oo waawayn ka gadatay xaafadda Sutton, oo ah
xaafad ay dadka maal-qabeenka ahi degaan oo ku taalla magaalada New York ee
carriga Maraykanka.
Wararku waxay intaas ku darayaan in Azeb Golla
ay muddo seddex toddobaad ah dagganayd Hotel Hyatt, oo ah huteellada ugu
qaalisan waddanka Marykanka, iyadoo habayn walba ku bixinaysay 3000 oo Dollar.
Dadka indha-indheeya siyaasada Itoobiya ayaa
rumaysan in Meles Zenawi uu hayo waddadii Mingisto Xayle Maryam, oo guryo iyo
beero waawayn ka gatay dalka Zimbabwe intii aan talada dalka Itoobiya laga
fara-maroojinin, kuwaasoo uu ilaa iyo hadda ku nool yahay, waxayna dadkaasi
qabaan in Meles Zenawi uu hadda isaguna sii diyaarsanayo meeshii uu ku denbayn
lahaa marka talada laga qaado.
Dalka ayaa lagu tilmaama dalalka dunida ugu
gaajo badan, waxayna dunidu khadyaan ka taagan tahay qayla-dhaamaha dhinaca
macaluusha ku saabsan ee maalin walba laga soo tebinayo Itoobiya, balse waxay
madax ku-sheegga Itoobiya lacago badan u isticmaalaan danohooda gaarka ah,
iyagoo haba yaraatee wax tixgelin ah siinin baahida dadkooda haysa.
Xafiisyo uu Kililka Oromadu Addis Ababa ku
lahaa oo laga raray.
Wariyaha Wakaalada Wararka Ogadenya u jooga
magaalada Addis Ababa ayaa sheegaya in 15 xafiis oo Kilika Oromadu uu ku lahaa
magaalada Addis Ababa lagu amray inay u guuraan magaalada Adhama, oo horay loo
odhan jiray Nezirat.
Warar lagu kalsoon yahay ayaa sheegaya in
amarkan lama filaanka ah ee xafiisyada lagu rarayo uu jimcihii ka soo baxay
xafiiska keligii taliye Meles Zenawi, waxaana loo qabtay muddo 15 maalmood ah
inay ku guuraan. Arrintani waxay kediso iyo argagax ku ridday madaxdii
xafiisyadaas, oon hadda ka hor waxba lala socodsiinin.
Nin aan rabin in magaciisa la sheego oo ka
tirsan madaxda Kilika Oromada ayaa yidhi ”Arintani aad ayay la yaab u tahay, dad
badanina dhibaato ayay kala kulmi doonaan, sababtoo ah waxaa dugsiyada iyo iyo
kulliyadaha u dhigta carruur ayna suuragal ahayn in laga raro”.
Xukuumadda Addis Ababa ma ayna sheegin sababta
xafiisyada magaalada Addis Ababa looga rarayo, hase yeeshee dadka arrimahan
indha-indheeya ayaa sheegaya inay qayb ka tahay mashruuc ay xukuumaddu kaga
fogaynayso awoodda iyo faraha qawomiyada Oromada ah magaalada Addis Ababa.
Abaaro fara ba’an ku haya gobolka Sool ee dalka
Soomaaliya.
Barnaamijka Cunnada Adduunka WFP ayaa deeq
bixiyayaasha ugu baaqay inay ka hortegaan dhibaatada cuslus ee ku food-leh
gobolka Sool ee dalka Soomaaliya.
Bayaan uu talaadadii soo saaray wakiilka
Barnaamijka Cunnada Adduunku Soomaaliya u qaabilsan Robert Hauser, waxaa lagu
sheegay gobolkaas ay abaaro ba’ani ka jirin muddo dheer, taasoo keentay in
ilihii biyaha oo dhami ay qallalaan. WFP wuxuu bayaankiisa ku sheegay inuu ku
jiro hawlo ballaadhan oo uu wax kaga qabanayo dhibaatada abaartan, oo ah
abaartii ugu xumayd ee gobolka soo marta, tan iyo sannadkii 1981.
“Waxaan u baahanahay tallaabo degdeg ah qaadno,
si ay aan uga hortegno macaluusha sii fidaysa oo aan u baajino masiibo xun oo
nawaaxigaas ka dhacda”, sidaas waxaa yidhi Robert Hauser, oo tilmaamay in
qiyaastii 60,000 oo qof ay cunto la’aani hayso.
Barnaamijka Cunnada Adduunku wuxuu sheegay inuu
u baahan yahay qiyaastii 6.5 milyan oo dollar, si uu dadka macaluushu hayso ugu
soo gado 8,600 oo tan oo cunno ah.
FAALLO: Dareenka
Runta ah Dubbuhu Ma Hor-Joogsan Karo
28.11.003
Ahmed Gaal´ eri
Radio Xoriyo
raadioxoriyo@yahoo.com
radioxoriyo@ogaden.com
Radio Xoriyo waxaad ka dhegaysan kartaa Mawjadda 19 MB ee dhererkeedu yahay
15670 KHZ, Maalmaha Talaadada iyo Jimcaha! 7: 30PM waqtiga Afrikada Bari
....
Copyright
& Islaamku wuxuu ka qabo.... Akhri
Kulaabo bogga hore ee
www.somalitalk.com
Dhegeyso
warkan oo Cod ah
...HALKAN KA BAAR WARARKII HORE EE XORIYO
....KAYDKA WARARKA
RADIO XORIYO - NEWS ARCHIVE
AFEEF: Afkaarta qoraalkaan waxaa leh gaarna ay u tahay Radio Xoriyo, kana tarjumimaayo aragtida SomaliTalk
|