!!!!MABA AADAN DHALANE DHOWRSAN OKIDAA? !!!!

Jabarti Osman
Jabarti2020@hotmail.com

Daabaco Boggan | Print Filimada anshaxa xun, ruugidda Qaadka iyo isticmaalka Daroogadu Saamayn intee le'eg Bay ku Leeyihiin Faafidda Cudurka AIDSKA ee Soomaaliya.. Guji... XAMAR DAAWO DACALLADA.. SAWIRRO

Waxaan mudo aan sidaa u sii fogay ku soo bandhigay shaashadaha internet-yada Afka Soomaaliga lagu qoro maqaal aan kaga hadlayay shirka ka socda Nairobi. Maqaalkaas waxaan kaga hadlay arimo badan oo ku saabsan bilowgii shirka, habsocodkiisa, caqabooyinka kala duwanaa ee soo wajahayay had iyo goor, wax yaalaha burburinkara, iyo waxyaalaha sababi kara inuu guulaysto. Hadaba waxaan aad ulayaabanahay eray ka mid ahaa odoraskaygii oo aad moodid inuu durba soo ifbaxay, kaasoo ahaa, tolow dhunkashada Nairabi ka dhacday ma tii Caydiid iyo Cali Mahdi bay noqon, Soomaaliyay toosuduna ma tii Carte ayay inana noqon, marka waxaad moodaa madashii oo aanba lagu kala kicin, gogoshii oo aanba la laabin, xaajadii oo aanba la gaba-gabayn in labadiiba soo rumoobeen, oo ilayn Soomaalidu waxay tiraahdaa “Tuugaas lax ma ka dhaarsan lahayd” Sidoo kale waxay yiraahdaan “Nimaad taqaanid yaa tahay lama yiraahdo” war ilayn nimanku waa nimankii, aaway dhunkashadii Cabdulahi Yusuf iyo Muse Suudi, Aaway Soomaaliyay toosadii Cabdiqasim, Qanyare, Ina Caydiid, Cabdulahi Yusuf , Shaati Guduud, Moorgan iyo mowliid macaane, aaway gacma is qabsigii iyo baroortii (oohintii) iyo is bihin bihintii iwm.

Sowtan durba xulafooyin cusub samaysmeen, sowtan durba kooxo isku xulafo ahaa kala jabayaan, sowtan durba wixii la saxiixan laadka lagu dhuftay, sowtan durba qodobo iyo qoraalo aan la isku ogayn la isku camaynayo. Aaway Dowlad baanu dhisidii, aaway Sheekadii ahayd Shacabkayagaanu u tanaasulaynaadii.

Waxaa kale oo iyana soo ifbaxayday odoros kale oo aan hore u soo sheegay oo ahaa faragelin shisheeye inaysan meesha ka marnayn, sida Itoobiya, Carabaha, Iyo Maraykankuba, sidoo kale waxaaba daba maroojis bilaabay Kenya oo maadaama ay ku fashilantay inay ajandaheedii ugaarka ahaa ku fushato shirka durba bilowday daba maroojis iyadoo ka masayrsan Ugaandha , diidana in la yiraahdo wax Kenya ku guulaysan wayday ayaa Uganda ka mira keentay oo guul ku dhamaysan.

Hadaba akhristow ma dhabaa waxa ay reer SRRC ka caraysantahay, mise Itoobiyaa meesha ku jirtoo tiri burburiya shirka sida shaashado internetka ka mid ahi soo qoreen.

Waa marka koowaade waa run in Itoobiya ay ulajeedooyin dhow iyo kuwo dheerba ka leedahay Soomaaliya, sidoo kale waa run in ay isku dayayso inay ajandaheeda ka dhexfuliso madasha shirka iyadoo adeegsanaysa hadba ninka u dhaga’nugul mabda’ooda. Hadaba su’aasha kale oo iswaydiinta u baahani waxay tahay “ma Itoobiya oo qudha ayaa qasaysa shirka mise dowlado kale oo badan ayaa iyaguna fidmada wax ku leh oo doonaya inay ka dhexfuliyaan mabdayadooda iyo danahooda gaarka ah ee soomaaliya ay ka leeyihiin iyagoo adeegsanaya raga ay gacansaarada la leeyihiin kuna fushan karaan mabaadidoodaas?) Su’aashaa jawaabteeda oo gaabani waa HAA oo way jiraan dowlado kale oo dabka waxka hurinaya sida Kenya, Masar, Maraykanka iyo Ugaandha qudheeda.

Laakiin waxaan oran karaa waa been in ay Itoobiya ka danbeeyaan xirgifta cusub ee shirka soo kala dhexgashay, haa oo way jiraan qaar ka mid ah SRRC oo ay si toosa u gacansaar ula leedahay, kuna fushato mabdayadeeda, laakiin khilaafka cusubi wuxuu ka dhashay arin aad xasaasi u ah oo markii hore sidii lagu heshiiyay iyo nuqulkii danbe wixii ku qornaa is khilaafeen taa soo kala ah:

Heshiiskii ama qorshihii la isku ogaa ee hore wuxuu ahaa in shaqsiyaadka dagaal abaabulayaasha, qolyaha shacabka iyo maamulada isugu jira ee shirkii hore saxiixay ee 24 xubnood iyo Isimada ahaa ay soo xulaan Golaha cusub ee Baarlamaanka iyagoo ku salaynaya hab qaybsigii ahaa 4.5. Afar waaxood iyo badh.

Laakiin waxaa lagu soo daray inay habqabsiga wax ku yeeshaan koox cusub oo shirku intuu socday magaca cusub la baxday walow ay afraad ahaan ku jireen shirka inkastoo qaarkood aysan awood saasa oo muuqata ku dhexlahayn shirka maadaama aan loo arkayn dad la siin karo darajooyinka sadexda ah ee kor ku xusan, sidaa awgeedkana saxiixii hore kama aysan mid ahayn. Qoladaasina waa xubno ka tirsan kooxda Balcad ku shirtay ee Samatabixinta la baxday.

Qodobkaa hadii sida cusub loo daayona waxaad moodaa in ay awooda miisaankii habqabsi siin doonto Carte iyo Xulafadooda Cusub ee Samatabixinta , taasina ma farxad gelin doonto qolada awel shirka joogtay ee u badan SRRC –da iyo xulafadooda sida Xasan abshir , deerow, mowliid macaane, qanyare iwm.

Dhinac kale hadii laga eego habka cusub wuxuu ka cadhaysiiyay dad badan oo ka mid ah Daarood, Digil iyo Mirif, Iyo qolyaha laga badan yahay maxaa yeelay , waxaa miisaankii u batay dhinaca Hawiye, maadaama ay marka la eego Dagaal Abaabulayaasha meesha ku jira ugu badan yihiin, xamar oo qudha oo halmagaalo ah iyo Soomaaliya inteeda kale Dagaal abaabulayaasha iyo Maamuleed Goboleedyada marka la isku darona ay weli badan yihiin qolyaha Muqdisho oo kuligood ah Hawiye soocan , taasina ma aha mid u cuntami karta Qabiilada Daarood, digil iyo Mirif, Iyo Qolyaha iyo Qabiilooyinka laga badan yahay.

Arintani marka ma aha mid sahlan ee waa arin aasaasi ah una baahan in xal waafi ah loo helo, waa arin u baahan in miisaanka waxqabsi la ilaaliyo, waa mid u baahan in xulafooyinka kala duwan ee siyaasada ku hardamaya si taxader leh oo misaaman wax loogu qaybiyo. Waa arin aysan fahmi Karin qolyaha shirka maamulkiisa haya laakiin waxaa lagama maarmaan ah inay fahmaan dareenka ka dhalan kara arintaan waa hadii ay isku dayaan inay qolyaha ka biyadiidan ku dirqiyaane.

Waxaaa kale oo xusin mudan in arintii ahayd 4.5 weli meesheeda tahay laakiin waxa la isku hayaa waa yaa soo xulaya Xubnaha Golaha Cusub ee Baarlamaanka. Taasi waxay ka caraysiisay rag badan oo SRRC ah oo u arka dad ku jira Xulafada Cusubi inay yihiin rag aan matali Karin dadkooda, kuna dhexhaysan cod iyo taageero midna, sidaa awgeed su’aashu waa yaa fariisan doona baarlamaanka mar rag u hadli kara dadkooda, ka talin kara danta guud ee dadkooda, matali karaa, cod ka haystaa, hadaan si kale u dhigo ma rag kalsooni lagu qabi karaa oo istaahila inay fariistaan kursiga Baarlamaanka ama xataa u qalma inay wax soo xuli karaan, mise waa caale qaatayaan lagu adeegto oo aan hunguri mooyee mabda iyo mowqif midna lahaynbaa, yaase la siin doonaa soo xulista xubnayaas.

Arintani waa xasaasi, waa aasaasi, waa aayo umadeed iyo cidii matali lahayd. Hadaba maadaama aan doorasho jiran, shacabkuna waxba dooran Karin waa in dadka wax soo dooranayaa noqdaan rag shacabku ku kalsoon yahay, lagu aamin qabo, hadii taasi dhacdo waxaa dhacaysa in ragaasi soo xulaan rag u u qalma kursiga Xubinimada Baarlamaanka. Taasina waxay keenin soo dhawayn iyo ka raali noqonsho ka timaada shacabka.

Jabarti Osman

Jabarti2020@hotmail.com

 QORAALADII HORE JABARTI

Faafin: SomaliTalk.com | Feb 10, 2004 

Afeef: Aragtida qoraalkan waxaa leh qoraaga ku saxiixan

. XAMAR DAAWO DACALLADA... SAWIRRO....