Waxaa maalintii Jimcaha ee 13-12-1424H oo ku beegnayd 13-02-2004 lagu qabta dugisga sare ee Sh. Barawe ee magaalada Hargeysa xaflad aad loo soo agaasimay oo lagu maamuusayey xidhitaanka dawro sharci ah (siminaar) oo loo xidhayey qaar kamida ardayda wax ka barata dugsiyada sare ee magaalada Hargeysa. waxaa xidhitaankeeda ka soo qayb galay Culimo, odayaal, araday iyo dadwayne kale oo fara badan.

Waxaa ka mid ahaa culimadii halkaa ka hadashay Sh. Maxamed Cumar Dirir (Sh. Magaalada Hargeysa) oo ku dheeraaday baahida dhalinyaradu u qabto inay kordhinayaan aqoonta ay u leeyihiin diinta islaamka, waxaa kaloo isaguna dhalinta waanooyin wax ku oola u soo jeediyey Sh. Aadan Siiro oo ka mida culimada magaca wayn ku leh magaalada Hargeysa.

Dawradan oo iyadu ka socotay mudo 30 maalmood ah masjidka Al-Raxma oo u dhow xabsiga dhexe ee magaalada Hargeysa waxaa ka faa’iidaystay arday tiradoodu gaadhayso 430 arday oo isugu jira hablo iyo wiilal. Masjidka Al-Raxma oo labo dabaq ka kooban ayay habluhu dusha sare ka dhegaysanayeen duruusta, waxaana 5 maalmood asbuucii maalin walba laga bixinayey 3 xiisadood oo middiiba saacad tahay.

Ujeedada laga lahaa dawradan:

Waxaa ka mid ahaa ujeedooyinka loo qabtay dawradan:

Kor u qaadida aqoonta dhinaca diinta islaamka ee ardayda wax ka barata dugisyada sare.

Isku xidhka ardayda si ay isugu kaashadaan khayrka.

In la dareensiiyo Masuuliyadda ka saran iyo dawrka ay ku leeyihiin diintooda iyo dadkoodaba.

In looga faa’iideeyo ardayda wakhtiga ay fasaxa yihiin wax anfacaya if iyo aakhiroba.

Duruusta Lagu Qaatay Dawrada

Waxaa ka mid ahaa duruusta iyo casharada lagu qaatay dowradan:

Duruus ku saabsan caqiidada islaamka.

Casharo fiqi ah (dahaarada, Salaadda, iyo janaasada).

Casharo ku saabsan siirada rasuulka (SCW).

Muxaadarooyin kala duwan oo loogu talo galay ardayda.

Culimada ka qayb qaadatay dawradan waxaa ka mid ahaa:

SH. Mustafa X. Ismaaciil Haaruun, SH. Maxamed Cumar Dirir, Sh. Yuusuf Aadam, SH. Xassan C/salaam, Sh. Ismaaciil C/llaahi, SH. Aadam xaaji (Aadam siiro), SH. Yaasiin Ibraahin, SH. Ciise Maxamuud, C/risaaq Ciireed, Maxamed Ibraahim, Shacbaan c/laahi, Khadar C/llaahi Badeed

Kharashka ku baxay kutubta, shahaadooyinka, iyo abaalmarinada kale la guddoonsiiyay ardayda waxaa ku deeqay oo bixiyay qaar ka mid ah walaalaha khayrka jecel ee magaalada Hargeysa.

Dawradan oo ah tii labaad ee nooceeda ah ee loo qabto ardayda dugsiyada sare ee magaalada Hargeysa waxaa soo qabanqaabiyey Gudiga Toosinta iyo Wacyigalinta Ardayda ee magaalada Hargeysa.

Waxaa xusid mudan in dawradii koowaad oo lagu qabtay isla masjidka Al-Raxma sanadkii hore isla bishan oo kale (February-2003) ay iyadana ka faa’iidaysteen arday badani, sida uu uu sheegay gudoomiyaha Gudigu Sh. Sacad Maxamud Sh. Muuse oo ka hadlayey xafladda.

Jama Yare
jamyare@hotmail.com

Faafin: SomaliTalk.com | Feb 17, 2004

Afeef: Aragtida qoraalkan waxaa leh qoraaga ku saxiixan