Daabaco Boggan | Print Filimada anshaxa xun, ruugidda Qaadka iyo isticmaalka Daroogadu Saamayn intee le'eg Bay ku Leeyihiin Faafidda Cudurka AIDSKA ee Soomaaliya.. Guji... HAMBALYO HAMBALYO AROOSKA: Ahmed_Nuur Sheekh Abdullahi & Ruqiya seed cilmi oo  ku aqal galay magaalada Oslo: Waxaan halkaan tahniyada & hambalyo uga soo jeedinaynaa anagoo kala ah Mohamed Rashiid Sh mohamed, xaaskiisa , nimco sheekh Abdulaahi , mohamed rashiid ahmed hadi,  xaaskisa, ubax ahmed, hadi Bashiir sheekh Abdullahi, Ahmed mukhtaar sh mohamed, xaaskiisa, Abdi sayid moalin yusuf & xaaskiisa, Abdi fatah yusuf urur , & xaaskiisa   Ahmed_Nuur Sheekh Abdullahi & Ruqiya seed cilmi  oo axadii ku aqal galay magaalada Oslo ,waxaan allah uga baryayanaa kuwii isku waara ee ubad khayr qaba oo dalkooda & diintooda anfaca   AAMIIN, AAMIIN, AAMIIN Hambalyada arooska waxaa loogu hagaajin karaa: ahmedpo@hotmail.com C/o: Ahmed Sheekh Abdullahi

 
Waad salaaman tihiin meel kastoo aad joogtaan. Gabaygan aan u bixiyey Soomaalideer sebenkanay waad silloon tahay, waa gabay guubaabo iyo dhaliil isugu jira. Kolley aniga wakhtigan xaadirka ah waxay iila muuqataa arrini mid gurracan, aragtidaydii ayaan hadlay. Walaalayaal wixii talo tusaale ah waan soo dhowanayaa. Igala soo xiriira emailkan: Mohamoud@ameritech.net 

Waxa Tiriyey: Maxamuud Axmed Cabdalla

Soomaalideer sebenkanay waad silloon tahaye
Sixir iyo falbaa kugu xirxiran saancad iyo hooge
Silicbaad ku nooshiin sidii duul sahyuuniyahe
Isa sahayatoo dawladnimo kuma sifowdaane
Saqiir iyo kabiirkiin arlada waad sunsumaysaane
Surrinkaad istaagtaba kunbaa soogan abidkiine
Qola-qola u seerkii ayaad weli u sooftaane
Wixii hore idiin siray waqiin kama salgaadhaane
Samo iyo wanaag diidde iyo saamax iyo khayre
Sacab tima ku yaallaad heshiis subuc ku qaaddaane

Moorgan iyo Salaadiyo intuu Suudi talinaayo
Siilaanyo leeyahay dalbaa aniga ii seeran
Saamaha Riyaalena u sido dawlad socon weydey
Hiiraale subax noolba rabo saar in lagu sheego
Shaar-gaduudna Saakow iyo Baay guluf ku saaraayo
Saransoor, Madoobiyo Xabeeb saami wada dooni
Kornaylkuna amxaarada sasabi sidigna maalaayo
Xuseen aabbahaybaa saxnaa salow la meeraayo
Caatona sinsaarada u qumin maato saranseeri
Qanyarena sibraarrada ku dhami sabo la weydaarshey
Socon mayso soomaalinnimo sebenka maanta ahe
Soddon khaa'in oo wada sirgaxan wada sabsaabiina
Oo saa waxyeel kii la yari seef la dananaayo
Dhiigyacab Sayidii loogu waco sun iyo boog daacay
Soomaalibay gaar u tahay siisan kari waayey

Afartaa sifeeyaye haddaan saami kale eego

Saatirow ilaahay darbuu silic ku raajaaye
Sancadiisa weeyaan hadduu duulal saacido'e
Seeftiisa aadmiga nimuu saaray mawtiyane
Goortuu sarraafay baryada sama ku tuugaane
Qaarbaan la solonsiin maqfiro toobad saaniyahe'e
Soomaali keedii qurbaha noloshu saamaysay
Iyo kii saboolee xeryaha gaajada u seexday
Saaxi daaye reer hebel ayay dhab u sujuudaane
Situweyshan bay gaaladana kaga sarriigtaane
Muslimbay sakadii dhawrayaan sadaqadiisiiye
Sebi aabbihii laga sidkiyo magacyo saynsaaban
Nin sariirti uu seexan jiray saani ledi waayey
Oon saakin ku ahayn halkay saanaddu u tiilley
Saaxiib bayga dhalay taa dadow siisan kari waayey

Afartaana sifeeyaye haddaan saami kale eego

Taariikhda suushiyo nimcada la iska saydhaayo
Sokeeyaha colloobiyo fidnada sahalka loo dooni
Saaxiibka cadaw lala noqdiyo diinta laga soofay
Magantaa silsiladaysanee xadhiga loo soohday
Nin walaalkii sirayoo dadoow sun u walaaqaaya
Saamaha wakhtiga weeye iyo seegid aakhiro’e
Sinaawaa Hargeysa igu dili siisan kari waayey

Diktaatoorinnimadaa subkane saruu dhawaaqaysa
Sandullaysigaa maatadiyo maammul saranseerka
Hubka nacabka laga soo gatiyo salabka shaydaanka
Subax gawracaa muuqda iyo waranka soofaysan
Xaqa siririntiyo seefta ba’an sacabka been beenta
Selled hadimo weeyoo dadow waa simbiil madhane
Sayruuqa Boosaaso yaal siisan kari waayey

Seeraha la jeexdiyo hantida sabaqu boobaayo
Mooryaanta Xamar lagu safiyo diiratada soocan
Caraafiidda soodhkiyo bambada sumuca loo dhiibey
Biyoolaha sarkaalkee la baray sun iyo waabayda
Saan caddaalayaashiyo kuwaa dumiyey saabaanka
Waa tuugo solato ah dadow saatirna ogsoone
Saxariir ku daawada naflaha siisan kari waayey

Baydhaba surgooyada jirtiyo sebiga ooyaaya
Maatada sawaxantee nin lihi sidan u eegaynin
Sed bursiga dableydiyo hablaha lagu safaadaayo
Sinji dirirka hoosiyo magliga haatan sulufaadi
Seetada amxaarkowgu wacan silic maryaadkaase
Somalaay in Soomaalinnimo laga sarraysiiyo
Siriqduu Sinaawi u rakibay siisan kari waayey

Sidigsiga Kismaayiyo Markiyo saraca boobkiisa
Sama diidka Gedo jooga iyo Jawhar sabarkeeda
Hiiraan sucbaannada degiyo Mudug illaa Saylac
Waa sir iyo xeeshiis Amxaar qaybtan socotaaye
Saddexdii maqnaa goortiyuu saami ka haleelay
Labadii sugnayd buu rabaa inuu saxeexdaaye
Middidaa la sudhi Sool dadow siisan kari waayey

Afartaana sifeeyaye haddaan saami kale eego

Soomaalaay islaam saxa ma tihid mana sallowdaane
Soodariyo Waqooyiba dadkaa suun ku duug malehe
Deeqsi iyo saciim kaa dhammaa seedda baydariye
Culimadii sufyaannaa beddeley waa sagaal qolo’e
Dhaqankaa salguuryoo beryahan waad silloon tahaye
Hidda soocme ubadkii kolkii gaalku saacidaye
Suugaanta nimankii yiqiin waa saf aakhiro’e
Suldaannimadii iyo boqornimadii saariqyaa geyaye
Dumarkii la kala siisan jiray Saafi iyo Qawlo
Soddonkay ku soohdaan timaha mana sadhoobaane
Sibraduubka odaygii ahaa sebi ka liiteeye
Dhallin suubban laga waa raggii waa salleelimaye
Sidii loo dayaba waa jabiyo silic ku leelleele
Haddaan saaka waxan maagganahay sixi aqoon waayey
Gabaygana ku sari karin halkay boogtu iga saydhay
Saatir baan baryaayaa inuu saxal wareejaaye
Soomaali inuu maruun u kaco ruux sidan u dhaama
Caaddiloo ka sugan eexadiyo qolo la sooryeeyo
Soo celiya qarankeenni iyo calankii loo saaray
Soomaalidii kala maqnayd samo wadaagsiiya
Soo nooleeya magaceenna dumay sharaf ku saameela
Oon colaadda sahashane allow nabad u saaxiiba

Wixii faallo ah: mohamoud@ameritech.net 

Kulaabo bogga hore ee www.somalitalk.com