Ilaah baa mahadleh. Nabadgelyo iyo
naxariis Nabi Muxamed korkiisa ha ahaato.
Mar horaan iri C/hi hadduu dagaalo
galana kuwa dadka u xiga buu goyn, hadduu cidaha hayaamiyana wuxuu ku guuraa
bil seddex markaasaa cabbaar ka dib markuu keyn, togag iyo duur marayo bishu
dhacdaa. Ishaan farta ka gashay markaan fargan ku sheegay.
Waxuu saaxiibadiis SRRC u qaatay inuu
meeshuu rabo u wadan karo, isma oran wuxu waa rag oo waa “laga malaystaa”
laakiin haddaadan haysan dad caqli leh oo kula taliya, bohol baad ku
dhacaysaa. Dadka C/hi la shaqeeya isagaa ugu caqli iyo karti badan marka waa
sida Soomaalidu u dhahdo ninkii reero gunaanadka (Yaasiinka) ka yaqaan isagaa
gunaanad seega. Saaxiibadiis SRRC waxay isku ogaayeen in shirka laga tago oo
Jowhar la tago laakiin C/hi wuxuu u dabomaray C/Qaasim isagoon iyaga u
sheegin. C/Qaasim iyo C/hi waxay isku raaceen si ay mucaaradkooda iskaga
dheereeyaan, tooduna u socoto. Waxaa daaqad lagala baxay Xasan Abshir iyo
Jaamac Cali Jaamac. Jaamac waxaa ka soo horjeeda C/hi kaliya laakiin Xasan
Abshir waxaa kasoo horjeeda C/Qaasim iyo C/hiba. C/hi ma rabo in qof
“Puntland” ka socda soo ag istaago. Maanta waxaa calool xumo haysaa dadka
siyaasiyiintoodii C/hi dartiis u fogeeyey.
Kornaylka iyo taageerayaashiisii
waxaa ku dhacay qalbi-jabo markii la maqlay SRRC baa kala jabtay. Sidaad
cinwaanka ku aragtaan Maxamed Dheere iyo saaxiibadii jeexoodu wuxuu noqday
“SR” oo Soomaali ahaan aan ka wado Soomaalaan raacnay. Halka C/hi qaatay
“RC”. C/hi ma helin dad badan oo uu fikradaas ka dhaadhiciyo waxaa lagu
sheegay inay usoo hareen Moorgan iyo Xasan Qalaad. Marka labadooda ayuu
jabkaas u dooray oo ah: raac cadowga (Itoobiya). Waxaan shaki ku jirin in
markaan labada kooxood kala caqli badanyihiin arrintaas darteed. Waa ayadii
lagu heesi jiray:
Caqligii wanaagsani itaal inuu ka
roonyahay bal eegoo u fiirsadaa.
Horta maalmo dhowayd C/hi iyo C/Qaasim
baa soo jiitay dadweynaha Soomaaliyeed iyo beesha caalamkaba. Waxaa la gaaray
heer IGAD u qaadatay in labadan nin kaliya waxna furikaraan waxna xiri karaan.
Taas waxa daliil u ah mar guddi ka socda SRRC ay kuwii C/Qaasim soo diray ku
dhaheen waxaan rabnaa C/Qaasim kaliya ilaa kuwii C/Qaasim dhaheen war nala
hadla waxaa nasoo diray C/Qaasime. Fikradaas C/hi baa lahaa. SRRC waxay
raadinayeen si ay C/hi uga aarsadaan wataas hadda toodii u toostay. C/hi
wuxuu damcay inuu jaranjaro ka dhigto si uu saxiixa u diido laakiin SRRC
waxay tiri: C/hi yaad ka caqli badantahay? Sidii C/hi ku dooday wuxuu
sheegtaa in dowladdii Soomaaliya iyo heshiis kasta isagu kala tuuray.
Horta sumcaddii C/hi isu qoonsaday
waxay agtaal maanta SRRC-dii tiri waxaan naga go’an sidaan u saxiixnay sida
Maxamed Dheere, Xuseen Caydiid iyo kuwa kale iyo waliba G8 oo iyagu
maalmahanba diidanaa sheekada Itoobiya. Waqtiga aan maqaalka qorayo
dadweynaha Soomaaliyeed waa ku farxeen waraysigii Maxamed Dheere ee Hornafrik
uu ku sheegay inaan cidna khiyaamin ee waxay saxiixeen ahaa waxay u jeedaan.
Hadalka Maxamed Dheere waxaa laga fahmayaa in iyagoo arrintaas u jeeda ay
tanaasul sameeyeen si Soomaali u heshiiso. Haddaad siyaasad maqashid wa taas.
Hadalkaas Maxamed Dheere wuxuu keeni karaa in dadku indhaha ka laabto wixii
hore oo ay maanta u arkaan nin shirka badbaadinaya, hadhowna uu magac ka helo.
Ragga ku raacayna waa saas. Maxamed Dheere wuxuu yiri waxaa jira dad jecel in
wax walba iyagu sheegtaan. Marka bal C/hi iyo Moorgan ha caddeeyeen in toodu
socoto.
Beesha Caalamka waxaan u sheegayaa
horta C/hi awalba “Puntland” xoog buu ku haystay, saasooy tahay saxiixii uu
saxiixay waa naga saxiixanyahay oo waxaan rabnaa inaan Soomaali wax la
qaybsano. Marka khiyaamada uu sheegayo waa sheeko khiyaali iyo khuraafaad ah
oo Zenawi afka ugu tiray. Waxaan uga mahadcelinaynaa waddan kasta iyo hay’ad
kasta oo isku deyday in hogaamiye kooxoodyadu isku soo dhowaadaan. Seddexda
madaxweyne ee Kenya, Uganda iyo Jibuuti waa mahadsanyihiin sidoo kale waxaa
mahad balaaran usoo jeedinayaa Musyoka iyo Afey oo ku dadaalay in la isa soo
horfariisto.
Haddii C/hi diido saxiixa waxa gelaya
arrinta Puntalnd odayaasha dhaqanka, siyaasiyiinta kale iyo dadweynaha.
Dadweynaha Puntland iyo odayaashu waxay ka fiirsanayaan waxay C/hi ka
yeelilahaayeen. Mar hore isim ka mid ah kuwa Puntalnd ugu caansan wuxuu
sheegay inay jiraan dad u arka in kursigoodu ku xiranyahay dhiigga shacabka
wuxuuna raggaas u sheegay inay si kale madaxtinimo ku raadsan. Dabcan qofkuu
haysto waa C/hi iyo waxa la halmaala. Suldaan C/Salaamna waatuu warqad usoo
qoray C/hi uu leeyahay yaan dagaal ka dhicin Sool iyo Sanaag ee nabadda
fursad sii.
Marka haddii C/hi saxiixa diido waxaa
shacabka ka go’an inay reeryada C/hi tuuraan taasoo keeni doonta inaan dagaal
ka dhicin Sool iyo Sanaag oo colaadii C/hi iyo riyadii Rayaalaba halkaas ku
bas beelaan.
Mar hore waxaan isbarbar dhigay Muuse
Suudi iyo C/hi Yuusuf. Taageerayaasha C/hi iyo dad kalaba waxay dhaheen
caddaalad maad samayn halka qolyaha Muuse taageeraa laftoodu u dhaheen Muuse
meel baad uga dhacday. Ilaa hadda isbahaysigii Muuse waa sidiisii halka kii
C/hi uu kala tagay. Marka maqaalada soo socda waxaan isbarbar dhigaynaa
Maxamed Dheere iyo C/hi haddii Ilaah idmo.
Siyaasi kasta ha ogaado hadduu meel
kheyr leh ku dambeeyo inuu guulaystay. Kaliya aan isku dayno inaan
khaatumadeena hagaajino.
Haddii Maxamed Qanyare, Maxamed
Dheere iyo Xuseen Caydiid ay ka dhabtahay saxiixa siday u sheegeen oo C/hi ku
khilaafeen waxaan shaki ku jirin in Xamar waa’ cusub u beryey oo dhibteedii
hal maalin lagu xallin karo. Waxaad mooddaa inay hadda suurtagal tahay in
ururkii aan u hadlayey ee xallinta mashaakilka Soomaaliya uu howshiisa qabsan
karo kadib markii hogaamiyayaashii Xamar ay saxiix gaareen.
Waxaan hogaamiye kooxeeyada ka
codsanayaa haddii C/hi ka noqon waayo sheegashada ah inuu saxiixu khalad ahaa
oo uu raaligelin bixin waayo in la qaadaco oo la gooyo oo sanka laga qabsado.
Qofoowna ha booqan oo ha u dhuuman meeshuu joogo. Haddii la qaadaco waxaan
shaki lahayn inuu ciil u dhiman doono.
Mahadsanid.
Asalaamu calaykum
Daabaco
Boggan | Print
