SomaliTalk DALSAN
w w w . s o m a l i t a l k . c o m
SOMALITALK - PAKISTAN

Feb 24, 2004

DIBLOMASIYADDA DAHSOON IYO DUUFANADA SIYAASADEED

U.G: Waxaan akhristayaasha ka codsanaya qormadani oo dheer awgeed inay sabir u yeeshan akhriskeda haddii ay fahmi waayan meelaha qaarkoodna waxaan gacmo furan ku soo dhawaynaya inaad ila soo xidhiidhan.

Mohamed Abdi Hassan (diridhaba)


Karachi, Pakistan.


diridhaba2001@hotmail.com

Mobile: 00-92-300-2600907

Daabaco Boggan | Print


Filimada anshaxa xun, ruugidda Qaadka

iyo isticmaalka Daroogadu Saamayn intee le'eg Bay ku Leeyihiin Faafidda Cudurka AIDSKA ee Soomaaliya.. Guji...


Mahad waxay u sugnaatay ilaahay subaxanahu watacalaye abuuray dhamaan dunida aynu ku noolahay Naxariis iyo nabad gelyo korkiisa ha ahaato Nebigeena suuban Muxamed (C.S.W).

Akhristaha qiimaha mudanlow 13 sanno oo ay burbursanayd dawladda dhexe ee Soomaliya waxaa umadda Soomaliyeed ku dhex jirtay wareer iyo qax, burbur, dhicitaan, iyo gaafwareegid, dabcan burburku kuma imanin dhayal iyo fikir la'aan balse soddon sanno oo ka horeeyey 13ka sanadood waxaa jiray cadaadis iyo cagajuglayn, dil, dhac, boob, kufsi, iyo hantigoosi laxaadleh oo loola tegay shacabka reer Somaliland oo ka mid ahaa ama ku dhex milsana dawladdii loogu yeedhi jiray "jamhuuriyaddii dimuqraadiga hantiwadaaga umadda Soomaaliyeed" 40 sanadood ka bacdi dhamaan geyigii ku abtirsan jiray magaca aan kor ku xardhay wuxuu u bedelmay cahdi cusub oo dhibtii iyo dheeftiis watta, waxaan filaya inaan ninna loo sheegaynin loogana faalloonayn hadda halka ay sartu ka qudhuntay, balse akhriste dulucda qoraalkayga oo taa ka duwan aan u dego, diiradana saaro meel dahsoon oo dogobta iyo dacarteedu mar uun ka bildhaami doonto dagalka beriga afrika, waxaan jecelahay inaan qoraalkani ku bildhaamiyo duufano siyaasadeed oo aan dagalkan maanta ah loo fadhiyin, balse sida saxansaxada diblomaasiyadeed urinayso maruun jilbaha la is dhigi doono, dabcan akhriste waa dagal udgoon, da'yar badani danaynayso, duulal badan qoomamayn doonan dad badana mashxaradi doonan, waxba yaanan hadalka ku dheerane, toobiyaha qallinka ayaan jeclaystay inaan ku xardho Su'aal in dooraba aan jawaabteed u day dayaayey. HADDII AY SOOMALIYA DAWLAD LOO DHANYAHAY YEELATO, WAA MAXAY HANAANKA LABADA DHINAC EE SOMALILAND IYO SOMALIYA ISKU HOR FADHIISAN KARAA?

Dabcan su,aasha jawaabteeda hadaad ka quudaraysid rag badan oo isku tilmaama siyaasiyiin waxaa hubaal ah in ninba dhinac u qaadayo, balse dabcan waa mid u baahan cilmi baadhis farabadan oo salka laga bilaabay, lagana nadiifiyey caadifad, qabiilaysi,  iyo nin jeclaysi.

waxaan isku dayi doonan qormadani inaan u kala saaro dhawr qodob oo muhiim ah oo aan ku gorfaynaayo muhiimadda ay leedahay kulan dhex mara saariisha Somaliland iyo Somalia, sidee labada dhinac isku hor fadhiisan karaan, waa maxay ajandayaasha siyaasadeed ee laga wada xaajoon doona, iyo wajiyada u yeelan karo wada xajood noocaasi ah oo mustaqbalka dhaw dhici doona.

hadaba aan ku bilaabo qormadayda marka hore intaanan u gudo gelin qodobadaasi sida wada xaajood foolka fool ah oo noocaasi ah looga dareemi karo Somaliland iyo Somalia

SIDEE SHACABKA IYO DAWLADDA SOMALILAND U ARKAAN WADA HADAL DHEX MARA SOOMALIYA OO DAWLAD LOO DHANYAHAY YEELATA

Shacabka reer Somaliland waxay jecelyahiin walaalahooda Soomaliyeed oo ilaahay siiyo dawlad iyo nidaam dhexe oo ay kaga raystaan dhibaatada iyo mooryaanta kala qaybsatay hantidooda iyo halbawlahooga, shacabka Reer Somaliland iyaga oo meel iska dhigay dhibaatadii la baday 30 sanno ka hor waxay jecelyahiin Dawlad iyo shicib Soomaaliyeed oo ay noqdaan laba dal oo isjecel oo jaar ah oo xidhidh wanaagsani dhex maro, dabcan Shacabka Somaliland oo ah awoodda ay ku taagantahay dawladoodu waxay ku qasbayaan xukuumadda Somaliland in ay xukuumaddu si foolka fool ah ula fadhiisato ugalana xaajooto wixii dan u ah labada dal, ha noqoto kala goosiga labada dal, xidhiidh dhex mara labada dal iyo siduu u ekaan karo, iskaashiga xagga dhaqaalaha, socdaalka, hiddaha iyo dhaqanka, waxbarashada, iyo ciyaaraha (sports), marka akhriste si aad u egto sida ay maanta xaaladdu tahay waxaasi oo dhani waxay kuula ekaan karaan qaar mustaqbalka fog ah, balse runtii maaha wax la dhayalsan karo, Da'yarta reer Somaliland waxay jecelyahiin cahdi cusub oo u bilawda labada umadood oo ah iskaashi, iyo bahwadaag ka xallan ama ka nadiif ah wax isku darsi!!

Shacabka Somaliland waxay jecelyahiin iyaga oo arka hogaan ka soo dhex baxa umadda Soomaliya, hogaankaasi oo qirsan madax banaanida iyo jiritaanka Somaliland, si ay meesha uga saaran muranka siyaasadeed ee ka dhallan kara ka hor wada xajood dhex mara, taasi waxaa aan tusaale buuxda akhriste u soo qaadan kara, ka hor shirkii Soomaalida loogu qabtay magaalada Carta ee jamhuuriyadda Jibouti waxaa hargeysa yimid rag badan oo siyaasiyiin ah oo Soomali ah oo tallo badan ka qaatay Madaxweynahii hore ee Somaliland alla naxariistii janno ha siiye Maxamed Ibraahim Cigaal, balse markii hunguriga siyaasadeed yimid dhinaca kale isku rogay, taasina ay badday khasaare weyn oo ku yimaada shirkaasi, hadaba togaanta iyo dulucda ama ujeedada Somalilanderku doonayo inuu arko si wada xaajood siyaasadeed oo labada dhinac ahi u suuro galaan waxa weeyi, in hogaan kasta oo Soomaliya ahi qirsanaado madaxbanaanida Somaliland, haddii kale meesha laga saaro wax wada hadal ah, oo aanay Somaliland-na aqoonsanaan doonin dawlad kasta oo aan xorriyadooda iyo madaxbanaanida aqoonsanayn.

SIDEE SHACABKA IYO QAYBAHA SIYAASADDA EE ISKAGA SOO HORJEEDA SOOMALIYA U ARKAAN WADA XAJOOD DHEX MARI KARA SOMALILAND

Maadama oo aanay jirin meel ilo midaysan laga soo qaadi karo sida Somaliland waxay u baahantahay cilmi baadhis badan oo lagu sameeyo sidii loo ogaan lahaa xogta dhabta ah ee ay ka qabaan mutmacyada kala gedisan ee Soomaliyeed, balse duurgal aan ku sameeyey ayaan jeclaystay maadama oo Soomaliya kala qoqobantahay inaan u kala qaad qaado shakhsiyaad ku kooban siyaasadda, hogaamiye kooxeedyo, iyo weliba gobolo. aan ku horeeyo magaalada muqdisho.

CABDIQASIM SALAAD XASAN

Cabdiqaasim salaad xasan waa hogaamiyahii hungoobay ee lagu soo doortay shirkii magaalada Carta ee jamhuuriyadda Jibouti, Cabdiqaasim ka hor shirkii magaalada carta wuxuu ahaa nin lagu tiriyo dadka qunyar socodka ah ee siyaasadda u nugul, dadyow badan oo ku dhaqan magaalada muqdisho gaar ahaan koonfurteeduna waxay aaminsanaayeen wakhtigaasi inuu Mr. Xasan yahay ninka wax ka qaban kara dhibaatooyinka ay magaalada muqdisho ku sugnayd, balse marin habaabin badan oo ku timid hanaankii siyaasadiisa ayaa waxay u horseeday in muddo yar oo kooban ay xukuumadiisi lagu soo dhisay magaalada Carta ee Jamhuuriyadda jibouti ku itaal gabto,

shakhsiyadda Cabdiqaasim salaad xasan oo lagu tiriyo ragii la soo shaqeeyey aadkana ugu dhawa hogaamiyahii shuuciga ahaa ee hore ee Soomaliya Maxamed Siyaad barre ayaa lagu tilmaama inuu yahay nin aad ugu ad adag ku tiirsanaada qabiilkiisa (hawiyaha, habargidir), taasi oo la sheego ka dib burburkii ku yimid xukuumadisi lagu dhisay magaalada carta in uu hadda ku dhex joogo magaalada muqdisho awoodda reerka uu laf ahaan ka soo jeedo, marka hoos loogu dego shakhsiyadda Cabdiqaasim Salaad Xasan, waa nin aan ogolayn madax banaanida jamhuuriyadda Somaliland si kasta oo ay ku timaado, carrabkana ka ilaashada wada xajood kasta oo mustaqbalka dhex mara, waa jiraan dad la qaba arrintaasi balse aan la odhan karin waa badanyahiin, waxaa taasi la qaba rag badan oo la shaqeeya oo isaga ku dhaw dhaw, balse rag badan oo la shaqayn jiray ayaa ay arrintaa darteed si weyn iskugu khilaafeen, waxaana ka mid ah Xasan Abshir Faarax, Cabdalle Deerow isaaq, iyo rag badan oo kale, waxaana lagu tiriya khilaafkaasi soo dhex  gallay in ay ka timid markii labadaa nin ay saxeexen heshiish ay soo hordhigeen ururka Igad hogaamiyaasha soomalida ee ku shirsan magaalada nairobi, qaraarkaasi oo uu ku jiray in Somaliland sideeda loo daayo uuna la xaajoon doono hogaanka ka soo dhex baxa shirkaasi.

MUUSE SUUDI YALAXOW

Waa hogaamiye kooxeed ka soo jeeda waqooyiga magaalada muqdisho, asal ahaana metala beesha uu ka soo jeedo ee (Hawiye, Abgaal), Mr. yalaxow, inkasta oo taariikhda siyaasadda Soomaliya uu ka soo gellay baal dagaal, hadana waa ragga lagu tiriyo inuu laf dhabar u yahay heshiis kasta oo la gaadhi karo, inkasta oo ay yartahay dadka aqoonta u leh muuse suudi yalaxow ee aan waraystay hadana waxaa la iigu sheegay inuu aad u yaryahay aqoonta uu Muusi suudi u leeyahay diblomaasiyadda labada dal ee Somaliland iyo Somaliya, maadama oo uu yahay nin siyaasadda ugub ku ah, rag badan oo aan kala sheekaystay hanaanka Muusi suudi yalaxow waxay ii sheegen inuu yahay nin u heelan gaadhsiinta reerka uu ka dhashay mansabka ugu sareeya ee Soomaliya, lama saadalin karo wuxuu ka aaminsanyahay wada hadal labada dhinac dhex mari kara iyo saansaanta u yeelan karo, Muuse suudi oo lagu tiriyo inuu soo caan baxay sannadahii 1996- ilaa 1997-kii markaasi oo uu xilka siyaasadda ee beesha abgaal hawiye ka tanaasulay Cali Mahdi Maxamed, hadda wuxuu gaashanbuuraysi sare la leeyahay Mr. Yalaxow, Cabdiqaasim salaad xasan oo ay ku bahoobeen urur si hogaanka ugu sareeya soomaliya aanu u dhaafin beesha hawiye ee Somaliya.

CABDILAAHI YUUSUF AXMED (YEY)

Cabdilaahi yuusuf axmed waa hogaamiye kooxeed ama siyaasi ka soo jeeda waqooyiga beri ee Soomaliya, (majeerteen), wuxuu ka tirsanaan jiray ciidamadii xooga dalka ee Soomaliyadii burburtay isaga oo ka gaadhay darajo kornaylnimo, waxaa lagu tiriyey ragii Aas-Aasay jabhadii ugu horaysay ee ka falagawda dawladii macangaga ahayd ee Siyaad barre ee la odhan jiray SSDF, halkaasi oo uu ka bilaabay halgan uu kaga soo horjeestay dawladii siyaad barre, balse inyar uun ka dib halgankaasi oo aan lagu guulaysan wuxuu isku soo dhiibay dawladdii Siyaad barre, waxaana lagu tilmaama halgankiisasi mid aan dheefin ujeedadiisi, Cabdilaahi yuusuf wuxuu tiirarka u aas aasay dawlad goboleed uu ku mideeyey qabiilkiisa (majeerteen) sannadkii 1998-kii, halkaasi oo uu ka noqday dawlad goboleedkaasi madaxweyne dawlad goboleedkaasi oo loogu magac daray (puntland) ama dhulkii udgoona, ma jirin wax xidiidh toos ah ama ku diblomasiyadeed oo dhex maray maamulkaa cabdilaahi yuusuf iyo Xukuumadda Jamhuuriyadda Somaliland, balse sannadkii 1998-kii dabayaqadiisi ayuu cabdilaahi yey wuxuu sheegtay gobolo Somaliland ka tirsan oo ay ku dhaqanyahiin beelaha daarood qaar ka mid ahi (Dhul-bahante iyo Wersengeli), wuxuuna ku dhawaaqay inuu ka gudbay midayntii qabiilkiisa majeerteen una xuubsiibtay cahdi cusub oo uu ugu magac daray (Harti isku keenid), balse dadka siyaasadda aadka ugu dhuun daloola markay ficilkaasi u duur galeen waxay ku macneeyen burburin uu cabdilaahi yuusuf axmed ugu tallo gallay qaranka Somaliland iyo sumcad dilid, taasoo ayey yidhaahdeen khubaradaasi uu Mr. yey markii hore ee uu yagleelayey waxan uu ugu yeedhay Puntland-nba doonaayey inaan caalamku indho caafimaad qaba ku eegin Somaliland, si uu isku bar bar dhigo Somaliland iyo puntland, taasi waxay meesha ka saartay xidhiidh dhex mara cabdilaahi yey iyo Somaliland, dhawr goor oo idaacadda laanta afka soomaligu waraysi la yeelatayna wuxuu cabdilaahi yuusuf sheegay in aanu sinna raali uga ahayn qaran Somaliland la yidhaahdo oo ka bildhaama carrada beriga afrika, si kasta ha ahaate, Cabdilaahi Yuusuf waxaa la odhan kara hadda waa cadawga koobaad ee Jamhuuriyadda Somaliland, waxaana wakhtigan xaadirka ah xaaladda gobolada muranku ka taaganyahay hadheeyey ficilo militeri, si kasta ha ahaate hogaanka Somaliland kamaba suurawdo inay meel la fadhiisato dawlad uu hogaaminaayo cabdilaahi yuusuf axmed oo sheegata inay soomaliya matasho.

XASAN MAXAMED NUUR SHATIGADUUD

Xasan maxamed nuur shaatigaduud waa hogaamiye kooxeed ama siyaasi ka soo jeeda koonfur galbeed soomaaliya (Bay iyo Bakool), Mr. Shaatigaduud wuxuu aas-aasay hogaamiyana ka yahay jabhadda RRA, kuwaasi oo ay ku bahoobeen mujtamaca raxanweynta ee gobolada Bay iyo bakool, sannadahii 1995kii ilaa 1996-kii wuxuu shaatigaduud ku jiray halgan weyn oo ku kaga xoraynaayey dhulka uu ka soo jeedo jabhado kale oo qabsaday oo ay horkacayeen janeral maxamed faarax caydiid iyo  weliba wiilkiisa ka danbeeyey xuseen maxamed caydiid, waana uu ku guulaystay, Xasan maxamed shaatigaduud wuxuu socdaal ku yimid magaalada hargeysa sannadkii 1998-kii isaga oo ka qayb gallay xafladii 26 june ee lagu qabtay Xarunta madaxtooyada ee Hargeysa isaga iyo wefdi balaadhan oo uu hogaaminayo oo uu ka mid ahaa Cabdalla Deerow isaaq iyo rag kale oo badan oo ka mid ahaa saraakiisha sar sare ee ururkiisa RRA, wuxuu ka qayb gallay shirkii lagu qabtay magaalada carta wuxuuna in door ah la shaqeeyey hogaankii hungoobay ee halkaa lagu doortay cabdiqaasim Salaad Xasan, balse inyar ka dib waa uu iskaga baxay wuxuuna ku hadhay ururkiisa RRA, marka la eegayo xidhiidh ama wada xajood dhex mari kara Somaliland iyo Soomaliya waa nin aad iyo aad u soo dhawaynaaya, waana nin marka la eego furfurnida siyaasadeed kaga xeel dheer ragga aynu kor ku soo sheegnay, wuxuu aaminsanyahay Mr. shaatigaduud in wada xajoodku yahay midda kaliya ee xal lagu gaadhi karo wada xajoodkaasi oo dhex mari kara Somaliland iyo Soomaliya, Mr. shaatigaduud oo ay idaacadda B.B.C-du waraysanaysay ayaa wuxuu yidhi waxaan aaminsanahay in umadda reer Somaliland ay aayahooda ka tashadeen dantuna ugu jirto iyaga oo qaranimadooda xijista wada xajoodkuna uu iman karo oo keliya marka Soomaliya dawlad ka dhalato.

LA SOCO QORMADANI TODOBAADADA SOO SOCDA

N.B: Qormadani oo aan kaga hadli doono qodobo badan oo ay ka mid yahiin ajandayaasha ugu muhiimsan ee labada dal ee Somaliland iyo Somalia ka wada hadli doonan mustaqbalka, dalka ama meesha ugu muhiimsan ee laga yaabo in labada dal ku wada xaajoodaan, iyo weliba sida labada shacbi u soo dhawayn karaan heshiisyo wax ku ool ah, oo labada dal gaadhan.

F.G: Qormada kor ku xardhan waxay ka turjumaysa cilmi baadhis aan ku sameeyey muddo kooban, magacyada iyo qabiilada aan ku adeegsaday qormadayda kama turjumayso wax xumaan iyo caadifad ah oo aan uga danleeyahay qabiilkasta iyo ururkasta oo aan magac dhabay wuxuu leeyahay sharaftiisa iyo karaamadiisa gaar ahaaneed.

C.G: Waxaan ka codsanaya dhamaan saxaafadda Afka soomaliga ku hadasha in ay tahay qormadani mid u gaar ah qoraaga hoos magaciisu ku xardhanyahay masuuliyadeedana aan anigu leeyahay.

waxaan ka codsanaya dhamaan akhristayaasha haddii aad ka qabtaan wax fikrad ah inaad iigu soo gudbin kartaan ciwaankayga oo ah

E-mail: diridhaba2001@hotmail.com

Mobile: 00-92-300-2600907.

la soco todobaadada soo socda.....................

MOHAMED ABDI HASSAN (DIRIDHABA)

KARACHI, PAKISTAN.

Faafin: SomaliTalk.com | Feb 24, 2004

 Afeef: Aragtida qoraalkan waxaa leh qoraaga ku saxiixan

. XAMAR DAAWO DACALLADA... SAWIRRO....

Kulaabo bogga hore ee www.somalitalk.com 

© www.SomaliTalk.com
All About Somalia and More..
.
>> Usheeg Asxaabtaada
Allah Is Great
 kaah

BILICDA SOMALIYA
Luuq Ganaane, 1987

wiil Waa wiil yar oo Somaliyeed oo nayl yar dhabta kuwata xilli nabadana dhexjooga Bilicda dhulka Soomaaliya.
Akhri


Riyale
Sirta ka Dambaysa Somaliland ma Itoobiyaa?
[Liiban]



XAAFID QUR'AAN cFatax Cabdul Fataax waa xaafid qur'aan Somali ah oo wacdaro muujiyey GUJI


Copyright © somalitalk.com. All rights reserved.

HTML CD