w w w . s o m a l i t a l k . c o m
|
SOMALITALK
- SWEDEN
|
Janaayo 25, 2004 Sweden
oo ka furmaya shirweyne caalami ah oo loogaga hadlayo tacadiyada iyo dilalka
loo geysto dadka rayidka ah
Ikraam Cali-kaar
Ikraam@journalist.com
Maalinta berito ah haddii Alla idmo ayaa waxaa lugu wadaa in magaalada
Stockholm ee dalkan Sweden uu ka furmo shirweyne caalami ah oo socon doono
muddo sadex maalmood ah.
Shirkan ayaa looga hadlayaa sida ugu haboon ee ay ku suuragaleyso in la
joojiyo dilalka iyo tacadiyada loo geysto bani'aadamka islamarkaasina la
duudsiiyo xaquuqdooda.
Xoghaya guud ee Qaramada Midoobey Koofi Canaan oo maanta oo axad ah soo
gaaray magaalada Stockholm ayaa shirkan xaflada furitaanka hadli doono. Koofi
Canaan ayaa markii uu ka soo degay gegeda diyaaradaha magaalada Stockholm la
kulmay ra'iisal wasaaraha dalkan Sweden Göran Persson oo si rasmi ah maalinta
berito ah furi doonaa shirkaasi. Göran Persson iyo Koofi Canaan ayaa nasasho
yar kadib waxey u dhaqaaqeen xaruntii ay shirka jaraa'id ku qabanayeen
waxaana ay halkaasi warfidiyeenada u sheegeen in shirkani yahay mid muhiimad
u leh dalalka dunida ee ka qebygalaya shirkan si mowqif mideysan looga
qaadato dhibaatooyinka loo geysto dadka rayidka ah.
"Haddii aad i weydiisay iney jirto xoogaa hormar ay dunida ka sameysay si
looga hortago dilalka iyo tacadiyada aadanaha islamarkaasina aan wax uga
qabanay iyo natiijada kasoo baxdayba waxaan qabaa inaan ku siin jarin jawaab
sax ah, hase ahaatee taasi macnaheeda maahan inaan raali ka nahay in
bani'aadamka la waxyeeleeyo" ayuu yiri Koofi Canaan oo ka jawaabayey su'aal
aheyd mustaqbalka malugu camal jiraa in la joojiyo dilalka loo geysto
aadanaha. Shirkan lugu wado inuu berito si habsi ugu furmo magaalada
Stockholm ayaa durba waxaa soo xaadiray qaar kamid ah madaxdii iyo wasiiradii
lugu casuumay shirkaasi oo kamid yihiin wasiirka Arimaha dibada Ghana,
madaxweyneihii hore ee Filand erygeygii Qaramada Midoobey ee hubkii Ciraaq
Hans Blix iyo ergeygii iyadana u qaabilsaneyd gobolka Kosovo ee Albeeniya.
Sidoo kale waxaa lugu wadaa inuu isna halkaasi ka hadlo xoghayaha arimaha
dibada Javier Solana.
Guud ahaan amaanka magaalada Stockholm ayaa aad loo adkeeyey, uga yaraan 1500
oo askari ayaa la howl galiyey si haddii ay rabshado dhacaan uga hortagaan
iyadoo la ogsoon yahay in shir noocan oo kale ah la filayo iney hareeyaan
rabshado.
Dhinaca kale danjiraha Israa'iil u fadhiya dalkan Sweden Zvi Mazel, ayaa
isagu ka muujin wax cudur daar ah sawir ay ku sawirneyd gabar Falastiiniyad
ah oo la sheegay iney miino ay korkeeda ku xirtay ku dishay dad yahuud ah
Magaalada Qasa ee dhulka Falastiin ay Yahuudu heysato. Sawirkaasoo uu
danjiraha inta ku arkay madxaf ku yaala magaalada Stockholm uu si ula kac ah
u bur buriyey. Si kastaba arintu ahaatee danjiraha ayaa ku tilmaamay
talaabada uu qaaday mid uu ku qanacsan yahay islamarkaasina ay ku habooneyd
inuu bur buriyo wax uu ku tilmaamay "astaan lid ku ah Yahuuda" Aaad baan uga
xumahay in reer galbeedka waxa Israa'iil ay sheegto laga runsan warfaafinta
galbeedkana ay aad u buun buuniso wararka falastiiniyiinta" ayuu yiri Zvi
Mazel oo u waramayey mid kamid ah wargeysyada ugu afka dheer ee dalkan,
dhinacna ka muujinaya sida maanta adduunka ugu soo kordheyso naceybka loo
hayo dadka yahuuda ah laga soo bilaamo markii Hitler-kii naasiga ahaa uu
gumaadka daran u geystay ilaa waqtigan xaadirka ah ay adduunyadu hareeyeen
dagaal la sheegay in lugula jirro waxa loogu yeeray argagaxisada.
Isku soo wada duuboo maalinta isniinta ah waa beritee haddii Alla idmi ayaa
magaalada Stockholm ee caasimada Sweden ka furmayaa shirweyne caalami ah oo
loogaga hadlayo sidii ay dunida ula diriri lahey tacdiyada iyo dilalka loo
geysto dadka rayidka ah, taasoo durba shirkan Israa'iil u aragto mid si toos
ah loogu cambaareyn doono xasuuqa aan geed ku gabashada laheyn ee ay kawado
goobaha falastiiniyiinta ee ay heysato.
Waxaa diyaarisay;
Ikraam Cali-kaar
Ikraam@journalist.com
Faafin: SomaliTalk.com | Jan 26, 2004
<><><>
XAMAR DAAWO DACALLADA...
SAWIRRO....
Kulaabo bogga hore ee www.somalitalk.com
|
©
www.SomaliTalk.com
All About Somalia and More...
|
>>
Usheeg Asxaabtaada
|
|
|