Ilaah baa mahadleh. Nabadgelyo iyo naxariis Nabi Muxamed
korkiisa ha ahaato.
Siyaasi Soomaali baa ba’ay. Qolyaha saxiixa diidan waa in
lagu dayo sidii Wiilwaal ku deyey kitaab-gaablayaal markuu weydiiyey in cid
aan Ilaah ahayn laga baqo. Wiilwaal wuxuu ka hadlayey baqdinta dabiiciga ah
ee noolaha Ilaah ku abuuray ee kamuu wadin baqdinta cibaadada ah ee la rabo
in loo garto in Ilaah kaliya wax dilo waxna nooleeyo. Kitaabgaablayaashii waa
fahmi waayeen xujadii Wiilwaal ilaa Wiilwaal inta oodo aad u dhaadheer oo
qurac iyo geed-qodxeed ka kooban uu wareejiyey oo aqal ka dhigay uu u yeeray
kitaabgaablayaashii oo mar kale su’aashii weydiiyey iyaguna jawaabtoodii bay
ku adkaysteen. Wiilwaal wuxuu gurigii hor dhigay waardiyayaal seefo haysta.
Wuxuu soo diray labo askari oo inta meeshii soo galeen bay labo wadaad la
boodeen oo u qaadeen guri kale dabadeedna inta laba wan seefihii ku soo
qaleen bay labadii seefood oo dhiig ka da’ayo la soo galeen meeshii wadaadadu
ku jireen dabadeedna labo kale ku dhegeen. Markii intaas dhacday ayaa
wadaadii qaarkood waxay ka boodeen oodo aan wax binu-Aadam ahi ka boodi karin,
qaarna waxay ka dhexbaxeen meel xittaa uusan masku ka bixin karin laakiin
waxaa si xun u jeexjeexay qodxihii oodaha. Ka dib Wiilwaal wuxuu ku qanciyey
in Ilaah iyo ciddii kaa xoog badan laga baqo. Waxay ku fiicnayd in wadaadadu
dhahaan Ilaah kaliyaa waxna dila waxna nooleeya laakiin waxaa jira baqdin
Ilaah nagu uumay.
Nin Yuhuud ah baa mar muslimiin dacaayadeeyey oo yiri
geesinimaad ka hadlaysaan markaasaad dagaalkii Xunayn cararteen isagoo Nabi
Muxamed (SCW) iyo asxaabtii haysta (RC). Nin meesha fadhiyey oo muslim ahaa
baa xanaaqay oo yiri Nabi Muuse (CS) baa ka darnaa. Yuhuudkii wuxuu yiri
maxaad ka waddaa? Ninkii muslimka ahaa wuxuu yiri: saxaabadii waa soo noqdeen
Xunayn laakiin Ilaah wuxuu Qur’aanka ku yiri “ Wallaa mudbiran walam yucaqqib”
micnaha Nabi Muuse (CS) markuu arkay ushii oo abeeso noqotay wuu jeestay/cararay
oo ma soo noqon. Waxaan la yaabay waxa ninka muslimka ahi uu Yuhuud mar dambe
jooga uu Muuse (CS) u xijinayo ilayn isagaaba ka xigee. Akhristaal horta Nabi
Muxamed (CSW) ma cararin oo Isaga iyo saxaabo yar baa goobtii ku haray markii
muslimiintu carareen. Marka sidoo kale Nabi Muuse (CS) iyo saxaabadii (RC)
fulayiin maahayn ee waxaa jira wax nafta ku abuuran. Iska daa wax kalee
haddii adoo dariiq maraya kubbad/banooni lagu soo tuuro waad gabban ama
xittaa waxaa kaa nixin kara shimbir hadday kaa horboodo. Wixii Nabi Muuse
(CS) qabsaday ma fulaynimaa? Maahan waxay tusaysaa inuu yahay qof binu Aadam
ah. Waxaan sheekadan ku keenay in la ogaado baqdinta dabiiciga ah. Ka warran
haddii idinkoo meel fadhiya baabuur bareeg soo goosto oo idin soo aado? Waa
kee qofka fadhiyayaa?
Anigu Musyoka waxaan kula talin lahaa in inta saxiixa
diiddan uu saldiga booliiska ee Pangani ku xiro iyagoon muddo afar iyo
labaatan saac ah cunto la siin ka dibna laga soo saaro oo la yiraahdo saxiixa.
Waxaan shaki iiga jirin inay qalinka ku duugayaan. Ha ogaado Musyoka in qof
walba qaab loola hadlo. Haddii talada wax la iga weydiin lahaa waxaan toban
beri ku hayn lahaa xabsi ee Safari Park Hotel ma geeyeen.
Waan iska fahmaynaa cidda afka usoo gelisay SRRC-da inay
saas yeelaan waa ninka Itoobiya meesha u jooga. Laakiin annagu dad waaweyn
baan nahay waana fahmaynaa sheekada SRRC. Waa sidii gabyaagii u lahaa:
daldalool ma weydiyo waxay kaga
dareertaaye.
Marka cid dambe oo SRRC u dan la’aanaysa ma jirto. Dadka
wax saxiixaya waa inay ahaadeen intaas IGAD qorshaysay ee ah 42. Ninkii
diiddan waa inuu xabsiga aadaa. Doqonnimada SRRC waa iyagoo leh haddii
taayada la diido, qof kasta haloo ogolaado inuu wax ka saxiixo! Maxay tahay
sheekada noocaas ah. Marka IGAD iyo Musyoka waxaan dhihi lahaa ninkii diida
saxiixa xabsi dhiga, dadweynaha Soomaaliyeed oo dhan waa ku farxayaa mid
kasta oo xabsi la dhigo. Dagaal-oogayaashu waa qodxo/masaamiir nagu taagan,
mid kastoo nala ka qabto wuxuu la mid yahay musmaar ama qodax nala ka siibay
oo waxaan dareemaynaa nafis. Marka Musaveni, Kibaki, Ismaaciil Cumar Geele,
Musyoka, Kiplagat iyo beesha caalamkaay sidiinaas ku socda oo
dagaal-oogayaashu naftooda bay matalaan.
Marka dadka Kenya jooga waxaan jeclaan lahaa inaad
fariintaas Musyoka gaarsiisaan. Waxba ha isku deyina inaad u turjuntaan
gabayga ku saabsan geela ilayn ninku geel ma yaqaane, ninkii isku dayana
yuusan xabad xabad say tahay u turjumin si aysan u dhicin tii laga sheegay
ninkii maahmaahdii ahayd: ma anaa waalan mise Cadan baa laga heesayaa
sideedii u turjumay oo yiri: am I mad or is someone singing in Eden?
Mahadsanidin.
C/Waaxid C/hi Khaliif
London, UK
cabdulwaxid@hotmail.com
AFEEF: Aragtida qoraalkan waxaa leh qoraaga ku
saxiixan
Faafin: SomaliTalk.com |Jan 29,
2004
QORAALADII HORE EE CABDULWAAXID
.
XAMAR DAAWO DACALLADA...
SAWIRRO....