Madaxweyne C/laahi Yuusuf Axmed ayaa khudbad uu ku soo beegay Maalinta Nabadda Adduunka “21-ka September” ku shgeegay in ay waajib muqaddas ah tahay Nabad lagu soo dabaalo dhammaan geyiga Soomaaliyeed.  Neef wayn ayaa ka soo go’day, yididiilana way ku beertay, dad badan oo ka rajo dhigay wada-hadal lagu af-jarayo khilaafka oo dhex mara 2-da garab ee Dowladda, kadib markii  M. Yuusuf uu ku dhawaaqay in cid walba al-baabka loo garaaci doono, lagana baryi doono  Nabadda.  

    Khudbaddii  “ 21-ka September” ee M. Yuusuf, Waxaa lagu qiimeeyey tii ugu dabacsanayd ee soo dhaafta dibnaha  M. Yuusuf, mudadii Sanadka ahayd ee uu xilka hayey. Ma’ahanse markii ugu horaysay ee  Ereyo loo riyaaqo ay ka soo yeeraan M. Yuusuf,  14-kii October 2004, Xafladdii caleemo saarkliisa wuxuu ku sheegay in wuxuu horay u ahaaba maalinkaas iyo wixii ka danbeeya looga tashado Nin nabadeed.  Taas oo wax badan ka bedeshay fikraddii ay Soomaali badani ka qabtay Madaxweynaha. 

    Sida: - “ Caawa Nin iga Hub badan Soomaali kuma noola, 37 sano nabad ma’arkin, sidaas darted Nin iga Dagaal yaqaan ma jiro. Daad baa socdee, ciddii ka wareegi waysa, dee daadku ha qaado. 5-nin iyo wax la mid ah loo fadhin mayo. Meleeashiyooyinka reer Puntland waa Ciidamadii Qaranka, kuwa Hoggaamiye kooxeedyada Xamarse lama aamini karo.  Dib u laaban mayno, jeeraan hadadafkeena ka miro dhalino, ee ciddii na hor istaagi lahayd ha is diyaariso.I.W.M.”  

    Hoggaamiye waliba wuxuu leeyahay hadaf, bartilmaameed iyo xeelad uu adeegsado,  marka ay timaado hirgelinta doonistiisa nuucay ahaataba.  M. Yuusuf, oo ah Askari huwan darajada G/sare, marka la eego sida uu isaguba qirtay in uu yahay Ninkii ugu horeeyey ee Qaranka Xabbad kala hortaga, laguna biiriyo isku daygii nicisoobay ee  Raggii uu ku jiray ay doonayeen in ay ku af-genbiyaan Kacaankii jaale Barre 21 April 1978-kii. Iyo in uu aaminsanaa in uu Punt land xoog ku haystay maadaama Jaamac Cali Jaamac oo si Xor ah loo doortay markii danbe, uu meesha ka saaray. Maankana ku hayo kool kooliskii faraha badanaa ee uu kla kulmay IGAD iyo Dowladihii kale ee Shirka wax ka fududaynayey intii shirkii dib-u-heshiisiinta Kenya ka socday, in uu ku helay kool kooliskaas Hubkiisa tirada bdan iyo Xukunkiisa adag. Dibna loo qooraan sado hadalkii uu jeediyey intii uu ku jiray Ololihiisa doorashada ee ahaa “ Dalkani habaar qabe hantiya ayuu u baahan yahay, ee Wadaad miskiin ah waxba kama qaban karo”  iyo Codsigiisii ugu danbeeyey shirkii Golaha loo dhanyahaye ee QM 17kii bishan Sebtember, uu kaga codsaday in Cuna qabataynta Hubka laga qaado Soomaaliya. Dad badan ayaa qaba  Taariikhdaas ku dhisan xoog wax ku doonka ee uu ku caan baxay Madaxweyne Yuusuf, in ay adagtahay si fudud oo ay mar qura isku bedesho. 

    Waxaa la’iswaydiin karaa maxaa dabacsanaanta tirada bdan ee aan Colnelka horay looga baran ku xanbaaray xiligaan?   Sida  Xeeldheerayaal odorosa Arimaha Siyaasadda ay ku doodayaan, 2-ba qodob oo aad iskugu dhow ayaa saldhig u ah  dabaca Madaxweynaha. 

1. Shir sanadeedkii golaha loo dhanyahay ee QM, ee M. Yuusuf uu ka qayb galay Madaxdii iyo Wakiiladii ay kulmeen oo ay ku jiraan qaar metelayey Dowladaha waawayn, waxay ku booriyeen in uu wada-hadal u furo dhinacyaada is haya ee Dowladda, iyagoona farta ugu fiiqay in Xabadda ugu horaysa ay lumin doonto Mansabkiisa. “Qorshaha Odaygu waa cad yahay, waxaase dhibaysa in Jagadii uu kifaaxa iyo halganka dheer u soo maray, ay ku dhaafto si sibiq ah”. Taasi waa dooda Odorasayaasha Arimaha Sisaasadda.

2. Madaxweyne yuusuf, waxaa ku adkaatay bay leeyihiin in uu markiiba helo cadadka Ciidan iyo Saanadda Hub ee uu   muran la’aan uu wax ugu muquunin lahaa waqti kooban, sababo la xiriira Cunaqabataynta Hubka oon weli la qaadin iyo qaylo dhaan sheegaysa in Madaxweynuhu uu garabka ka soo horjeeda qorsheeyanyo Weerar uu ku asqeeyo, taas ooo si toos ah ugu dhacaysa dhegaha Beesha Caalamka.  Hadaba Madaxweyne Yuusuf inta arintaasi uga hirgelaysobay leeyihiin, amase uu isaga duwanyo Ciidamo qabiil iyo kuwo uu ka helo Dowlado deris ah, wuu ku qasbanyahay in uu af-ku-malable ahaado, islamarkaasna  Caano qaboob u shubo Cadawgiisa, si ay hurdo dheer ula dhacaan. Xaajaduse waxay u dhamaanaysaa Murtida oronaysa " Bahal cayriinka madaayo, Ninna caadadii ma daayo"

     Isku soo duuboo, inkasta oo Madaxweyne Yuusuf uu san soo hadal qaadin Qodobadii Dastuuriga ahaa ee laysku hayey. Hadana la arki doonee waxa ay khudbadaas quruxda badani ka tarto Xaaladdda murugsan ee ka dhexjirta Golayaasha Dowladda. Dhanka kalena saamayntiisa ayuu yeelan karaa, wax walbana sidii la filayey ayuu ka bedeli karaa Shirka ay Balcad ku yeelanayaan Hoggaamiyeyaasha ku hubaysan qaar ka mid ah Gobolada koofureed, waloow ujeedada ugu wayn ee ay ka leeyihiin ay tahay dhoola tus Siyaasadeed.

W/D: Mursal Max’ed Max’uud (Garaad) E: -mail stethy1@yahoo.com