Wararkii Puntland ee July 18, 2006
Ceelka
Conoco ee Garoowe oo Lagu iibsadey $250,000 doolar oo Keliya!!!
- DFKMG oo u muuqata mid ku kala
qaysan shirkadaha imanaya dalka iyo xilliga dalka loo samaynayo sharciga
shidaalka....
(Garoowe: July 18, 2006):- Wararka
ka imanaya magaalada Garoowe ayaa tibaaxay in Isniin July 17, 2006 in
shirkadda Range Resources ay "siisay" Dowlad Goboleedka Puntland
lacag lagu sheegay in ay dhan tahay $250,000 (Laba-boqol iyo konton kun oo
doolar oo keliya), lacagtaas oo la sheegay in ay shirkaddaasi u bixisay "Dhismaha
Garoonka Diyaaradaha ee Garoowe". Waxaana la sheegay in lacagtaas lagu
wareejiyey "isimada Puntland", goobta lacagtaas lagu wareejiyena waxaa la
sheegay in ay joogeen madaxweynaha DFKMG, Cabdullaahi Yuusuf Axmed &
Waftigiisii Baydhabo ka tegey iyo madaxda ugu sareysa maamulka DGPL.
Waxaa reer Garoowe arrin ka yaabisay ku
noqotay sababta kalliftay in lacagtaas lagu wareejiyey 'isimada' si ay u 'maamulaan'
ayadoo ay joogto xukuumaddii dadka oo dhan u dhexeysay oo lahayd hay'adaha
kla duwan. Waxaana lagu tilmaamay arrin majara habaabin ah.
Waxaa durbadiiba soo baxay in aysan isimada
Puntland u dhamayn arrintaas, ayna ka dhacday arrin lagu tilmaamay 'fadeexad'
cusub oo soo wajahdey xukuumada Puntland oo qarineysa xaqiiqada dhabta ah ee
ka dambeysa ficilladeeda.
Nin mas'uul ah oo weydiistey in aan la
magacaabin ayaa SomaliTalk.com soo gaarsiiyey qoraal u qornaa sidan: "Khayraadka
Puntland waxaa laga siistey reer Puntland labo boqol iyo konton kun oo
doolar, fadeexad ayaa ka dhacdey, arrintaas reer Nugaaleed waa ku kala
qaybsanyihiin. Isimada reer Nugaaleed arrintaas uma dhamayn. Waxaana (Qaar
Reer Nugaaleed ah) looga gatey sidii isticmaarkii odayaasha reer baadiyaha u
siin jirey xogaaga lacagta ah. Waa khayraadka Puntland oo la siistey 250,000
oo la siiyey qaar kamid ah odayaasha reer Nugaaleed sidii loo isticmaali
lahaa ceelka Conoco." ayuu yiri.
Waxaa kale oo reer Puntland is weydiiyeen
sababta kalliftey in la yiraahdo reer Nugaal ayaa lacagtaas yar la siinayaa
ayadoo arrimo la xiriira shirkaddan ay ku dhinteen dad reer Puntland ah,
gaar ahaan iska hor imaad ka dhacay aagga Majayahan oo aan weli la xallin.
Dadka siyaasadda Puntland u kuur gala waxa
ay arrintaan ku macneeyey in ay jiraan afar arrimood oo is dhican socda oo
ah:
- Dowlad Goboleedka Puntland oo aan
rabin inay caddeyso meesha ay martay lacatii hore shirkadda "Range
Resources" looga qaatay oo ahayd ugu yaraan
$3 million oo doolar. Haddii taas
la isku soo qaadona ay dadka xusuusiyaan in ay isimada Puntland u
dhiibeen rubuc malyan. Sidoo kale in ay DGPL la weydiin saamiyada
shirkaddii "Consort ltd" maadaama ay hadda saamiyadii ay "Consort" ku
lahayd xuquuqda macdan iyo shiraal baarista Puntland lagu wareejiyey
shirkadda "Range Resources" oo ah mid saamiyadedada lagaga ganacsado
suuqa Australia ASX [www.asx.com.au],
ganacsigaasna ay qayb ka noqoneyso magaca shacabka Puntland, waxaana
qorshaha dowladu yahay "Reer Nugaaleedood Af wax cunay xishoo", umana
socono Majayahan.
- Dowlad Goboleedka Puntland oo si
xooggan u rabta in ay hesho saxiixa Madaxweynaha DFKMG - saxiixaas oo la
rabo in C/Laahi Yuusuf uu ansixiyo heshiiskii
sagaalka qodob ka koobnaa ee
madaxweynaha DGPL uu sida degdeg ah uga ansixiyey Golaga Baarlamaanak
Puntland July 12, 2006. Madaxweynaha DFKMG ahna la tusa sida ay
shirkaddani ug aqayb qaadaneyso 'dhismaha dalka' madaam alacagtaas
hirtiisa lagu bixiyo, la oranayo indhahaagaa kuu macallin ah ee
madaxweynoow shirkaddan u saxiix heshiiska. Waase arrin aan sahlanayn in
Madaxweyne Cabdullaahi Yuusuf uu heshiiskaas markiiba anisixiyo, waayo
haddii uu anxisiyo waxaa halkaas ka dhalan kara arrin xagga sharciga ku
soo laaban doonta xukuumadda Federaalka Soomaaliya (Sida: Shirkaddii
Conoco oo heshiiska dowladii hore ee Soomaaliya la gashay oo ay hadda
xogteedii la wareegeyso 'Range Resources' iyo ayadoo aan weli
baarlamaanka DFKMG ee Baydhabo aysan ka doodin ansixinta xeerka lagu
maamulayo macdanta iyo shidaalka dalka - sababtana aan ku arki doono
qodobka 4aad ee hoose.)
- DFKMG oo u janjeerta shirkadda cusub
ee kusoo biirtay tartanka shidaalka, taas oo ah CNOOC oo ah shirkad ay
leedahay dowladda shiinaha, shirkaddan oo ah mid ka weyn tan ay
DGPuntland wadato ama saamiyada ku leedahay ee "Range Resources".
Haddaba maadaama marka la is barbar dhigo "CNOOC" iyo "Range", ay ka soo
baxayso CNOOC in ay tahay shirkad wadata dowlad xoog leh oo dan weyn ka
leh Afrika, waa shiinaha'e, ayna dhici karto in ay weydiisato in ay
ayaduna rabto in ay baarto ceelka "CONOCO" ayaa waxaa halkaas ka soo
baxaya waxa luqadda qalaad loogu yeero "Conflict of Interest" - [oo
la macne ah: qof meel lug kula jira dhex-dhexaad kama noqon karo u gar
niqidda meeshaas uu lugta kula jiro iyo meel taas ka soo hor jeeda] -
maadaama odayaashii reer Nugaleedna lacag beec xir iyo af gobaadsi ah la
siiyey, dowalduna ay saami ku leedahay "Range". (Shirkadda CNOOC ayaa ah
tan saddexaad ee ugu weyn shirkada ay leedahay dowlada Shiinaha ee
shidaalka u baara, waxaana ka weyn CNPC "China National
Petroleum Corporation" iyo Sinopec "China Petroleum &
Chemical Corporation". oo dhammaantood ay leedahay xukuumada
shiinaha.) - [Isbar-bar dhig qiimaha saamiyada ee Range Resources ee
suuqa ganacsiga ee Australia: ASX (RRS
= AU$0.033 : 17/7/2006) iyo saamiyada CNOOC ee suuqa ganacsiga ee New
York: NYSE (CEO
= US$79.45 : 17/7/2006)].
- DFKMG oo u muuqata mid ku kala qaysan
shirkadaha la keenayo dalka. Madaxweynaha DFKMG, Cabdullaahi Yuusuf
Axmed, ayaa u muuqda mid u janjeeraa dhanka shirkadda reer Shiine ee
CNOOC, halka Ra'iisul wasaaraha DFKMG, Prof. Cali Maxamed Geeddi iyo
rag ka tirsan safaaradda Soomaalida ee Nairobi, Kenya ay u janjeeraan
laba shirkadood oo mid laga leeyahay dalka Kuwait oo la yiraahdo "Kuwait
Energy" [www.kuwaitenergy.com.kw],
tan kalena laga leeyahay dalka Indonesia oo magaceeda la yiraahdo
MEDCO [www.medcoenergi.com]
- Arrintaas weeye tan loo malaynayo in ay tahay sababta keentay in dib u
dhac ku yimaado in baarlamaanka DFKMG ee Baydhabo la hor geeyo sharcigii
macdanta/shidaalka ee DFKMG loogu soo agaasimey magaalada dalxiiska ee
Malindi, Kenya ee loo dhiibey ra'iisul wasaare Geeddi.
Halkaas waxaa ka soo baxaya in arrintu
aysan ahayn sida ay korka sare uga muuqato iyo $250,000 ay tahay mid wax
weyn ku hoos qarsoon yihiin, aana loo cadayn shacabka.
Hadal dhex maray laba qof oo maqlay in
$250,000 loo dhiibey isimada Puntland ayaa ahaa:
- Mid ayaa yiri: War nin yohow arrintan
si aysan reer Nugaaleed ugu fadeexadoobin madaama lacagta $250,000 loo
dhiibey isimada oo aysan ahayn lacag dawladeed aan ku talino in
lacagtaas loo geeyo reer Majayhan iyagaa ku haboonaan lahaa in lagu
maslixi lahaaye?
- Kii kale ayaa la soo boodey: War
heedhe reer Majayahay soor quureed ma qataan!.
Faafin: SomaliTalk.com | July 18, 2006 |
Updated..
Daabaco
Boggan | Print
