|
Waftigii Jaamacadda Bariga Afrika oo Booqday
Atlanta, Geargia
C/Weli C/raxmaan Geyre oo ka hadlay
xafladaas
[qaybtani waa hordhac sidii uu shirkii u
dhacay faahfaahinta waxaan ka sugeynaa Mahdi Warsame oo kamid ah
qabanqaabiyayaashii xafladda Atlanta]
Xaflad aad u ballaran oo ay soo qabanqaabiyeen
jaaliyadda Soomaaliyeed ee ku dhaqan magaalada Atlanta ee gobolka Geargia ayaa
galabnimadii sabtida [Jan 25] lagu qabtay halkaas, taas oo ay kasoo qaybgaleen
wafti kasocda Jaamacada Bariga Afrika oo maalmahaan booqashada ku joogey
Mareykanka.
Bahda SomaliTalk oo la xiriiray
qabanqaabiyayaasha xafladii galabtay, gaar ahan mahdi Warsame, ayaa sheegay in
ugu horayn xaflada lagu furay quraan iyo wacdi uu soo jeediyey Maxamed Aadan
Nuur.
Xiriiriyaha xafladda galabtay waxaa ahaa
CabdiKhadar. waxaana xafladaas ka hadlay aqoonyahanada iyo odayaasha
Soomaaliyeed ee magaaladaas ku dhaqan.
C/isaaq Maxamuud Dareewal oo wax ka dhiga
Jaamacad kutaal gobolka Georgia, kana mid ah xubnaha ugu firfircoon Jaaliyadda
Soomaaliyeed ee gobolkaas, ayaa ka mid ahaa dadkii ka hadlay kulanka, waxana uu
hadaladiisii siweyn ugu soo dhoweeyey Jaamacada Bariga Bariga Afrika.
C/Weli C/raxmaan Geyre oo ah hormuudka kuliyada
ganacsiga ee Jaamacada Boosaaso oo ah hormuudka waftiga Jaamacada ee waqtigaan
booqanaya Maraykanka oo 24kii bishan ka dhoofay Minneapolis ayaa asaguna
xafladaas Atlanta ka hadlay asagoo Soomaalidii halkaas isugu timid usoo
bandhigay sababta safarkiisa, halkaasna ugu soo bandhigay warbixin la xiriirta
Jaamacadda.
Dr. Xasan Cali Mire oo ahaa wasiirkii
waxbarashada ee ugu horeeyey dawladii Siyaad Barre ayaa asaguna xafladaas kasoo
jeediyey hadal dheer oo kusaabsan taariikhdii tacliintii Soomaaliyeed iyo
fikradihii uu ka aaaminsanaa dhismayaashii Jaamacadaha Soomaaliya. Tusaale waxa
uu Dr. Xasan u soo qatay gobolka Georgia oo ay kuyaalaan dhawr iyo soddon
goobood oo tacliin sare (jaamacado iyo machadyo). Waxana uu muujiyey sida ay
aqoontu wax u hogaamiso. Siweyn ayuuna u dhiiri geliyey in la taageero Jamacadda
Bariga Afrika ee Boosaaso.
Shir gaar ah ayaa markale Jaaliyaddu u
balameen, kaas oo ku saabsan sidii ay usii wadi lahaayeen taageeridda Jaamacadda
Boosaaso.
Sidii uu shirku u dhacay oo faahfaahsan waxaa
inoo soo tebin doona Mahdi Warsame, insha Allah, ee lasoco SomaliTalk.
C/Weli C/raxmaan Geyre intii uusan u dhoofin
Atlanta waxa uu SomaliTalk u sheegay in Jaamacaddu ay casumaad ka heshay
Jaaliyadda Soomaaliyeed ee Geargia, uuna ku faraxsanyahay in uu booqdo. C/Weli
waxa u qorshaysan in uu kusoo laabto Minnesota, kaddiba u dhoofo gobolka
Michigan, kaddiban dib ugu laabto Boosaaso iyo Jaamacadii uu waftiga u ahaa ee
Bariga Afrika.
WQ. Maxamed Cali
SomaliTalk.com
Minneapolis, MN, USA
| 
