Daabaco Boggan | Print

Barnaamijkii Radio Xoriyo

19 August. 2005 

• Xaflad lagu xusay sanadguurada 21aad ee JWXO oo ka dhacdey Magaalada Musawac. 

•  Xisbiyo magac u-yaal ah oo doorashada Ogaadeenya qaadacay. 

• Suudaan oo si qarsoodi ah u celinaysa ciidamo Itoobiya ka soo goostay. 

• Qaramada Midoobey oo ka digtay xaaladda Soomaaliya.

• iyo Barnaamijkii Aragtida Halgamaaga.

====================== 

 Habeenimadii khamiista ahayd ee taariikhdu ku aadanayd Aug 18, 2005 ayaa  hoolka shirarka ee Jaaliyada Soomaalida Ogadenya ee Gobalka Musawac ee dalka Eritreya lagu qabtay xaflad si aad ah loo soo agaasimay oo lagu maamuusayay sanad guuradii 21aad ee ka soo wareegtay aasaaskii JWXO, xafladaas  ayay kasoo qaybgaleen dad aad u tiro & tayo badan oo isugu jiray qaybaha Jaaliyada & bulshadaba.  

Hawlwadeennada Jaaliyadda Ogaadeenya ee magaalada Muswac ayaa warbixino ku saabsan marxalada halganku marayo & taariikhda halganka JWXO halkaas ka soo jeediyay.

Sidoo kale waxaa halkaas riwaayd aad loola dhacay ku soo bandhigtay kooxda Halgan ee JWXO. Riwaayadaas ayaa waxaa loogu magac daray [HAGARDAAMO GUMAYSI HALGAMAA WAXMAYEESHO} .

Ugu danbayntiina waxaa halkaas lagu soo gabagabeeyay aabaalmarino kala duwan oo lagu gudoonsiiyay xubno si aad ah loogu bogay wax qabadkoodii halgan ee Jaaliyada.

Xisbiyo magac u-yaal ah oo doorashada Ogaadeenya qaadacay. 

Seddex ka mid ah xisbiyada magac u-yaalka ah ee ashkkaasta goonida ahi  jeebka ku wataan ayaa sheegay inay qaadacayaan doorasho ku sheegta laga qabanayo dalka Ogaadeenya. Xisbiyadan ayaa sheegay in qaadacooda ay sabab u tahay iyadoo taageerayaashooda loo hanjabay,qarkoodna si cad loogu sheegay inaysan is daalinin oo aysan kusoo baxaynin doorashada xataa hadii shacabku soo doorto, isla markaana qaar badan oo ka mid ah waraaqaha doorashada lagu kala iibsanayo suuqyada dalka. 

Ka dib markii aan xaaladda qiimaynay waxaan go’aan ku gaadhnay inaan doorashada qaadacno, si aan dadkayaga uga badbaadino masiibo la soo gudboonaata, sidaas waxaa bayaan wadajir ah ku sheegay seddexdan  xisbi ee magac u-yaalka ah. 

Masuul u hadlay mid ka mid ah xisbiyo ku sheeggaas ayaa sheegay in ugu yaraan 10,000 oo kaadhadhka doorashada ah la xaday, qaar badan oo kalana suuqyada lagu kala iibsado.

Masuuliyiinta xisbiyo ku sheeggan ayaa sidoo kale xafiiska doorashooyinka Itoobiya ku eedeeyay inuu gacan siinayo dawlada. 

Doorasho ku sheegta ay Itoobiya doonayso inay ku hafarto dadwaynaha Soomaalida Ogaadeenya kama duwanaan doonto kuwii hore ee magac u-yaalka ahaa, waxaanan xilli aan sidaas u fogayn soo tebinay warbixino xaqiijinayay in waraaqaha doorasho ku sheegta la geeyay xeryaha ciidammada Itoobiya ee ku sugan dalka Ogaadeenya, halkaas lagu soo buux-buuxinayo, ka dibna laga dhigi doono in doorashada uu dadwaynuhu ka qayb qaatay. 

Warbixinihii noocaas ahaa een soo tebinay waxaa marag u ah qaylada ka soo yeedhaysa madaxda xisbiyo ku sheegga ku wareegaysanaya dariiqyada magaalada Jigjiga oo xilliyo badan oo hore dadwaynaha ka dhaadhicin jiray in Itoobiya ay dimuqraadiyad ka jirto, isla markaana ay soo dooran karaan cidda ay doonayaan. 

Suudaan oo si qarsoodi ah u celinaysa ciidamo Itoobiya ka soo goostay. 

Xukuumadda Suudaan ayaa si qarsoodi ah go’aan ugu gaadhay inay dib u celiso 12 askari oo ka soo goosatay taliska Addis Ababa, kuwaasoo qoxootinimo u yimid magaalada Kassala ee dalka Suudaan shan bilood ka hor. 

Askartan la celinayo waxay kala yihiin:

• 1- Dereje Bogale

• 2- Walelign Melkie

• 3- Cabdi Idiris

• 4- Semre Aweke

• 5- Derin Endalew

• 6- Alebachew Mengistu

• 7- Solomon Tesfaye

• 8- Maxamed C/qaadir

• 9- C/llaahi Sayid

• 10 Jamaal Axmed

• 11-  Mamo Enyew

• 12- Iyo Ibraahim Cali

Xukuumadda Suudaan ayaa heshiis la gashay taliska EPRDF ee Addis Ababa ka taliya, isla markaana ciidammada ammaanka ee EPRDF u oggolaatay inay askartan ugu tegaan xabsiyada ay ku jiraan, oo ay sawirro ka qaataan. 

Dawlada Suudaan hadda ka hor ayay EPRDF u celisay dad qoxootinimo dalkeeda u joogay, kuwaasoo markii denbe uu laayay taliska Addis Ababa, haddana waxaa laga cabsi qabaa in askartan la toogto haddii Itoobiya lagu celiyo. 

Qaramada Midoobey oo ka digtay xaaladda Soomaaliya.

Qaramada Midoobey ayaa ka digtay macaluul laga yaabo inay ka dhacdo qaybo ka mid ah dalka Soomaaliya, iyadoo dad lagu qiyaasay hal milyan oo qof ay qarka u saran yihiin cunto la’aan iyo hoy la’aan.

Dadkaasi lagu qiyaasey halka milyan ee soomaalida ah ayaa waxaa soo wajaheysa cunto yari, hoy la’aan iyo daruuriyaadka kale ee nolosha, waxaana ugu wacan iyadoo dalaggii beeruhu uu yaraaday iyo dagaallo ka dhacay guddaha dalka Soomaliya.

Warbixin arrintan laga soo saaray ayaa tilmaantay in cunta yarida iyo waxyaabaha kale ee nolosha daruuriga u ah oo aan jirin iyo gargaar bani’aadanimo oo aan la geynin meelaha looga baahan yahay ee dalka Soomaaliya ay sababeen inay adkaato in wax loo qabto dalka Soomaaliya.

Qaramada Midoobey ayaa sheegtay inay heshay lacag ka yar lacagtii loo baahnaa ee  wax looga qaban lahaa dhibaatooyinka Soomaaliya, sidaas darteed waxay mar kale dalalka deeqda bixiya ka dalabtay lacag kale oo dhibaatadaas wax looga qabto.

Qaramada Midoobey waxay sheegtay in biyaha, nadaafada, ammaanka iyo waxbarashadu ay yihiin kuwa aan loo haynin dhaqaale lagu maareeyo. Waxay kaloo intaas ku dartay in dad ku dhaw hal milyan oo qof oo soomaali ahi ay kaalmo degdeg ah u baahan yihiin.

 Radio Xoriyo

19 August. 2005

C/nuur Sh. Mohamed

radioxoriyo@ogaden.com
raadioxoriyo@yahoo.com

Radio Xoriyo waxaad ka dhegaysan kartaa Mawjadda 19 MB ee dhererkeedu yahay 15670 KHZ, Maalmaha Talaadada iyo Jimcaha 7: 30PM waqtiga Afrikada Bari

Faafin: SomaliTalk.com | Aug 19, 2005

Maxaad kala socotaa Dastuurka la isku heysto Wadanka Ciraaq?
Waxaa dhibka taagan yahay sidii loo saxiixi lahaa Dastuurka Ciraaq, hadaba maxaa la isku hayaa? ...Guji... Aug 19

Gabar Soomaaliyeed oo Norway Ku Dishey Wiil Soomaliyeed
Wiilka waxaa saakay meydkiisa laga helay. Guji....

Xisbiyada mucaaradka Itoobiya oo diiday natiijada doorashada
iyo Suxufi loo xidhay warar uu maxkamadda Itoobiya ka sheegay ... Guji... Aug 12

Soomaalida Maraykanka oo Loo Ogolaaday In ay dib u Xerayn karaan Sharciga TPS
Dowladda Maraykanka ayaan bishan August waxay dib u ogolaatay in dadka Soomaalida loo siyaadiyo.. Guji... Aug 12

BAARID | SEARCH