Daabaco Boggan | Print

Habka Internet-ka Loogu Beec-mushtaro 

• W/D: Suldaan Nayruus Xaaji Aadan
           Karachi, Pakistan
  E-mailto: suldan25@hotmail.com

  ---

     Labadii qormo ee ka horreysay qormadaan, ayaan mid waxaan si kooban ugu lafa-guray faa’idada iyo khasaaraha Cilmiga Farsamada iyo Wax-soo-saarka cusub (Technology-ga). Tii xigtayna waxaan ku eegay qaabka uu Internet-ku nolosha wax uga badalay, anigoo ka faalleeyey seddeed qaybood oo ka mid ah nolosha Aadanaha, oo Internet-ku saamayn weyn ku yeeshay. 

     Waxaan qormadaan si kooban uga sheekeyn-doonaa habka Aaladda Internet-ka luugu beec-mushtaro ama wax loogu iibiyo. 

    Dadku waxay hadh iyo hamayn u harjadaan sidii ay ku heli lahaayeen ribix ama macaash, waxay hantidooda ku biimeeyaan meel allaale iyo meeshii ay si-dhahaan faa’ido ayaad ka helaysaan, iyagoo u gala safarro dhaa-dheer, kuna bixiya fakar iyo waqti badan. Is-biimaynta noocaan ah ayaa dadku kol-na ku macaashaan kol-na ku khasaaraan. 

     Haddaba waxaa jidha qaab kaloo loo beec-mushtari karo. Adigoon safrin, meel dheerna tagin, gurigaagana jooga, waqtina kaalumin, ayaa waxaad soo-saadho u beec-geyn kartaa meel walba oo dunida ka mid ah. Qaabka noocaan ah ee fudud ayaa waxaa kuu sahlaya Aadda Shabakadda Caalamigaa (Internet-ka). 

     Internet-ku waa sayladda ugu weyn oo caalamkoo idili ay wax ku kala iibsadaan. Waxaa jidha website-yo fara-badan oo waxaad soo-saadho ku beecin kartid (haddii aad adigu abuuratana kaba sii fiican). Website-ka ugu weyn uguna caansan ee aad wax ku beecsan karto kana soo iibsan karto ayaa waxaa ladhahaa eBay. 

    EBay-gu waa hannaanka ugu fudud, uguna wacan ee aad alaabtaada caalamka oo dhan ku gaarsiin karto, kana samayn karto macaash. Haddaba si aad alaabtaada ugu xadhaashto eBay-ga gal website-kiisa: www.ebay.com. 

    Waa in aad is-ka diiwaan-galisid eBay-ga si aad awood ugu heshid in aad alaabtaada ku iibiso. Is-diiwaan-galintu wax dhiba malahan, maxaa wacay waa lacag la’aan. Kol-kaad is-ka diiwaan-galiso eBay-ga, waxaa lagaa codsanayaa macluumaadka meelaha lagaala soo xidhiidhi karo (waa cinwaanadaadee). Markaad arrintaas samayso hubi E-mail-kaaga, eBay wuxuu kuu soo didhi doonaa farriin xambaarsan tilmaan-bixin. 

Qaabka wax loogu iibiyo eBay-ga 

1)      Inta aadan wax-ba bilaabin ka hor waa in aad heshid alaabta aad rabto in aad iibiso. Ku samee baadhis (Research) eBay si aad u hesho qiimaha suurto-galkaa ee aad alaabtaada ku iibin karto iyo meesha ku habboon in aad dhigto. Baadh alaabaha lamidkaa alaabta aad rabto in aad iibiso si aad u ogaato iibiye-yaasha kale meesha qiimaha ay ka bilaabeen iyo dabaqadda ama qaybta alaabtoodu taallo. Ogow alaabaha lagu iibiyo eBay-ga waxaa ugu ribix-badan alaabaha qaddiimigaa ee qiimiga-badan (antiques), kuwa dhaqanka (cultural product) iyo dharka farsamada (textiles). Maxay kula ahaan lahayd: haddii aad ku beecin lahayd eBay-ga alaabaha Hiddaha iyo Dhaqanka Soomaali-ya. Fartaada ayaad malab ka nuugi lahayd. 

Xasuusin: ha ballan-qaadin in aad iibiso walxo aadan awodin in aad soo-saadho, taasi waxay arbushaysaa sharciga, malluugaaga eBay-gana meel ayey uga dhacaysaa, dadkuna waxay ka qash-dhacayaan in ay kula macaamilaan. 

2)      Waa in aad liis-gareysaa alaabtaada. Way fududahay habka loo buuxiyo foom-ka (form) iyo waliba sida aad alaabtaada u liis-gareyn lahayd. Kol-ka aad alaabta liis-gareynayso, waxaa loo baahan-yahay xoogaa qarasha, sababtoo ah markaad liis-gareynayso alaabta, eBay wuxuu kugu dallacayaa xoogaa yadh oo qarashka galinta ah (a small insertion fee). Haddii alaabta lagaa gatana, eBay wuxuu markale kugu soo dallici-doonaa qiimaha qarashka ugu dambeeya (final value fee). Si aad qarashaadka wax uga ogaato halkaan Guji: http://pages.ebay.com/help/newtoebay/questions/sell-items.html   

3)      Waa in aad u goysaa sicir ama qiimo alaabtaada, adigoo qiimahaad goysay uu lamid noqonayo, qiimaha ay kuu joogtay alaabtu lagu daray qarashaadka lagu daray macaashka aad dul-saaranayso (cost +fees + small profit margin). 

4)      Markii aad liis-gareynta alaabta dhammaysid, kuna qanacdid qiimaha aad u goysay kala xidhiidh macmiishaada E-mail-ka, una ogalow iibsade-yaashaada in ay ogaadaan wadarta ama isu-geynta qiimaha alaabta oo ay ku jidho qiimaha aad ugu raraysid oo aad ku gaadhsiinaysid gatahaaga (shipping cost). 

     Waad waydiin kadhaa qofka kaa gadanaya alaabta in uu is-ticmaalo website-kaan: www.ikobo.com, si uu kuugu soo diro lacagta. Website-kaan ayaa ah site lacagaha caalamigaa lagu kala badasho, waana habka ugu dhakhsiyaha badan ee lacagaha la isugu xawilo. Way jidhaan siyaabo kale sida: Jeegga, pay order, bank draft IWM. 

     Markaad heshid oo ay ku soo gaadho lacagta, ugu dir alaabta cinwaanka iibsade-haaga adigoo E-mail ugu sharxaya dhamman alaabta aad u dirtay. 

Waa sidaas iyo siyaalo lamid ah “Habka Internet-ka Loogu Beec-mushtaro” 

 Hadda waxaad sugtaaba waa adigoo ka war-doona ku ganacsiga Internet-ka. 

W/D: Suldaan Nayruus Xaaji Aadan

         Karachi, Pakistan

E-mailto: suldan25@hotmail.com

         Or:  suldan25@yahoo.com

Faafin: SomaliTalk.com | July 5, 2005 ###

Ciidamo Ka Socda Dunida Islaamka oo Nabad Ilaalin ah oo Loo Dirayo Soomaaliya
»Qodobo kasoo baxay kalfadhigi 32aad ee dalalka islaamka
»Hargeysa: Eng. Cismaan Hindi oo isu soo taagey doorshada..
Warka oo dhan ka akhri halkan.. Guji July 2

Cabdi Sheikh Bahalow "Kenya waxay u Burburineysa Somaliya si aan looga hadlin NFD: Cabdi Bahalow waxa uu ka tirsan yahay xisbiga haya talada kenya, waxana uu madax ka yahay ururka nabad raadinta geeska afrika. Waraysiga waxaa qaaday Mumtaz: dhegeyso

BAARID | SEARCH