Wakiilada dawladda ku meel gaadhka ah ka jooga shirka dibu heshiisiinta soomaalida ee Eldoret ayaa gaashaanka ku dhuftay go’aankii shalaytoole ka soo baxay gudiga farsamada Igad ee ergooyinka wejiga labaad ee shirka ka qayb gelaya soomaalida loogu qaybiyey Hab Qabiil taas oo markii loo soo ban dhigay kooxaha soomaalida aysan jirin cid dood ka keentay, laakiin TNG oo ilaa iyo habayn hore shir ku jirtey ayaa shaaca ka qaaday inaysan ku qanacsanayn in lagala mid dhigo kuwa qabiilka wax loogu qaybinayo.

Raysal wasaaraha dawladda ku meel gaadhka ah Mr. Xasan Abshir faarax ayaa maanta shir jaraa’id oo uu qabtay ku caddeeyey muwqifka TNG wuxuuna sheegay inay doonayaan in iyaga TNG ahaan wax gaar ah loogu qoondeeyo maadaama aysan ahayn qabiil, wuxuuna carabka ku dhuftay inaysan waxba ka qabin soomaalida kale in qabiil wax loogu qaybiyo. 

Dawladda ku meel gaadhka ah oo goor hore ku jirtey kooxaha u ololaynayey in hab qabiil ergooyinka lagu qaybiyo ayaan la ogayn wax ay uga jeedaan diidmadan ay maanta soo ban dhigeen, waxayse wararku sheegayaan inay cabsi weyni uga muuqatay inuu qabiilkan wax lagu qaybsanayaa dawladnimadooda galaafto. 

Qabiilooyinka kale ee soomaalida ayaa ku jira wada tashi ay kaga wada hadlayaan sida ay ka yeelayaan go’aankan cusub ee hadda hor yaalla.

Dhinaca kale waxaa maanta dib u dhacay safar uu Cabdillaahi Yuusuf ku tegi lahaa Puntland taas oo ay sabatay diyaaraddii ay raaci lahaayeen oo ay ciladi gashay isla markaana ku yaraatay weftigii la socday oo u badnaa golihiisa wasiirada oo la doonayey inay hor tagaan baarlamaanka Puntland si loo soo ansixiyo. Ujeedada kale ee ugu weyn safarka Cabdillaahi Yuusuf ayaa ah inuu soo xaliyo dhibaatooyinka ka dhashay lacagta been abuurka ah oo la sheegay inay qalaase weyn ka dhalisay deganaanshihii gobolka Puntland. Cabdillaahi Yuusuf iyo weftigiisa oo saaka laba saac oo subaxnimo tegey garoonka diyaaradaha ee Eldoret ayaa halka ay degan yihiin dib ugu soo laabtay Shan saac oo barqdii ah.

Waxayna weftigu hadda u xidh xidhan yihiin inay berri subixii u duulaan carriga Puntland, wuxuuna madaxweyne ku xigeenka Puntland Mr. Maxamed Cabdi Xaashi oo la wareegey hogaanka weftiga Puntland ii sheegay inuu Cabdillaahi Yuusuf Todobaad kaddib soo noqon doono.