Gerhard Muller oo u dhashay waddanka Germany waxa uu dhashay 3-dii Bishii November 1945-kii, waxaana uu weerarka uga ciyaari jirey xulkii Qaranka West Germany, isagoo ahaa weeraryahan keligii abuuran jirey ama soo dhisan jirey Kubadda. Muller waxaa xulkiisii West Germany looga yeeray dabayaaqadii sanadkii 1966-kii, wuxuuna kulankii ugu horreeyey ee xulkiisa uu u saftay uu ahaa kii ay kaga hortageen xulka Turkiga, isagoo sidoo kalena xulkiisa West Germany kala qayb qaatay laba Koob Adduun ee kala ahaa 1970-kii ee lagu qabtay waddanka Mexico iyo 1974-kii ee ka dhacay isla waddanka Germnay. Muller waxa uu Record u dhigay weeraryahannadii xulkii Qaranka West Germany ee qarnigii 20-aad, kaddib markii uu xuliisa u dhaliyey labadii Koob adduun ee uu ka qayb galay 14-gool oo uu 10 ka mid ah dhaliyey Koobkii Adduunka ee 1970-kii lagu qabtay waddanka Mexico oo xulka Brazil 4-1 ugu awood sheegteen waddanka Italia, sidaana waxa uu Muller ku hantay gool dhalintii Koobkaasi Adduun, isagoo sanadkaasina kulan kasta oo uu xulkiisa u safto u dhalinayay goolal, 6-kulan oo uu saftayna dhaliyey 10-gool oo ay ku jiraan saddex gool oo uu xulkiisa ugu soo saaray semifinal-kii Koobkaasi.

1974-kii Koobkii Adduunka ee lagu qabtay waddanka Germany ayuu sidoo kale Muller xulkiisa u dhaliyey 4-gool oo uu ku jiro goolkii guusha ee uu ka dhaliyey waddanka Holland ciyaartii final-ka ahayd ee ay 2-1 uga qaadeen waddankaasi. Gerhard Muller sidoo kale waxa uu u soo saftay marka loo fiiriyo dhinaca naadiyada kooxaha TSV Nordlingen, Bayer Munich, Fort Lauderdale iyo Strikers oo ka dhisnayd waddanka USA, waxaana sanadihii 1960s iyo 1970s uu ahaa weeraryahanka keliya ee ay ku tashanayeen xulka West Germany iyo weliba kooxdii Bayer Munich ee uu waqtigaa u safanayay.