Qaybtii 9-aad:

Ferenc Puskas waxa uu u dhashay waddanka Hungary, waxa uuna dhashay 2-dii Bishii April 1927-kii, yaraantiisii waxaa lagu xaman jirey inuu lahaa qaab ciyaareedka ciyaarta Kubadda Cagta, hase yeeshee taasi waxa ay rumowday markii uu noqday weeraryahan aad ugu xeeldheer ciyaarista Kubadda Cagta.

         Puskas waxa uu ahaa ciyaaryahan gaaban, ad-adag, xabad ballaaran, culeys badan, isla markaana waxa uu ku ciyaari jirey kubadda Cagta labada lugood oo qura, isagoo marnaba aan kubadda u adeegsan jirin dhinaca madaxa.

Puskas magacyadii xilligaa ay taageerayaashiisa ugu yeeri jireen waxaa ka mid ahaa “THE GALLOPING MAJOR” marka runta laga hadlana Puskas waxa uu ahaa Sarkaal ka tirsanaa ciidammada Hungry, isla markaana u soo ciyaaray naadigii ku ciyaari jirey magicii ciidammada qalabka siday ee waddankaasi, isagoo xilli ciyaareedyo aad u wanaagsan la soo qaatay kooxda kale ee isla waddanka Hungry ee Kispest Honved, waxa uuna ku guuleystay Puskas 4-Horyaal ka hor intii uusan ku biirin naadiga Real Madrid ee waddanka Spain.

         Ferenc Puskas waxa uu ku raaxeysanayay guulo fara badan ee uu ka gaaray Horyaalka waddanka Spain ee (La Liga), waxa uuna noqday ciyaaryahankii ugu goolasha badnaa 4-Horyaal, isagoo kooxdiisii Real-na la qaaday 6-Horyaalka waddanka Spain ah iyo saddex Koobka Horyaallada Yurub ah, waxaana guushii ugu weyneyd ee uu gaarsiiyo kooxda Real Madrid ay ahayd markii ciyaar Final ah oo ka tirsan Koobka Horyaallada Yurub sanadkii 1960-kii ay isaga hor yimaadeen kooxda Eintract Frankfuirt, taasoo kooxda Real Madrid ay ku adkaatay 7-3, iyadoo 4-ka mid ah goolasha Real Madrid uu shabaqa ku hubsaday ciyaaryahan Puskas.

Puskas oo hor kacaya xiddigihii Xulka Hungary ee 6-3 afka ciidda ugu daray xulka Ingiriiska 1956-kii

         Marka loo eego dhinaca Qaranka Puskas waxa uu 84-kulan u saftay xulkiisa Hungry, isagoo u dhaliyey 83-gool, taasina waxa ay noqotay mid aan dunida weligeed ka dhicin oo record uu ugu dhigay ciyaaryahannadii xilligaasi, mana jirin ciyaaryahan goolal sidaa la mid ah u dhaliyey xulkiisa, xitaa marka loo fiiriyo boqorkii Kubadda cagta Adduunka ee Pele.

         Puskas waxa uu xulkiisa Hungry kala qayb galay Koobkii Adduunkii ee 1954-kii ka dhacay waddanka Switzerland, isagoo u suurtogeliyey in uu keeno kama dambeystii (Final-kii) koobkaasi, hase yeeshee nasiib darro waxaa 3-2 afka ciidda ugu daray xulkii West Germany.

Dowladda waddanka Hangary ayaa waxa ay Buskas ugu magac dartay garoonka ugu weyn ee waddanka Hungry, taa oo ay sheegtay in uu ku muteystay isagoo noqday laacibkii keliya soo mara xulka Qaranka waddanka Hangary, waxaana haatan da'diisu sii caga-cageyneysaa 75-sano.

La soco waayihii Isboorti ee ciyaaryahankii lagu naaneysi jirey “Shimbirtii yareyd”.