|
Shirka dib u heshiisiinta Soomaaliyeed ee Eldoret
oo goor dhow furmaya
Maxamed Xaaji (Ingiriis)
Eldoret, Kenya
E-mail: Ingiriis@yahoo.com
Waxaa daqiiqado kaddib ka furmaya xarun horey
u ahaan jirtay school oo ku taalla magaalada Eldoret shirkii dib u heshiisiinta
Soomaaliyeed ee muddaba la filayey inuu ka dhaco dalka Kenya. Madasha shirku ka
furmayo waa meel aad u qurxoon oo lagu xardhay qoraallo muujinaya nabadeynta
Soomaaliya inay tahay lama huraan.
Waxaa hoolka shirka illaa iyo haatan xaadir ku
ah Guddoomiyaha Baarlamaanka KMG ah, Cabdalla Deerow Isaaq, Ra’iisal
Wasaaraha dowladda ku meel gaarka Xasan Abshir Faarax, Hoggaamiye kooxeedka
Maxamed Cumar Xabeeb (Maxamed Dheere), ergooyin ka socda garabyada RRA,
Madaxweynaha maamul goboleedka Puntland Col. C/llaahi Yuusuf Axmed,
Guddoomiyaha gobolka Hiiraan Xasan Cabdulle Qalaad iyo rag kale.
Saacado kaddib waxaa la filayaa inay shirka
yimaaddaan hoggaamiye kooxeedyada kala ah; Xusen Maxamed Caydiid, Muuse Suudi
Yalaxow iyo garabyada Cusmaan Caato, Maxamed Qanyare Afrax, Mowliid Macaani iyo
Cumar Finish. Garabka Jaamac Cali Jaamac ayaa isna afka lagu hayaa inay shirka
imaanayaan.
Dowladda Kenya oo leh qabanqaabada iyo gogosha
shirka dib u heshiisiinta Soomaaliyeed ee Eldoret waxa ay ku casuuntay inay
furitaanka shirka ka soo qayb galaan Madaxda Madaxweynayaasha dalalka IGAD.
Waxaa illaa iyo hadda isheydu ay qabatay Madaxweynaha dalka Suudaan, Cumar
Xasan Al-Bashiir, Madaxweynaha Eretrea Eassias Afewarke. Waxaa jidka ku soo
jira Madaxweynaha Uganda Yoweri Museveni iyo Ra’iisal Wasaaraha Itoobiya
Meles Zenawi.
Warar gudaha shirka la isla dhex marayo ayaa
sheegaya in Madaxweynaha Jabuuti Ismaaciil Cumar Geelle uusan shirka ka soo
qayb galaynin. Ma jiro wax faahfaahinaya imaansha la’aanta Madaxweyne Geelle
oo ahaa Madaxweynihii qabanqaabiyey shirkii Carta.
Sidoo kale, safaaradaha dalalka ajnabiga ayaa
heegan ku ah madasha. Safaaradaha Mareykanka, Ingiriiska, Talyaaniga,
Faransiiska, Masar, Yemen, Liibiya iyo kuwa kale ayaa ku soo qulqulaya illaa
iyo hadda inay furitaanka shirka joogaan.
Madaxweynaha Kenya, Daniel T. arap Moi oo
isagu shir-guddoomin doona kulanka ayaa sheegay in xalka Soomaaliya uu u yaallo
Soomaalida. “Dalalka IGAD midkoodna uma yeerin karo Soomaalida waxa ay
doonayaan, waana iyaga cidda ay tahay inay go’aan ka gaaraan nabadgelyadooda”
ayuu yiri Madaxweynaha Kenya. Khudbad dheer ayaa la filayaa in Madaxweyne Moi
uu shirka u jeediyo.
Oct 15, 2002
WARARKA
SEPTEMBER - GUJI
»
AGOOSTO | JULY
| JUNE |
MAY | APRIL
|
MARCH | FEBRAAYO
|
Janaury 2002
| Wararkii
1999-2001
com
| 
