Ciidammada gumaysiga Itoobiya oo ay caado u tahay inay cadaadis iyo
cabudhin xad-dhaaf ah kula dhaqmaan dadwaynaha rayadka ah ee Ogadenya, ayaad
mooddaa inay maalmahan sii kordhiyeen xadgudubyadii ay dadwaynaha ku hayeen.
Waxaana arrintaas lagu macneeyay, iyadoo ay hawlohoodii billaabeen dadkii ay
xukuumada Addis Ababa sheegtay in horraantii Janaayo Ogadenya laga soo
doortay.
Degmada Garbo waxay ciidammada gumaysiga Itoobiya gacanta ku dhigeen 30
qof oo rayad ah, kuwaasoo ay qofkiiba ku ganaaxeen 1000 Bir. Waxaa ganaax
midkan oo kale ah lagu xukumay 40 qof oo Shacab ah kana mid ah dadwaynaha ku
dhaqan nawaaxiga tuulada Geri-go’an.
Waxaa sidoo kale daba-yaaqadii bishii hore qofkiiba 500,000 oo shilin
soomaali ah lagu ganaaxay qaar ka mid ah dadwaynaha ku dhaqan magaalada
Dhanaan.
Dadka lacagtaas lagu ganaaxay ee aan magacyadooda hayno waxay kala yihiin:
- 1- Xassan Xashi Garaad.
- 2- Barre Maxamed Cumar.
- 3- Qaybdiid C/hi Raage.
- 4- Maxamed Ilko-jiir Dhega-weyne.
- 5- Qabbaase Ceelaabe.
Dadwayne xabsiga loo taxaabay markay diideen inay dabaqoodhi noqdaan.
Tuulooyinka Geri-go’an, Goomaar iyo Hiilley ayaa iyagana mid walba lagu
xukumay inay qoryo u iibiso malleeshiyada gumaysiga Itoobiya u adeegta ee
dabaqoodhiga loo yaqaano.
Dadweynaha oo dan-yar u badan, isla markaana ku jira xilli adag oo jilaal
ah, dhibaato weyn ayay ku tahay inay dhaqaale intaas dhan bixiyaan, hase
yeeshee gumeystaha naxariis-laawaha ah ee Itoobiya ayaa dadkaas ugu hanjabay
inuu xabsiga dhigi doono haddii ayna ganaaxaas bixinin.
Dadwayne xabsiga loo taxaabay markay diideen inay dabaqoodhi noqdaan.
Ciidammada gumaysiga Itoobiya ayaa bishan maarso 11dii Ceelxaar, oo ka
tirsan degmada Dhagaxbuur, ka qaqabtay 23 qof, oo ka mid ah dadwaynihii
rayadka ahaa ee deegaankaas ku noolaa iyo kuwo tuulada makhaayado ku haystay.
Dadwaynahaas waxaa la qaqabtay, ka dib markii ay ku gacan saydheen inay ka
mid noqdaan malleeshiyada dabaqoodhiga loo yaqaano ama ay qoryo u gadaan.
Dadka aan magacyadooda hellay ee halkaas laga qaqabtay waxaa ka mid ah:
- 1- Cabdulahi Xaashi.
- 2- Siraad Cabdi Juboole.
- 3- Bashir Maxamed Shafad.
- 4- Cabdi-nasir Maxamed Cabdi (afyare).
- 5- Maxamed Caydiid Yuusuf.
- 6- Cabdi-nuur Maxamuud Shafad.
- 7- Shukri Axmed Cabdi (Gacamey).
- 8- Carab Ismacil Awlaad.
- 9- Mahad Maxamuud Khayr.
- 10- Maxamed Cabdi Guure.
- 11- Khalif Maxamed Layli.
- 12- Cabdulaahi cabdi Dhicis.
- 13- Dahir Maxamed Khayr.
- 14- Qorane Maxamuud Khayr.
- 15- Maxamuud Cabdi Fiin.
dadkaas aan waxba galabsan ee ciidamada Itoobiyo xabsiyada ka buuxiyeen
ayaa xaaladooda nololeed iyo caafimaadba laga dayrinayaa, waxayna dadwaynihu
is waydiinayaan sida ay suurta gal ku tahay in shabaku hub u gado ciidamada
dawlad kusheegtu adeegsanayso.
David Shin oo yidhi; xalka geeska afrika xalinta qadiyada Ogadenya ayaa
sal u ah.
Safiirkii hore ee maraykanka u fadhiyey wadanka Itoobiya David Shin oo
khudbad ka jeediyey jaamacad ku taala wadanka maraykanka, ayaa si aad ah uga
hadlay dhibaatooyinka ba,an ee argagixisadu ku hayso caalmka.
David Shin oo khibrad dheer uleh xaaladaha nabad galyo la,aanta ah ee
gajirta afrika guud ahaan gaar ahaana geeska afrika, in badana kaga soo
shaqeeyey safiirnimo, ayaa shaaca ka qaaday in xalka kaliya ee nabad loogu
soo dabaali karo geeska afrika lagagana hortagi karo abaaraha joogtada ah ee
mar walba ku habsada geeska afrika ay tahay iyadoo xal waara loo helo
qadiyada Ogadenya, uuna aaminsan yahay inay fure u tahay nabada geeska afrika,
isagoo intaas raaciyey in Ogadenya la raaciyo Soomaaliya ama Jabuuti, si
geeska afrika nabad uga hirgasho.
Ururo macaarad ah oo Meles u digay
Ururro mucaarad ah oo aad u tira-badan ayaa digniin adag u soo jeediyay
xukuumada Addis Ababa. Digniintani waxay ku soo beegantay xilli uu soo
dhawaaday ololihii doorashooyinka ee Itoobiya.
Ururradani waxay ururka TPLF/EPRDF uga digeen inay doonista dadwaynaha ka
dhaga adaygaan oo ay xukunka isku sii dhejiyaan, taasoo ay sheegeen inay
horseedi doonto dagaal sokeeye oo aan xal loo heli doonin.
Warku waxa kale oo uu intaa raaciyay inay ururadani caddeeyeen inay
dawlada uu ka taliyo Meles Zenawi ay ku guul-darraysatay mudadii dheerayd ee
ay kuxunka gacanta ku haysay inay wadanka horumariso, nabadgelyana ku soo
dabbaasho.
Dagaal ba’an oo dhexmaray OLF iyo ciidamada Wayaanaha.
Radyowga Oromada ee SBO Ayaa sheegay inuu dagaal aad u ba’ani dhex-maray
ciidammada jabhada Oromada ee OLF iyo kuwa gumaysiga Itoobiya.
Dagaalkani wuxuu ka dhcay magaalada Miraale oo ka tirsan gobolka waqooyiga
shawa, halkaasoo ciidamada wayaanha lagaga dilay 20 askari, isla markaana
lagaga dhaawacay tiro kale oo aad u badan.
Ciidammada OLF, oo ka dagaallama dhulka ay degaan dadka Oromada ah, waxay
dagaal aan kala joogsi lahayn ku hayaan ciidammada caga-jiidka ah ee
gumaysiga Itoobiya oo lagu jabiyo madal kasta oo laysku hardiyo. Jabhadda OLF
waxay u dagaallanta xornimada dad Oromada ah.
Bangiga Aduunka oo masuugay nidaamka dhaqaale ee Itoobiya.
Ergay ka socda Bankiga Aduunka ayaa si wayn u masuugay nidaamka dhaqaale
ee Itoobiya, kaasoo sheegay in dhaqaalaha Itoobiya uu aad u liito, isla
markaana ku xidhan yahay macaawinooyinka ay Itoobiya ka hesho wadamada reer
galbeedka ah.
Ergaygan oo aan rabin in magaciisa la sheego wuxuu yidhi: “Bajadka ay
dawlada Itoobiya sannadkan soo diyaarsatay wuxuu xaqiijinayaa inay Itoobiya
gaadhi doonto heer ay xataa shaqaalaha mushaharkooda soo daynsato”.
Warar kale oo arrintan la xidhiidha oo wakaalada waraka Ogadeenya (ONA)
soo gaadhay ayaa sheegaya in Midawga Yurub uu Itoobiya u diri doono wafti
khabiiro ah oo laba xubnood ka kooban, kaasoo shaqadiisu ay tahay inuu soo
baadho dhibaatooyinka hor taagan mashaariicdii la rabay inay Itoobiya
hirgaliso.
Itoobiya waxay ka mid tahay wadamada ugu badsada macaawinooyinka uu
Midowga Yurub siiyo dalalka sabaoolka ah.
Rabshadihii ardayda Itoobiya oo sii korodhay.
Wararka naga soo gaadhaya magaalooyin kala duwan oo Itoobiya ka tirsan
ayaa sheegaya inay aad u sii kordheen mudaharadayada ay ardayda Oromoda ahi
samaynayaan ee ay kaga soo hor jeedaaan xukuumada wakhtigeedii dhamaaday ee
wayaanha iyo iska horimaadyada u dhaxeeya ardayda iyo ciidamada nabad sugida
ee Itoobiya.
Wararku waxay intaa raaciyeen inay booliska Itoobiya ay tabar u waayeen
inay ardaydaas wax ka qabtaan, sidaas darteed loo dalbaday ciidamada
millatariga ah ee wayaanha, kuwaasoo iyguna wali gaadhka ka haya Jaamacdaha
iyo dugsiyda sare ee magaalooyinka Jimma, Bariga Wallaga, Dhabraziyit, Ambo,
Sabta, Harmaya, Doola iyo Naqamte.
Warar kale oo naga soo gaadhaya magaalada Jimma ayaa sheegaya in maxkamada
la horkeenayo 25 ka mid ah aradaydii ay toddobaadkii hore xidheen ciidamada
Itoobiya, kuwaasoo lagu tuhmay inay iyagu mudaharaadkan soo qabanqaabiyeen.
Ardaydu waxay ka gadoodsan yihiin nidaam xumada xukuumadda Addis Ababa iyo
cabudhinta ay ku hayso dadwaynaha Oromada ah, waxayna bannaanbaxyadan kaga
jawaabayaan xukuumadda Addis Ababa oo dhawaana arday badan oo Oromo ah ka
caydhisay Jaamacadda Addis Ababa.
Golaha wasiirada DKMG Soomaaliya oo canbareeyay xukumada Itoobiya.
Shir ay 14.03.2004 isugu yimaadeen golaha wasiirada DKMG ee Somaaliya ayay
kagaga doodeen qodobo ay ka mid ahaayeen Xaalada nabad galyada dalka, safarka
uu ku aaday Daahir Riyaale wadanka Ingiriiska iyo hubka ay Itoobiya ku soo
daldalayso dalka gudihiisa.
Golahu dood dheer kadib waxuu canbaareen dusha kaga tuuray Taliska
Itoobiya oo ay ku sheegeen in ay shirqoolo u maleegayaan shacabka
Soomaaliyeed, waxayna beesha caalamka ka codsadeen in ay fiiro gaar ah
siiyaan xadgudubyada ay dawlada Itoobiya ku hayso Soomaaliya, laguna ciqaabo
jabinta qaraaradii qaramada midoobay ay ka soo saareen soo galinta hubka
Soomaaliya.
Wasiiradu waxa ay xuseen in xukuumada Itoobya hub ugu deeqday kooxo aan
danaynayn maslaxada ummadda iyagoo kaga faaiidaysanaya gumaadka shacabka.
Wasiirka warfaafinta ee dawladda kmg ah Md C/qaadir Madaxeey oo isagu la
hadlayay saxaafadda ayaa daboolka kaqaaday in ay tahay wax aan loo samri
karin dhibaatada cadawtooyada xanbaarsan ee ay Itoobiyaanku ku hayaan
shacabka Soomaaliyeed, waxuuna ka dalbaday waddamada deriska iyo urur
gobaleedka Igad in ay arrintaa wax ka qabtaan.
Goluhu waxaa kale oo uu falanqeeyay booqashada Mr Riyaale ee dalka
ingiriiska isagoo taana ku tilmaamay in ay tahay faragelin qaawan ee arrimaha
soomaaliya iyo dhibaato loo gaysanayo midnimada qaranka soomaaliyeed,
xadgudbna ku ah madax bannaanida qaranka soomaalideed. Goluhu waxa uu farta
ku fiiqay in ay khalad ka gashay dawladda ingiriisku soomaalida oo ay dhiira
gelin u samaynayso gooni isutaaga goballada w/galbeed ee soomaaliya .
Dhinaca kale: Wararka naga soo Gaadhaya magaalada Jowhar ayaa sheegaya
inay soo gaadheen magaaladaasi Gaadiid Hub sida oo kakoobnaa 10 Gaadhi
habeenimadii 13.03.2004 Gaadiidkaas oo la sheegay in uu siday Qoryaha loo
yaqaano Dabajeexa PKM, Ak iyo rasaas aad ubadan ayaa la sheegayaa in ay
Itoobiya ugu deeqday hogaamiya kooxeedyada Maxamad Dheere iyo Morgan oo iyagu
hada ku sugan Magaalada Jawhar.
Warar kale ayaa iyaguna sheegaya inay Ciidamo Itoobiyaanihi soo Gaadheen
meelaan saas ooga fogan Magaalada Baydhabo walina lagaranayn waxay halkaas ka
Qabanayaan.
16.03.2004
C/Nuur Sh. Mohamed
raadioxoriyo@yahoo.com
radioxoriyo@ogaden.com
Radio Xoriyo waxaad ka
dhegaysan kartaa Mawjadda 19 MB ee dhererkeedu yahay 9820 KHZ, Maalmaha
Talaadada iyo Jimcaha 7: 30PM waqtiga Afrikada Bari
....
Copyright & Islaamku wuxuu ka qabo.... Akhri
Kulaabo bogga hore ee
www.somalitalk.com
Dhegeyso warkan oo Cod ah
...HALKAN
KA BAAR WARARKII HORE EE XORIYO
....KAYDKA
WARARKA RADIO XORIYO - NEWS ARCHIVE
AFEEF: Afkaarta qoraalkaan waxaa leh gaarna ay u
tahay Radio Xoriyo, kana
tarjumimaayo aragtida SomaliTalk