SOMALITALK.COM XAYAYSII
w w w . S o m a l i T a l k . c o m
SOMALITALK - MAQAAL

GARSOORKA SOMALILAND MA WAXAA KU JIRA QODOB ODHANAAYA QOFKII QOF GABOOYE AH DILA XADHIGIISU WAA 5 SANO.

Aniga oo ah Gudoomiyaha Beelaha Gabooye ee Qaarada Yurub iyo Waqooyiga Ameerika Waxaan halkan canbaarayn  kulul uga soo jeedinayaa Maxkamada Gobolka ee Magaalada Hargeysa oo ka baaqsatay inay fuliso waajibkii loo igmaday si cadaalad ahna ugu garqaado qofka wax dulmiya iyo ka la dulmiyay.

Maxkamada Hargeysa oo qaadaysay dacwad u dhexaysay Askari ka tirsan Ciidanka Booliska Somaliland iyo Ehelada Marxuum Khadar Dhabar oo uu askarigaasi si badheedh ah toogasho ugu dilay isaga oo aan wax danbi ah galin.

Iyada oo Xeerka u degsan Somaliland uu dhigayo in loo dilo qofka si badheedh ah u dila qof kale, isla markaasna maxkamada horteeda laga cadeeyay in askarigaas booliska ahi uu si badheedh ah Khadar nafta uga jaray, ayaa maxkamadu waxay ka baaqsatay inay cadaalada ku xukunto askarigaas oo ay xukun dil ah ku fuliso maadaama uu si badheedh ah u dilay Marxuum Khadar.

Nasiib darro Maxkamada Gobolka ee Hargeysa waxay ku xukuntay Askarigii dhagar qabaha ahaa 5 sanadood oo xadhig iyo magtii oo uu siiyo ehelada uu ka geeriyooday Marxuum Khadar.

Xukunka Maxkamadan Ka Soo baxay waa mid baalmarsan Cadaalada iyo Qawaaniinta Somaliland u degsan, waxaana uu muujinayaa in aanay Cadaalada horteeda u sinnayn dadka laga tirada badan yahay iyo kuwa lagu sheego inay tiro badan yihiin, inkastoo aanay cid is tirisay jirin.

Hadaba waxaan ugu baaqayaa in Laamaha Sharciga iyo Maxkamada Sare ee Somaliland inay waxba kama jiraan kasoo qaadaan go'aanka kasoo baxay Maxkamada Gobolka Hargeysa, isla markaasna ay si xaq ah xukun dil ah ugu fuliyaan dhagarqabaha dilay Marxuum Khadar.

Hadii ay ka baaqsadaan Maxkamadaha Somaliland inay si Cadaalad ah ugu qaadaan Sharciga dalka u degsan dhagarqabaha dilay Marxuum Khadar, Markaas waxay tani caalamka tusaysaa si ay Somaliland uga arradan tahay Cadaalada, waxaana waajib ah in la canbaareeyo go'aankaas baadilka ah ee maxkamada kasoo baxay.

Waxa kale oo wax aad looga xumaada ah sida foosha xun ee jidh dilka loogu gaystay 14 dumar ah oo ka cabanaayay cadaalad darida ay maxkamadu samaysay kadibna loo taxaabay jeelka hargaysa.

Aqoonyahanka, Culumaaudiinka, dhalinyarada, xisbiyada siyaasada iyo ururrada xuquuqda aadamaha u dooda waxaan ugu baaqayaa inay dawlada Somaliland culays ku saaraan sidii dhagarqabaha Marxuum Khadar dilay loogu ciqaabi lahaa dambiga uu geystay, laguna qaadi lahaa xukunka dilka ah ee u yaala Somaliland ee lagu qaado qofka qof si badheedh ah u dila.

ALLAAHUMA LAA TUSALID CALAYNAA MAN LAA YAKHAAFUKA WALAA YARXAMUNAA.

Ilaahay baa weyn oo waaxid ah


Maxamed Ciise Caabi
gabooye.org99@hotmail.co.uk
Gudoomiyaha Beelaha Gabooye ee Qaarada Yurub & Waqooyiga Ameerika. London. UK

Afeef: Aragtida qoraalkan waxaa leh qoraaga kusa xiixan

Faafin: SomaliTalk.com | July 26, 2005


Booliiska London oo Magcaabay Labo Nin oo Lagu Tuhunsan Yahay Qaraxyadii
Muktar Said Ibrahim iyo Yasin Hassan Omar ayey Booliska London magcaabeen waxayna uga shakiyeen in... Guji..

Dugsi wax Lagu Barayo indhoolayaasha oo laga Furay Muqdisho
Yemen: Shidaal Soomaliya loo tahriibinaayey oo la qabtay.
Ra'iisul Wasaare Geedi oo Dhambaal tacsi ah u Diray Britain
Wararka oo dhan ka Akhri Halkan.. Guji..

Kulaabo bogga  www.SomaliTalk.com 
© www.SomaliTalk.com

BAARID | SEARCH

 



HTML CD