Ka
dan raaco: “Jawaab maqaalka Maamul
Goboleedka Lamagacbaxay Somaliland
Lama oga nimay u xuntahay iyo nimay
u san tahay, oo uu qoray Eng. Siciid
Cismaan Maxamed.
Cabdillaahi
Cawed Cige,
Liverpool UK
edleh@hotmail.com
Sept 16,
2005
Uma dhalan qof wax badan ka
yaqaanna cuudka iyo sida loo tumo, haseyeeshee haddii aanu
Jiimi gacanta ku hayn ama Cumar Dhuulle meel cidhiidhyoon ka
rogayn ama Daa’uud Cali Masxaf u daadihinayn sidii looga
bartay, ee uu gacanta ku dhigo nin barad ahi aad baan
dhadhankiisa u kala saaraa. Marka nin yaqaannaa shubaalinayo
waxa aad is odhanaysaa “Col kaa cab” waar tolow meesha uu ka
soo aroorinayaa fogaa, balse marka far barad lagu fasaxo
waxa aad is odhanaysaa “Eebbow” yaa labada gamcood ka gooya.
Maqaalka uu soo tebiyay
walaalkeen Farsamayaqaan Siciid Cismaan Maxamed waxa aan u
kala garanwaayay maadays iyo madadaalo midka uu yahay. Muxuu
qoraagu inoo soo gudbinayaa? Ma khaladka Somaliland ka
gashay Soomaaliya? Ma wuxuu inoo tilmaamayaa dhaliilaha
Madaxweyne Riyaale iyo ururkiisa talada haya? Ma wuxuu inoo
iftiiminayaa rabitaanka shacbiga Somaliland oo uu inooga
sheegayo wax aynaan ka ogayn?.
Dhedada saaran ra’yiga uu
maqaalku xambaarsanyahay ayaa ka dhigaysa mid aan kal
fayoobi ka warcelinkarayn. Wuxuu qoraagu hadalkiisa u
dhigayaa qaab u muuqda in aanu isagu ahayn reer Somaliland.
Haddii tuhunkaasi toosanyahay waxa imanaysa sarbeebta ah (b_xigasho)“Salaanow
iyadu hays dishee, Duudda Habar Yoonis… Duxi haddaanay kaa
soo gelayn, Diradiraynteeda… Ka dan raaco maantay damcaan,
Ha isku duufeene… Cabillaahi Muuse”(dh_xigasho). Haddii aanu
qoraagu ahayn reer Somaliland wuxuu ku dhexjiraa arrimo
daakhil ah ee degdeg debedda ha isaga taago.
Way bannaantahay waana
sababta golaha loo waageertay ee sanduuqa waraaq yar lagu
biliqsiinayo geedka hoostiisa loo dhigtay in lala xisaabtamo
oo weliba xadhig adagna lagu xidho kuwa talada lagu aamminay,
haseyeeshee waxa xisaabtankaas iska leh ciddii talada ku
aammintay, oo markan ah bulshada Somaliland, ninse soo
doolaalo tegay mashqac uu arrimo ka fog ku baadhaa ugama
furna.
Lama oga Somaliland nin ay
u xuntahay iyo nin ay u santahay; ayuu qoraagu inagu
maansheeyay. Wuxuu la sheekaystay inta ku hoos nool
maamulkaas. Somaliland ma sonkor la soo waariday baa oo u
xun dadka sonkor macaanka leh? Mise qamaddi Maraykanku ku
xannibayo beeraleyda geeska Afrika? Muxuu qoraagu inoo
sheegayaa ama doonayaa inuu ina dareensiiyo?
Inta aan ka ogahay
Somaliland way caddahay cidda ay u santahay oo waa cidda
sumadda ku dhigatay, waa cidda maamulkeeda taagatay, waa
cidda ururrada siyaasadeed u abuuratay, waa cidda doorasho
tan iyo doorasho u kala gooshaysa!
Cidda ay u xuntahay? Sida
maqaalka uu inoo soo tebiyay Farsamayaqaan Siciid Cismaan
Maxamed ka muuqata cidda Somaliland u xuntahay waa cidda ay
qoraaga isku ra’yiga yihiin, waa cidda la wadaagta
aragtidiisa gashan xoqadaha cawlan ee tashuushadda gelinaya
wixii indhahoodu ku dhacaan. Bal u fiirso, waxkasta oo
dhadhanka Somaliland uga muuqda qoraaga wuxuu u arkaa
belaayo meel fadhida.
Cid ka nabadgashay
farsamayaqaanka aragtidiisa foorortaa ma jirto, waxa ugu sii
daran ururrada siyaasadda ee Somaliland, wuxuu ku tilmaamay
“Masiixiyiin”. Xaggaynu awel fikradda noocan ah hore ugu
maqalnay? Jihaadkii barakaysnaa ee Ina Cabdille Xasan?
Keligii taliyihii Soomaaliya xukunkeeda boobay ee beri ka
dul doobyijiray?
Fasiraadda uu farsamaqaanku
ka bixiyay saddexda urur siyaasadeed ee Somaliland ayaa waxa
ay muuqaal cad oo aan caad ku jirin inaga siinaysaa
warcelinta uu innageenna akhrisanayna maqaalkiisa ina
weydiinayo.
Bal haddaba haddii
warcelinta uu qoraagu raadinayaa ku dhantahay warbixinta uu
soo tebinayo, muxuu wakhtiga inooga lumiyay ee inoo hoday
ayaa meesha imanaysa? Muxuu u odhanwaayay Somaliland waa
cadowgayga, waxa ay Somaliland u xuntahay aniga iyo inta
aannu isku fikraddda nahay? Marraa waaxid waannu ka xunnahay
in meeshaasi ururro iyo doorasho iyo olole iyo horumar iyo
waxyaabahaas ku naallooto.
Somaliland waa Somaliland,
maamulka ka jira bartaasina waa maamul laga doortay,
lagalana xisaabtamayo aaggaas. In maamulka iyo ururrada
siyaasadduba tuuro leeyihiin shaki kuma jiro, balse yaan
tuurlahayn? Nin habari dhashay hal ma seegiwaayo, aan ahayn
qoraaga maqaalkan oo isagu u muuqda nin hal qudha aan seegin
balse wixii halo jiray oo dhan seegay.
Uuubss! Ka dan raaco
maantay damcaan, ha isku duufeene…
Cabdillaahi Cawed Cige,
Liverpool UK
edleh@hotmail.com
Maamul Goboleedka Somaliland Lama oga cid ay dan u tahay
| Eng. Siciid
AFeef: Aragtida
qoraalkan waxaa leh qoraaga ku saxiixan
Faafin: SomaliTalk.com | Sept 15, 2005
Maxaa
Run Ka ah Hadalkii "Wakiilka" Terry u Fadhiya Magaalada Garoowe
Mucaawinadii uu Soomaaliya u soo diray Brian
Morrison laakiin wakiilka Terry uu sheegay in
Guji
Maxamuud
Wardheere oo Ku Baaqay in Masaajidada iyo Culimada Islaamka la Ixtiraamo
Qoraal uu Minneapolis ka soo saaray ayuu
Guji
»Digaag
Gata si Puntland Shidaal Loogu soo Saaro|
C/waxid
»»
Jowhar Ma Masaaru-
Shariif baa? | Amiin Yuusuf
Puntland
maku Tusaale Qaadan Doontaa Khiyaamadii Ku Dhacday Somaliland iyo Ra'iisul
Wasaare Geedi
Xabsigii loo taxaabay Mr. Meier kaddib markii ay ka fashilantay shirkadii
shidaalka ka baari lahayd...
Guji...
Dr.
Alnajjar oo Aad uga Dayriyey Xaalada Soomaalida....
»Cusmaan
Caato: C/laahi Yuusuf dagaal ayuu isu diyaarinayaa
»Saddex
markab kalluumaysato oo lagu afduubay Soomaaliya
Wararka oo
dhan ka akhri halkan... Guji... sept 2 |