Wararkii:: Agoosto 1, 2005

Shir lagu Martigeliyey Wasiir Dowlaha Gaashaandhiga iyo Ururada Jaaliyada Toronto oo midnimo ku baaqay:

Waxaa Karuur Restaurant ee Toronto, Canada ka dhacay (July30,2005 ) qado sharaf aad loo soo agaasimay oo lagu martigeliyey Wasiir Dowlaha Gaashaandhige ee DFKS Ali Mohamed Mohamud (Ali Xareed).

Qado sharafta Wasiirka lagu soo dhoweeyey waxaa isku soo dabariday xubno ka tirsan jaaliyada Soomaalida iyo Somali Canadian Association, oo la kaashaday ururada jaaliyada oo ay ka mid yihiin, Midaynta, Somali immigrant Aid, Dejinta Beesha iyo Dixon Community service.

Qado shraftaan oo si balaaran looga soo qaybgalay ayaysan u kala harin dhamaan ururada soomalida , sida Somaliland of Toronto, Horn Africa Community, Somali Gabooye Sociaty, iyo Society,, Thistletown Community.

Waxaa iyana si wayn xafladaas uga soo qaybgalay qaybaha kala duwan ee bulshada, sida, Culuma’udiinka, Odayaasha, Hooyooyinka, Aqooyahanka, Dhaliyarada, iyo Warfaafinta Soomalida.

Xaflada oo ku furantay ,Wacdi, Alla kacabsi ,Iyo iskaashi soomaalidu yeelato ka dib waxaa hadalka lagu soo dhoweeyey Wasiirka.

wuxuu ugu horayntii salaan iyo mahadnaq u soo jeediyey jaaliyada oo uu horay madaxdeeda uga mid ahaa sida diiran ay u soo dhoweeyeen.

Wasiirku wuxuu salaan uu ka siday Madaxwaynaha Dowlada KMG Somaliyeed Mudane Abdullahi Yusuf Ahmed iyo Ra’iisul Wasaaraha Mudane Ali Mohamed Geedi u soo gudbiyey jaaliyada soomalida ee Canada.

Wuxuu kaloo wasiirku sheegay inay jaaliyada Canada tahay hormoodka Soomalida qurbaha ku dalowsan, “Jaaliyada Somaliyeed ee Canada waxay ka qaybqaateen badbaadada Somalida tabaalaysan, dib u heshiisiinta, iyo dhismaha dowlada ka soo baxday shirkii labada sono socday ee Nairobi”.

Wasiirka oo hadalkiisa sii wata wuxuu si tafatiran ugu nuuxnuuxsaday dhibaatooyinkii laga dhaxlay 15kii sano ee dowlad la’aanta ahayd, ee qaxootiga, barakaca, dhimashada, naafowga, cayrta, burburka dhaqaalaha iyo dhismaha ahayd.

Intaa ka dib wuxuu wasiirku ka hadlay dhismihii dowlada federaalka iyo natiijadii ka soo baxday, wuxuuna si faahfaahsan u soo bandhigay siyaasada DFKS ee ku dhisan, nabadayn, wadahadal, xasilooni, qaranimada oo la sugo, iyo dib u dhiska wadanka soomaliyeed ee burburay.“Marna dowladu ma ogolaanayso inuu dhiig dame daato” ayuu yiri wasiirku.

Wasiirku wuxuu jaaliyada kula dardaarmay inay si wadajir ah u taageeraan DFKS, inay iskaashi iyo midnimo danaha soomaliyeed ku difaacaan, wadanka Canada oo ay ka mid yihiina ka masalaan dalkooda hooyo, dadkooda ,iyo dowladoodaba.

Dhamaan ka qaybgalayaashii xafladu waxay si diirran u soo dhoweeyeen warbixintii iyo taladii wasiirka, waxayna balanqaadeen inay taageerayaan dowlada soomaliya u dhalatay, midnimada soomaliyana adkaynayaan.

Farah Abdi Hussein
Toronto, Canada guudcad@yahoo.com

Faafin: SomaliTalk.com | Agoosto 1, 2005

---

---

Wafti uu Hor Kacayo Xildhibaan ka Tirsan Baarlamaanka Canada oo Booqanaya Jawhar

• SomaliTalk | Toronto, Canada | July 31, 2005

Borys Wrzesnewskyj Sawirka: Websiteka Xildhibaanka

Wararka ka imanaya dalka Canada ayaa tibaaxay in wafti uu hogaaminayo xildhibaan ka tirsan baarlamaanka Canada oo laga soo doorto Etobicoke (Toronto) oo magaciisa la yiraahdo Borys Wrzesnewskyj in uu maanta (Axad July 31, 2005) u ambabaxayo dalka Soomaaliya, socdaalkaas oo xaqiiqo raadis ah wuxuu qaadan doonaa saddex maalmood.

Xildhibaanku waxa uu magaalada Jawhar kula kulmi doonaa madax sare oo ka tirsan DFKMG, oo ay kamdi yihiin madaxweynaha DFKMG Cabdullaahi Yuusuf Axmed iyo Ra'iisul wasaare Cali Maxamed Geeddi.

Jawhar oo 95 km woqooyi kaga aadan caasimada Soomaaliya, waa meesha ay si kumeel gaar ah ugu sugan yihiin madaxweynaha iyo ra'iisul wasaaraha DFKMG.

"Dawladda Canada oo kaashanaysa jaaliyadda Soomaaliyeed ee reer Canada - oo ah jaaliyada ugu ballaaran ee ka soo jeeda afrikada bari ee ku dhaqan Canada - waxay kaalin weyn ka qaadan karaan nabad ku soo dabaalida dalka burburay (Soomaaliya)" sidaas waxaa yiri xildhibaan Wrzesnewskyj oo ay soo xiganeysey jariidada Inside Toronto.

Xildhibaan Borys waxa uu ka tirsan yahay xisbiga Libral-ka' ee haya talaad dalka Canada.

Waxaa wararku intaas ku dareen in xildhibaanku uu wixii uu dalka Soomaaliya kala soo kulmo uga warbin doono dawlada Canada.

Waxaa waftiga ka mid Soomaali reer Canada ah.

Xildhibaanka waxaa lagala xiriiri karaa: Halkan....Guji..

ISHA: Inside Toronto.... | Tarjumadii SomaliTalk | July 31, 2005

Warbixin labaad hoos ka akhri.

Wafdi ka socda Dalka Canada oo ku soo wajahan dhawaan caasimada kmg ee Jowhar

Wararka ka imaanaya caasimada Canada ee Toronto ayaa xaqiijinaya in wafdi ka socda Baarlamaanka dalkaas ay ku soo fool leeyihiin magaalada Jowhar.

Wafdigaan ayaa waxaa horkacaya Xildhibaan Borys oo ka tirsan xisbiga dalka talada hayo ee liberal partiga.

Wafdigaan ka socda Dalka Canada  ayaa waxa ay isku xilqaameen in ay ukala dab qaadaan madexweynaha iyo afhayeenka waxayna kulamo layeelan doonaan labada dhinac si ay u soo afjaraan khilaafaadka yar ee ku dhexjira labada dhinac.

waa wafdigii ugu horeeyay ee ka socda Dalka Canada oo booqasho ku yimaado Soomaaliya gaar ahaan caasimada Xarunta Kmg ee dawlada federaalka magaalada Jowhar.

Warkaan ayaan ka soo xigtay Gudoomiyaha Jaaliyada Soomaaliyeed ee Dalka Canada mudane ingineer C/shakuur Maxamuud Gurey oo ka mid ah wafdiga xildhibaanka Canadian-ka ah.

 

w/q :Xuseen yaasiin Gode Gode
Email: godegode_6@hotmail.com 

July 31, 2005