Maxkamadaha Islaamiga Hambalyo.

W/D: Xaliimo Jaamac Cilmi (Xaliimo Qarad)
E-Mail: qarad22@hotmail.com

Alle ayaa Mahad iska leh, Rasuulka ayaa gutay ammaanadii Alle u soo dhibay (NNKH) akhristow xaq iyo baadilka markay looltamaan, xaqaa soo daahira, waxaana hambalyo diiran iyo bogaadin u dirayaa Maxkamadaha Islaamiga ah meel kasta oo ay joogaan, waxaana leeyahay sabra waad guuleysaneysaan Inshaa Allaah.

            Akhristaha sharafta Mudanow waxaan hadda ka hor qoray Maqaal  aan kaga cabanaayo dhibaatada haysata ubadka Soomaaliyeed dhinaca anshaxumida oo ah in Shaneemooyinkii ay daaran yihiin habeen iyo maalin, qaarkoodna laga daawado wax aan wanaagsaneyn, Ilmihii Soomaaliyeed ay waxbarashadoodii hagaagi weysay, balse Alle ayaa mahad leh, riyadeydii cabashada ahayd waxay dhabowday sannad kaddib, waxaana ku guuleystay wax ka qabashada arrintaas Maxkamadaha Islaamiga ah, waxayna Maxkamaduhu qabteen wax lagu farxo, gaar ahaan intii lagu guda jiray Bishii Barakeysneyd Ramadaan oo ay iska xilsaareen wax ka qabashada waxyaabaha wax u dhimi kara Bishaasi, Tusaale ahaan, Magaalada Muqdisho oo ay wax weyn ka qabteen sida Afduubkii dadka, Daroogada, Qamrada, Dumarka Jirkooda ka ganacsada iyagoo dhamaan waxay awoodaan ka qabtay waxyaabaha aanu soo sheegnay.

             Lambar-4 waxay ahayd goob Duhurkii dadka lagu dilo laguna diirto haddana waa goob nabadeed, ilo xog ogaal ah oo aan  ka helay Maxkamadda Af-furqaan ee xirtay shaneemo ka mid ah shaneemooyinka, kaddibna dib loo furay markii biishii Soon dhamaatay, ciidamadii Maxkamaddu ayaa tagay goobtii si ay ugu wargeliyaan in xiritaanka Bisha Ramadaan oo keliya ku ekeyn, balse ay tahay mid la mamnuucay dhamaan, kaddibna waxaa la wareeray ciidamadii Maxkamadda (Al-Furqaan), iyagu way is difaaceen, waxaase nasiib daro noqotay in ay si indho la’aan ah u soo gurmadeen ciidanka Hotel-ka Saxafi, waa nasiib daro in garab la siiyo kuwo iyagu u adeega Shaydaanka, haddaba akhristow waxaa jira dad aan ogoleyn in Maxkamadaha Islaamiga ah  hirgalaan, waayo wuxuu weynayaa Daroogadii uu iib-geyn jiray iyo Calaqii uu qasi jiray, waxaa jira kuwo kale oo la magac baxay Afar-Jeeble oo Gaalada lacag uga qaata in ay jilaafeeyaan Maxaakiimta Islaamiga ah, sidaasina ay caado u tahay.

            Shacabkeyga Miskiinkoow yaa kuu maqan?, Alle ayaa kuu gargaarayee u gargaar Diinta Islaamka iyo Maxaakiimta Islaamiga ah waad ka baxeysaa Inshaa Allaah dhibka ku haya.

            Alla xanuun badanaa Dowladaan sugeynay sanooyinka way kala qaybsan tahay, iska daa waxay shacabka u qabtaane iyaga ayaan ka baqayaa in ay foodda is daraan, Allaahu Akbar, Alle ayaan ka magan galnay dagaal dambe.

            Shacabku hadduu iska qaado heeryada saaran oo maskaxda ka shaqeysiiyo waxa uu gaarayaa guul wacan, haddii marba nin hogaamiye ah la saftaan, silic bay ku jirayan waligood.         

Filimada anshaxa xun, ruugidda Qaadka iyo isticmaalka Daroogadu Saamayn intee le'eg Bay ku Leeyihiin Faafidda Cudurka AIDSKA ee Soomaaliya.. Guji...

Waxaa aad ugu faraxsanahay in Hoyga Shaneemooyinka oo lagu soo  bandhigi jiray fawaaxish kala duwan ay haatan yihin kuwo gabaabsi ku ah Magaalada Muqdisho, Allaahu Akbar, Allow ha soo celin, waxaana qof kasta oo Muslim ah waajib ku ah in ka qaybqaato suulinta Munkarka gacan, Af iyo Qalbiga oo uu ka naco, waa in aan badbaadinaa ubadkeedana Soomaaliyeed oo ku dayacan daafaha Dalka, ma haystaan waxbarasho ku filan, Hoy, Caafimaad iyo waxyaabaha kale ee noloshooda la xiriira, walaalayaal aan badbaadino ubadkeena waa mustaqbalkii berito ee wadanku u aayi lahaa.

            Akhristaha sharafta lahow Maxaakiimta Islaamiga ah waa mustaqbalka iyo Amalka ummadda Soomaaliyeed, waa midda keliya keeni karta ama lagu gaari karo Qaranimadeedii iyo sharaftii Soomaaliyeed oo soo noqota.

            Ugu dambeyntii waxaan ugu baaqayaa dhamaan ummadda Soomaaliyeed meel kasta oo ay joogaan haddey yihiin Culuma’udiin iyo Aqoonyahano, Waxgarad, Odoyaal, Dhallinyaro iyo Haweenka in ay ka shaqeeyaan sidii loo badbaadin lahaa ummadda Soomaaliyeed, waayo bar waxay ku dhamaadeen xabad, qaar Badda, qaarna Beriga oo cuduro iyo gaajo ku dishay, walaalayaalow badbaadiya hambadda hartay, tolow dadka Siyaasadda ku loolamaya, haddii dadku uu dhamaado yey xukumayaan, ma dhulka mise cirka, Fadlan ka feker danta guud midda gaarka ahna dhaafa, ku quus-qaata saaxiibadii siyaasadda ku loolamayay oo ku dhinteen intay ku sugayeen Jago ama Darajo Adduun, qof kastow Alle ayaa ku xisaabinaya oo aan wax iloobeen, adiguse waxaad tahay Insaan daciif ah, Fadlan garo Heerkaaga aad joogto is xisaab intaan lagu xisaabin. Waxaan si gaar ah ugu baaqayaa walaalaha daciifka ah oo aan famahsaneyn nuxurka iyo macaanka Islaamka, oo Islaamka ku soo koobay Masaajid lagu tukado oo keliya, Walaalayaal, Islaamku waa nolol dhameystiran dhinac walba oo loo baahan yahay in aad ku dabaqdid noloshaada gebi ahaan, Siyaasadda iyo Diintuna waa hal qura, tusaale waxaa noogu filan Nabigeena (NNKH) sida uu u soo tarbiyeeyay saxaabadii qaaliga ahaa, waa in aan sidaas u fahamnaa Diinteena Islaamka

W/D: Xaliimo Jaamac Cilmi (Xaliimo Qarad)
E-Mail: qarad22@hotmail.com