• 1. xaaladda codbixinta ee muslimiinta qurbaha
• 2. Yaa madaxweyne ka noqon kara waddanka Maraykanka?
• 3. MAS-Freedom Foundation iyo Doorashada 2004
• 4. Minnesota-MAS Freedom Foundation iyo Doorashada 2004

· Waddanka Jarmalka waxaa ku nool in ka badan 4 milyan oo Muslimiin ah, nasiib darase qofna kagama jiro Parlamaanka Waddanka Jarmalka. Xaga ka kale haddaad ka eegto, waxaa Jarmalka ku nool 800 Yuhuud oo heysata Jinsiyadda Jarmalka, waxayna ku guuleysteen ugu yaraan sagaal kursi oo ay Parlamaanka Jarmalka ku yeesheen.

· Muslimiinta Ingriiska waxaa lagu qiyaasaa ilaa iyo sedex Milyan, laakiin Parlamaanka ingriiska oo ka kooban 659 kursi, nasiib darase waxay ku leeyihiin oo keliya laba kursi . Halka Yahuudda Jinsiyadda Ingriiska heysta lagu qiyaasay ilaa iyo 5000 (shan kun) oo keliya, laakiin Parlamaanka Ingriiska waxay ku leeyihiin 20 kursi.

· Gobolka Michigan ee Waddanka Maraykanka, Magaalada Dearborn oo dadka ku nool 75% ay Muslimiin yihiin, masaajidahana aadaanka meel weliba laga maqlo. Murashaxii muslimka ahaa ee Abu- Hamud ee isku soo sharxay duqa magaalada Dearborn, sababta lagaga guuleystay ayaa waxay aheyd Muslimiinta oo intooda badan aan codkooda dhiiban.

· Muslimiinta Maraykanka waxaa lagu qiyaasaa Ilaa iyo 10 (tobon) Milyan, halka ay Yahuudda tira ahaan ay le’eg yihiin ilaa iyo 5(shan)milyan. Nasiib darase hal muslim ah kuma jiro Congresska Maraykanka, halka ay xubnaha Congresska ay badankoodu Yahuud yihiin.

M. Amir Ali, wuxuu ku qoray “The Milli Gazette” bishii August 2003 ee la soo dhaafay, in ay ururada Muslimiinta ee Amerika ay ku fashilmeen ka qeyb gelidda siyaasadda Maraykanka, waxayse ku guuleysteen:

• 1- in loo ogolaaday inay duceeyaan furitaanka shirarka Congresska“waaba haddii laga aqbalo ducada”.
• 2-In bil weliba oo Ramadaan ah ay maalin afur ka sameeyaan Congreska;
• 3-Xafladda Ciidaha Islaamka inay Congresska ay kala qeyb galaan.

Amir oo hadalkiisa sii wato wuxuu yiri: “Yahuudda waxay kartay iyadoo Congresska adeegsanayso in la caburiyo shacabka Falastiin iyo ururada xoriya doonka ah laguna tilmaamo inay yihiin argagixiso. Sido kale, ururada xoriyo doonka ee Philipino oo lagu tilmaamay inay argagixisayaal ay yihiin. Halka gobolka Estimor ee waddan Indonisia, gobolkaasoo u badan Misiixiyiin, marka ay kacdoonka sameeyee laguma tilmaamin argagixisayaal balse Maraykanka ayaa caawiyey. Ka dibna loo qaaday afti ay ugu dambeyntii dowlad gaar ah loo sameeyey. Taasi waa siyaasadda laba wajiilanimada iyo munaafaqnimada ay dowladda Maraykanka ku dhaqanto”.

Lacag ururinta ay musharaxiinta qaar ka mid ah ka sameeyeen Gobolka Minnesota oo keliya iyo inta ay caddaan (cash) u heystaan ilaa July 2003:

Musharaxa Xisbiga Lacagta uu urursaday Lacagta Caddaan ahaa(Cash in hand)

• G.Bush Rep. $107, 600.00 (MN) ilaa $20 Milyan
• J. Kerry Dem. $144,940.00 (MN) $10.1 Milyan
• J. Edwards Dem. $33,950.00 (MN) $8.1 Milyan
• J. Lieberman Dem. $27,600.00 (MN) $7.0 Milyan
• H. Dean Dem. $71,900.00 (MN) $6.4 Milyan
• R. Gephardt Dem. $25,475.00 (MN) $6.3 Milyan
• B.Garham Dem. $1,000.00 (MN) $1.8 Milyan
• D. Kucinich Dem. $5,650.00 (MN) $1.1 Milyan
• C. Braun Dem. $250.00 (MN) $22,000.00 (Only Black Woman)
• Al Sharpton Dem. Nothing (MN) $12,000 (Only Black Man)

M. Amir Ali wuxuu kaloo ku xusay jariidada “The Milli Gazette

(16-31 August 2003)” Muslimiinta inay ka fiirsan doonaan ruuxa ay codkooda siin doonaan. Waayo, Doorashadii 2000, waxay in badan oo Muslimiin ah u codeeyeen Madaxweyne Bush ka dib markuu balan qaaday inuu tirtiri doono qaanuunka loo yaqaan “Secret Evedence Law” oo ah in qofka la xiray aan loo faahfaahin wax lagu heysto iyo cadeymaha la hayo. Nasiib darase, Bush markuu madaxweyne noqday wuxuu soo saaray qawaaniin aan dastuurka waafaqsaneyn sida qaybo ka mid ah qaanuunka loo yaqaan Patriotic Act oo lala fiirsanayo dadka muslimiinta ah. Sidaa darteeda, Muslimiinta Maraykanka ku nool waxay si taxadir iyo ka fiirsasho ah ay isu diyaarinayaan doorashada sanadka 2004 ee madaxweynaha waddanka Maraykanka. Dad badan oo Muslimiin ah waxay rumeysan yihiin in muslimiinta ay codkoodu ku gor gortami karaan haddii ay isu nidaamiyaan doorashada 2004.

Bishii August 2003 dhammaakeedii ayaa xafiiska Freedom Foundation ee ururka Muslim American Society (MAS), xaruntiisa dhexe ee Washington, D.C., ay si rasmi ah ugu dhawaaqeen hawl gal rasmi ah ee la xiriira nidaaminta codka muslimiinta ee Maraykanka iyadoo hal ku dheg loogu dhigay VIP (voting is power) oo ay la micno tahay: “ cod bixintu waa awood”.

Sidoo kale, Ururka Muslim American Society (MAS), faraciisa Minnesota, gaar ahaan xafiiska Freedom Foundation ee ah waaxda u qaabilsan fahamka siyaasadda dowladda Maraykanka iyo ilaalinta xuquuqda madaniga ee muslimiinta, ayaa ku shiray xafiiska MAS ee magaalada Minneapolis, iyadoo ay shirka ka soo qeyb galeen arday ka kala socota Jaamacadaha gobolka Minnesota sida Jaamacadda Minnesota, Minneapolis Community College, arday ka mid kuwa dugsiyada sare, iyo wax garad muslimiin ah oo ka dooday qaabka loo nidaamin lahaa cod bixinta muslimiinta ee gobolka Minnesota. Waxgaradka fadhigaasi ka soo qeyb galay waxay isu qeybiyeen sedex gudi oo kala ah:

1-Gudiga Abaabulka iyo Wacyi Galinta oo ka kooban shan qof, mas’uulna ka ah: diyaarinta, wacyi gelinta iyo dhisidda caqliga muslimka ah ee ku nool waddanka Maraykanka. Gudigan wuxuu diyaarin doonaa ugu yaraan lix kulan ee waxbarasho iyo tababaro la xiriira: Qaab dhismeedka siyaasadda iyo dowladda Maraykanka, Yaa mudan in la doorto, Maxaase lagu dooran, Nidaamka Doorashada iyo Kicinta dadka xaqqa u leh inay codeeyaan, iyo qaabka codka muslimiinta loogu faa’ideyn karo xuquuqda iyo danaha muslimiinta, iyo arimo kale ee la xiriira axkaamta islaamka iyo doorashooyinka ka dhaca waddanka Maraykanka.

2-Gudiga Xiriirka Dadweynaha: oo ka kooban ugu yaraan shan qof oo ku shaqa leh: inay tira koobaan xarumaha iyo masaajidaha muslimiinta ay ku leeyihiin gobolka Minnesota. Inay sameeyaan xiriir ka dhaxeeya xarumahaasi iyo mashruuca doorashada ee MAS. Islamarkaasna, in ay geeyaan xarumahaasi kaararka cod bixinta iyo fariimaha la xiriira doorashada 2004.

3-Gudiga Farsamada Doorashada 2004: Gudiga wuxuu ka kooban yahay shan qof oo ku shaqa leh: Inay xiriir la yeeshaan xoghayaha dowladda gobolka Minnesota, waaxdeeda qaabilsan doorashada 2004. Diyaarinta kaararka codbixinta. Ururinta fariimaha farsamo ee la xiriira qaabka doorashooyinka 2004. Diyaarinta iyo tarjamada fariimaha la xiriira qaabka iyo goobaha doorashada. U fududeyn dadka ay ku adag tahay inay codeeyaan sida gawaari oo loo diyaarsho, ama in loo sahlo goobaha doorashada. Ka qeyb gal gudiga garsoorayaasha doorashada 2004. Qorshahu wuxuu noqon doonaa ugu yaraan hal garsoore oo wiil ah iyo garsoore gabar ah inay ka mid noqdaan gudiga garsoorayaasha doorashada ee 2004 (Election Judges).

Haddii aad dooneyso inaad kaalmeyso Mashruuca (VIP)ee Doorashada 2004 la xiriir walaalaha howshaasi wada: MAS- Center, isla markaana la hadal

Sister Jessi (651)457-7170 ama Liban (612)986-1873.
Maqaalkan waxaa diyaariyey:
Sh. Xasan Jaamici

Agaasimaha Xafiiska MAS-MN Freedom Foundation
HASSAN Ali Mohamud

xasanjaamici@yahoo.com