War saxaafadeed uu maanta (Jan 11, 2004) ku qabtay magaalada Laascaanood Taliyaha Ciimada Booliska Puntland G/S. C/risaaq Maxamuud Yuusuf (Afguduud) ayaa ku sheegay in ay tahay markii ugu danbeysay ee gobolku uu ku jiri lahaa khalkhal, balse markan uu amaanka gobolku yahay mid sugan.

Taliyuhaha Booliiska Puntland wuxuu shaaca ka qaaday in ciidamo xoog lihi ay dhinac walba ka fadhiyaan gobolka oo aan cadow marna soo cabin Karin, waa siduu hadalka u yiriye.

Wuxuu kaloo u digay dadka magaalada dhexdeeda ka abaabulaya in dadku ay qaxaan in ay yihiin kuwo dan gaar ah leh, loona aqoonsan doono danbiilayaal dagaal.

Wuxuu kaloo sheegay Taliyaha Ciidamadu in talaabada ay ciidamada Boolisku iyo Daraawiishtu qaadayaan ay tahay mid dadkooda loogu daneynayo, isagoo hadalkiisa sii watana wuxuu yiri “magaalada Laascaanood Caruurtayda ayaa degan, naftayduna waa joogtaa qaxina mayo, waxaana u dhimanayaa in aan difaaco sharafta ummada reer Puntland, lamana soo dhaafi karo talaabo ka mida meesha ay ciidamadu fadhiyaan, ilaa iyo la waayo ciidamada Puntland gebi ahaantoodba, hobyo ilaa ceel cad ayaa ciidmada puntland ka soo qulqulayaan, xoogna waa ay ku yeelan doonaan gobolka Sool, xukuumaduna indho kale ma laha” ayuu yiri.

Mar wax laga weydiiyey sababta ay magaalada Yagoori ay u gaari waayeen ayuu yiri ”Magaalada Yagoori waxaa ku sugan dad tolkay ah, waxaanuna doonaynaa in aanu xal nabadeed ku wada hadalno, waxaana ku sii socda odayaal iyo waxgarad kuwaasoo u socda sidii ay wax uga qaban lahaayeen xaalada is fahmi waaga ah ee dadka dhex taala, xal waara ayaa laga gaari doonaa maalmaha soo socda, waxaana la sugayaa inta odayadu ay ka quusanayaan dhinaca wada hadalka, nabadda ayaa noo ah, waxaana rabnaa in marka hore ay wax walbaa nabad ku dhamaadaan”

Dhinaca kalena mudaharaad balaaran ayaa saaka wuxuu ka dhacay gudaha magaalada Laascaanood, kuwaasoo mudaharaadkooda ku muujinayey in aan loo baahneyn wax dagaal ah oo ka dhaca magaalada gudaheeda.
Inkasta oo dadku xusayeen maamulka Soomaaliland misana waxay isku raacsanaayeen in dagaalku uu yahay wax dhibaato badan leh aana loo baahneyn Dhiig uu ku daato magaalada Laascaanood gudaheeda

Cawaale Jaamac Salaad
Somalitalk.com
Garoowe
jamnaf87@hotmail.com

Faafin: SomaliTalk Jan 12, 2003