Ergayga dowladda Erataria wakiilka uga ah arrimaha dib u heshiisiinta
Soomaalida Mr Yohaness Berhe ayaa sheegaya in dowladiisu ay daneyneyso in
natiijo ay ka soo baxdo kulamada imminka ka socda magaalada Nairobi oo ay
leeyihiin madaxda kooxaha Soomaalida.
Danjiraha Erataria u qaabilsan Soomaaliya ayaa sheegay in xiriir wanaagsan
ay la leeyihiin shacabka Soomaaliyeed mar aan waraysi la yeeshay dhowaan,
waxaana uu sheegay in dawladiisu ay danaynayso dowlad ka dhalata Soomaaliya.
"Waxaan dooneynaa in mustaqbalka dhow aan aragno Soomaaliya oo midowday,
anaguna waxaa ka taagannahay shirka Soomaalida meel dhex dhexaad ah, mana
dooneyno dano gaar ah aan wadano" ayuu yiri danjiraha Erataria wakiilka uga
ah arrimaha dib u heshiisiinta Soomaalida danjire Yohaness.
Safiirka ayaa sheegay in arrinta Soomaaliya ay tahay xilligan mid muhiim u
ah guud ahaan gobalka oo idil isagoo sheegay xasilooni la'aanta ka jirta
dalka Soomaaliya ay dareemayaan urur gobaleedka IGAD taasina ay tahay waxa ay
Erataria u dooneyso xilligan inay ka qaadato kaalinta ay ku leedahay nabad ka
dhalata Soomaaliya.
Erataria waxay ku soo biireen wadahadalada Soomaalida kulankii ay yeesheen
madaxweynayaasha urur gobaleed IGAD oo sanadkii hore ka dhacay kampala,
waxeyna Erataria ay aad ugu dhexjirtay xilligaas wixii ka dambeeyay arrimaha
Soomaalida.
Safiirka wuxuu kaloo sheegay in ay jiraan faragelin ka imaaneyso dowladaha
darriska qaarkood iyo dowlada kale taasi oo uu sheegay inaysan wanaagsaneyn
Waraysiga safiirka Erataria waxaa uu ku soo beegmay xiligan iyadoo
dawladda Itoobiya aysan ka dhex muuqan shirka soomaalida tan iyo intii lagu
dhawaaqay gudiga fududaynta ee urur goboleedka IGAD.
-dhammaad-