SomaliTalk DALSAN
Home | MAQAALO | Email | TellFriend | Search | Feedback |
w w w . s o m a l i t a l k . c o m
SOMALITALK - MAQAAL
Sidee loo horumarin karaa saxaafadda, iyo hal-abuurka fanka iyo suugaanta reer Puntland?..

WQ: Maxamed Warsame Qulaan
mqulaan@hotmail.com

Nayroobi, Keenya

Waxaan aqriyey falcelin uu qoraaga Cabdulqaadir M. Wacays ka bixiyey qoraal kale oo cinwaankiisu ahaa “ Gabaygii wuu dhintay” oo uu qoray qoraa lagu magacaabo Ibraahim Yuusuf Axmed. Guud ahaan falcelinta qoraagu waxay ka marqaati kacaysay fikraddii uu soo bandhigay qoraagii ka horreeyey ee ahayd in uu dhammaaday casrigii gabayga, taasoo aan aniguba ku waafaqsanahay. Hase yeeshee, waxaan doonayaa in aan wax yar ku hakado qodob kale oo xiiso badan oo uu soo qaaday qoraagu, kaasoo ku saabsanaa arradka xagga saxaafadda iyo hal-abuurka suugaanta ee xilligan ka muuqda Puntland.

Marka hore, waa xaqiiqo jirta oo aan marna la iska indhotiri karin jiriraanka arradkaas isaga ah, waxayse muhimaddu tahay in la ogaado sababaha keenay, saamaynta ay ku yeelatay reer Puntland, iyo sida looga bixi karo. Waxaan Wacays ugu hambalyeynayaa sida uu innoo dareensiiyey dhibaatadaas jirta iyo xitaa siduu uga afgobaadsaday sheegsheegidda dhibaatooyinka uu arradkaas abuuray.

Tusaale ahaan, wakaaladaha wararka ee caalamiga ah waxay wararka Puntland ka qaataan wiilal yar yar oo Muqdisho jooga, kuwaasoo min duq magaalo illaa iyo wasiirro waraysiyo kaga qaada iyagoo sheeganaya magacyada raadiyayaasha, wargeysyada, iyo telefishannada Muqdisho, BBC-na warkeedba daa oo waa lala wada socdaa xaalkeeda iyo sida ay u shaqayso. Madaxda dowladdu markey rabaan in ay warar caalamka u gudbiyaan waxay ku qasban yihiin in ay taleefanno ku raadiyaan wiilashaas Xamar jooga haddii kale warkoodu meel fog gaari maayo. Dulucda warkaygu waxaa weeye in meesha uu dhaqdhaqaaq saxaafadeed ka jiro ay saldhig ka dhiganayaan hay’adaha wararka caalamiga ah. Ma jiro wariye reer Puntland ah oo Puntland jooga oo u shaqeeya wakaaladaha wararka caalamiga ah marka laga reebo weriyaha BBC-da ee saaxiibkeen Yuusuf Garaad!!

Cisho dhoweyd waxaan aqriyey qoraal dheer oo ku saabsan raadiyaha Gaalkacyo oo uu qoray Cabdulqaadir Wacays, kaasoo runtii aan aad ula dhacay, kaddibna waxaan aqriyey maqaal kale oo uu qoray nin kale oo soo jeedinayey talooyin ku saabsan sidii loo horumarin lahaa raadiyaha Gaalkacyo. Labada qoraalba aad bay u fiicnaayeen, waana ay is-dhamaystirayeen.

Waxaa hubaal ah in dhaqdhaqaaqa saxaafadeed iyo kan suugaaneed iyo faneed ee ka jira Muqdisho iyo Hargeysa uu ka sarreeyo kan Puntland. Sababtoo ah, illaa iyo haatan laba wargeys oo toddobaadlayaal ah, oo weliba ah noocii loo yaqaannay arji-qorayaasha ayaa kasoo baxa Puntland, mid maalinle ahna warkiisba daa. Waxaa iyadana xusid mudan in Puntland aysan ka jirin telefishanno, golayaal madadaalo, kooxo faneed, naadiyada iyo xarumaha horumarinta ama ururinta iyo keydinta afka, dhaqanka iyo suugaanta Soomaaliyeed, ururro saxaafadeed iwm, kuwaasoo dhammaantoodba ka jira Muqdisho iyo Hargeysa oo aan intaba anigu indhahayga kusoo arkay. Marka aan sidaas leeyahay wuxuu Ilaahay iga koriyey cunsuriyadda iyo caadifadda xun ee qabyaaladda taasoo aan meel dheer inna gaarsiin doonin.

Malaha waxaa habboon in aan su’aal kale is weydiinno: Maxaa sababay in munaasabadaha iyo ciidaha qarameed ama diineed oo Soomaali oo dhan ay wada leedahay in laga xuso Muqdisho iyo Hargeysa oo keliya iyadoo weliba kooxo faneed iyo suugaanleydu ay halkaas ku soo bandhigaan barnaamijyo ku saabsan munaasabadahaas ama ciidahaas, dabadeedna ay ka khudbeeyaan madaxda meeshaas joogta? Ciiddii soon-fureed ee kal dhoweyd ma jirtaa munaasabad loo qabtay oo Puntland ka dhacday marka laga reebo inuu Madaxweyne Cabdullaahi Yuusuf ka khudbeeyey masaajid ku yaalla Garoowe oo uu ciiddaas ku tukaday, kaddibna uu gurigiisa isaga huleelay? 1da Luulyo iyo 26ka Juun ma laga yaqaan Puntland?. Labadan su’aalood jawaabtooda waxaa laga dhex heli karaa in Puntland uu ka jiro arrad xagga fanka iyo hal-abuurka suugaanta ah, iyo adeegsigooda ama ka faa’iideysigooda.

Inkastoo aan hubo in sidii dadaal loogu geli lahaa wax-ka-qabashada arradkaas saxaafadeed ay nooga xog-ogaalsan yihiin ragga uu Cabdulqaadir Wacays ka mid yahay oo aan ogahay in uu hawl la taaban karo kasoo qabtay horumarinta saxaafadda Puntland, haatanna ay wadaan dadaal weyn oo mudan in lala garab galo, oo weliba iyaga la weydiiyo wixii talo ah oo ay hayaan, misana waxaan anigu qabaa in arradkaas uu qayb ka yahay hantidii maal iyo moodba lahayn ee looga soo tagay diiratadii Muqdisho ku keliyowday, iyadoo intii aqoonta u lahayd hawsha saxaafadeed, suugaaneed ama faneed, iyo dib-u -ammaamudkooda ay qurbaha u soo yaaceen.

Waxay ila tahay in maalgashiga ugu horreeya loo duwo horumarinta saxaafadda, iyo fanka iyo suugaanta reer Puntland. Haddii kalena aan iska iimansanno waxa aynaan ka badin karin helitaankooda, kuwaasoo ah bogagga Internetka oo sida la wada ogyahay aan laga aqrisan dalka gudihiisa.

WQ: Maxamed Warsame Qulaan
mqulaan@hotmail.com

Nayroobi, Keenya

Faafin: SomaliTalk Jan 5, 2003

Afeef: Aragtida qoraalkan waxaa leh qoraag aku saxiixan

 FOGAANTA U DHEXAYSA MAGAALOOYINKA SOOMAALIYA....

.... Copyright & Islaamku wuxuu ka qabo.... Akhri

Kulaabo bogga hore ee  www.somalitalk.com

 

Powered by www.SomaliTalk.com
All About Somalia and More...
>> Usheeg Asxaabtaada
Allah Is Great
kaah
 
MAGACA SOMALILAND WAA BEER: BEERNA HILIBKAA LAGU SUGAA Fahad
"hadii ay saraakiisha socdaalka Jamhuuriyadu ogaan lahaayeen in
Salahudin
"Miyaan niman Waqooyi u dhashay ku heesin: marti waa la sooraa, magan waa la
C/Waaxid
"dadkaasi la qabtay waxaa lagu tuhmay inay ka mid yahiin ama ku jiraan urur
Diridhaba
Kuwii sannadihii hore gacanta lagu dhigayna dhamaantood dawlada Itoobiya
Asad
"Shacbiga Somalilandna aan qasab koonfur loogu sanduleyn Karin,
 Faysal
"7/12/2002 ayuu madaxwaynaha jamhuuriyadda
XagarYare

 


Copyright © somalitalk.com. All rights reserved.

HTML CD