Barnaamijkii Radio Xoriyo
13 January
2006
Guddoomiyaha JWXO oo Jaaliyadaha bogaadin u soo jeediyay.
JWXO oo Bayaan kasoo saartay Arimaha Nabada.
Isku dhac
dhex-maray arday dugisyada Addis Ababa iyo booliska.
Barnaamijkii
Xog-Warran(Dadaalka Odayaasha &
Dibindaabyada Males)
======================
Guddoomiyaha Jabhadda Waddaniga Xoreynta
Ogaadeenya JWXO Admiral Maxamed Cumar Cismaan ayaa bogaadin aad u ballaadhan
u soo jeediyay Jaaliyadaha Ogaadeenya ee dalalka kala duwan ee adduunka ku
yaalla, kuwaasoo uu ku ammaanay sidii kartida iyo waddaninimada lahayd ee ay
uga gilgisheen xasuuqyadii kala duwanaa ee ciidammada gumaysiga Itoobiya u
gaysteen dadwaynaha Soomaalida Ogaadeenya iyo gubistii ay gubeen magaalooyin
ay ka mid ahayd tuulada Fooljeex.
Guddoomiyuhu wuxuu
Jaaliyadaha Ogaadeenya iyo guud ahaanba dadwaynaha Soomaalida Ogaadeenya ku
ammaanay sidii wanaagsanaydee ay u agaasimeen bannaanbaxyadii iyo hawlihii
kale ee lagu diiddanaa xasuuqyadii kala duwanaa, sida midkii ay ciidammada
gumaysigu ka fuliyeen magaalada Qabridaharre 15-kii bishii Nofembber ee kal
hore, waxaanuu ku boorriyay inay sii laban-laabaan dhaqdhaqaaqyada ay dunida
ugu soo bandhigayaan cadaadiska iyo dulmiga naxariis darrada ah ee
dadwaynohooda uu ku hayo gumaysiga Itoobiya.
Guddoomiyuhu wuxuu
sidoo kale ammaan middaas la mid ah u soo jeediyay hay’adaha kala duwan ee
JWXO ee ka hawlgalay ololahan dunida lagu gaadhsiinayay denbiyada
waxshinimada ah ee taliska gumaysatada ah ee Addis Ababa uu hadh iyo habayn
ka galo dadwaynaha aan waxba galabsanin ee Soomaalida Ogaadeenya.
Guddoomiyuhu wuxuu si gaar ah u tilmaamay doorkii fiicnaa ee warbaahinta
JWXO ka qaadatay fidinta xasuuqyadaas iyo gumaadkaas loo gaystay dadwaynaha
Soomaalida Ogaadeenya.
JWXO oo Bayaan kasoo saartay Arimaha Nabada.
Jabahadda Waddaniga
Xoreynta Ogaadeenya (JWXO) ayaa bayaan ay mawqifkeeda ku sii caddaynayso ka
soo saartay dhawaaqyadii ”nabadeed” ee Itoobiya sida daban uga soo baxay iyo
dhaqdhaqaaqa odayaasha Ogaadeenya.
Jabhaddu waxay
bayaankan ku tidhi; ”JWXO iyadoo aaminsan mabda’ nabad ku wada-noolaanshaha
iyo nabad ku xallinta dhibaatada Ogaadeenya, waxay soo dhawaysay dhawaaqii
farriinta ahaa ee Itoobiya ka soo yeedhay, waxayna caddaysay waddada ugu
habboon ee loo mari karo wadaxaajood nabadeed, oo saldhiggeedu yahay in
wadaxaajoodka lagu qabto goob nabadgelyo ah, cid kale oo dhexdhexaad ahina
ay goobjoog ka ahaato”.
JWXO waxay ka
biya-diiday sida ay xukuumadda Itoobiya uga war-wareegayso inay ka dhabayso
dhawaaqeedii nabadeed oo ay si toos ah ula kulanto JWXO, arrintaasoo daliil
u ah in xukuumadda Itoobiya ayna daacad ka ahayn dhawaaqeeda, isla markaana
ay ka shaqaynayso sidii ay dadwaynaha Soomaalida Ogaadeenya u jaha-wareerin
lahayd, iyaduna cimri-dheerar uga dhigan lahayd kulannada ay marba ugu
yeedhayso guurtida Ogaadeenya.
JWXO waxay
bayaankeedan ku sheegtay inay ”diyaar u tahay inay Itoobiya la xaajooto
haddii ay Itoobiya oggolaato inay wadaxaajoodka dhexdhexaadiyaan hay’adihii
ama dalalkii nabadaynta beelaha caalamka caanka ku ahaa ee labada dhinacba u
soo jeediyay inay dhex galaan, kuwaasoo ay Itoobiya hadda ka hor ku gacan
saydhay”.
Bayaankan waxaa
lagu soo gabagabeeyay ”wixii aan habkaas ahayn waxay JWXO u aragtaa
dhoollo-tus siyaasadeed oo waqtiga looga luminaya dadwaynaha Ogaadeenya oo
halgankooda lagu hoosaasinayo, waxayna tilmaantay inayna la kulmaynin
Odayaal dambe oo la soo adeejiyay”.
Isku dhac
dhex-maray arday dugisyada Addis Ababa iyo booliska.
Ardayda dhigata
dugsiga sare ee Ayer Tena ee magaalada Addis Ababa iyo booliska ayaa isku
dhacay, ka dib markii ay ardaydu qabteen bannaanbax nabadgelyo ah oo ay ku
dalbanayeen in la sii daayo ardayda iyo siyaasiyiinta xabsiyada lagu hayo.
Waxaa sidoo kale
iyaguna bannaanbax midkan la mid ah sameeyay ardayda dugsiyada Menen, Tikur
Anbessa, Addis Ketema iyo dugsiyo kale oo ku yaalla Addis Ababa.
Boolis aad u
hubaysan ayaa so galay xarunta dugsiga Ayer Tena, waxayna weerareen qaar ka
mid ah ardaydii halkaas ku bannaanbaxayay. Boolisku waxay si xun u dileen
dhawr waalidiinta ardayda ka mid ah oo isku dayay inay carruurtooda booliska
ka dhiciyaan.
Ka dibna boolisku
wuxuu rasaas ku furay ardaydii dugsiga dhexdiisa ku bannaanbaxaysay, waxay
sidoo kale burburiyeen dariishadaha dugsiyada qaarkood. Dad goobjoog ahaa
ayaa sheegay inay arkeen labo baabuur oo waawayn oo laga buuxiyay arday la
qaqabtay oo ka dhaqaaqay dugsiga ay dhibaatadu ka dhacday. Ardayda la
xidhxidhay waxaa ku jira qaar ayna da’doodu ka waynayn 14 sano.
Xukuumadda EPRDF
ayaa macalimiinta ugu hanjabtay inaan wax mushaaro ah la siin doonin haddii
ayna ardayda kala dagaallamin inay bannaanbaxyo sameeyaan.
Bannaanbaxyada ay
ardaydu samaynayaan waxay ku faafeen gobolka Wollo iyo gobollo kale oo
Itoobiya ka mid ah, waxayna ardaydu shaqaalaha ugu baaqeen inay ku soo
biiraan bannaanbaxyada xukuumadda lagaga soo horjeedo oo ay iyaguna shaqo
joojin sameeyaan.
Radio Xoriyo
13
January 2006.
Axmed Gaal-Eri
Info@radioxoriyo.com
raadioxoriyo@yahoo.com
Radio Xoriyo waxaad ka dhegaysan kartaa Mawjadda 31 MB ee dhererkeedu yahay
9820 KHZ, Maalmaha Talaadada iyo Jimcaha 7: 30PM waqtiga Afrikada Bari
Faafin:
SomaliTalk.com | Jan 14, 2006
|