WARQAD FURAN: MADAXWEYNE MUXUU GEEDI KAA MUDAN-YAHAY.
Fahad Yaasiin Xaaji Daahir
fahadsom@gmail.com
:::FAALLADII
ISNIINTA EE FAHAD:::
Nov
14, 2005
Mudane Madaxweyne.
Asalaamu Calaykum.
Maanta waa maalin Isniin
ah bishuna tahay 14/11/2005. Waxaan ahay nin Soomaaliya
midnimadeeda u danqada. Waxaan ahay nin goob-joog
ka’ahaa maalintii ay Soomaali kuu dooratay inaad
Madaxweyne u noqoto, guushii aad heshay nin ujeeday baan
ahay.
Waxaad tahay dastuur ahaan
qofka ugu sareeya dalka. Waxaad tahay sida ku cad Axdiga
KMG ah astaanta midnimo ee Jamhuuriyada Soomaaliya.
Waxaad tahay Hogaamiye aan
wali afkiisa laga maqal isagoo si dadban ama si cad
usheegay inuu raali kayahay kala-goynta Jamhuuriyada
Soomaaliya.
Intaasba hadaad tahay sow
xaq umalihin inaan kuu dacwoono? Sow gar ma’ahan inaan
kusoo gaarsiino dareenka ay bulshadu qabto? Sow waajib
nooguma lihid taladii wanaagsan inaan kusiino? Sow
Madaxweynuhu ma’ahan hay’adda ugu sareysa ee looga
dacwoodo qofkii khiyaamo qaran ku dhaca? Haday intaasba
dhab tahay, weyba tahayee, waxaan kaa codsanayaa inaad
dacwadaan dhagaysato, kadibna wixii rabi kaa waafajiyo
aad ku go’aan-qaadato.
Taarikhdu markay ahayd
11/11/2005 ayaa waxaa
British
Broadcasting Corporation laga waraystay Awga aad
u magacawday sanadkii hore R/Wasaare inuu kuu noqdo, oo
uu hawlaha fulinta kaa xigsado.
Hadaba wuxuu waraysigaa
kasiidaayey hadalo aad u dhawacaya mustaqbalka dowlada
aad madaxda utahay, sidoo kale wuxuu af-mugiii ugu
hadlay arimo shacabka Soomaalida agtooda muqadas ka’ah
oo uu qaab khiyaano qaran ah ugu dhacay.
Mudane Madaxweyne yaanan
kugu daalin inaan dib kaaga kuugu celiyo ceebtii
maalintaa dhacday, oo aan ku eekaado inaan codsigayga
sheegto.
Waxaan kaa codsanayaa
Madaxweyne laba qodob inaad yeesho.
1. Inaad xilka ka qaado
Cali Maxamed Geedi sababaha aan codsigaas kuugu soo
gudbinayana waa kuwan.
A: Axdi Qarameedka qoran
waxa ku yaal in Midnimada Soomaaliya ay muqadas tahay,
oo Jamhuuriyada Soomaaliya ay hal tahay. Qodobkaas ninka
khilaafay waa hogaamiye aan Axdiga ku dhaqmaynin, sidaas
awgeed wuxuu mudan-yahay xilka-qaadis.
B: Axdigu wuxuu qorayaa in
Madaxweynuhu yahay astaanta midnimo ee Jamhuuriyada
Soomaaliya, Geedina wuxuu ogolaaday in Somaliland ay
go’i karto, walibana uu aqoonsanayo hadii ay go’do.
Taas macnaheedu waxaa
weeye in Geedi uusan Madaxweynaha u aqoonin inuu yahay
astaan qarameed, ee uu u qabo iney tahay midnimada
qaranka hawl xukuumada u taal.
C: Wuxuu meesha ka saaray
loolankii dhuleed ee udhaxeeyey Jamhuuriyada Soomaaliya
iyo dowladaha dariska ah, waana qorshe uusan wali isku
afgaran shacabka Soomaaliyeed, taasoo iyana udhiganta u
adeegid dano shisheeye.
2. Inaad saartid
Maxkamad qaran, laguna xukumo inuu yahay khaa’inul-wadan,
lana tuso shacabka Soomaaliyeed in dawladaadu tahay
dowlad midnimo, qofkii taas ka horyimaadana uu noqonaya
khaa’inul-wadan. Sidaasna waxaan kaaga codsanayaa
sababahan.
A: Wuxuu muujiyey inuusan
dhib u arag Jamhuuriyadii burbursanayd hadii lasii kala
jaro, wuxuu si cad u yiri. Somaliland hadday dunidu
aqoon-sato anaguna waan aqoon-sanaynaa.
Hadalka intaas le’eg
hadduu oran lahaa muwaadin iska caadi ah wuxuu ku
mutaysanayaa hadii lagu xukumo Dastuurkii shacabka
aftida looga qaaday inuu yahay khaa’in heer qaran ah,
kadibna toogasho mudan.
Hadii uu maanta yahay
ninka hadalkaas leh qof sita maamuska R/Wasaare
Soomaaliyeed muxuu isagu xukunkiisa noqon-doonaa?
Madaxweyne adiga ayey kuu taalaa arintaas.
B: In Cali Geedi yiraahdo
waanu aqoonsanayaa Somaliland haday go’do, waa hadal aan
kashido yarayn kii Cumar Carta Qaalib yiri isagoo R/Wasaare
Soomaaliyeed ah, ee ahaa “Ciidamada qalabka sida
hubkooda haku warejiyeen jabhadaha” waana hadalkii
Soomaali kala-diray ee sida ay maanta utaal ka dhigay.
Sidoo kale hadalka Cali
Maxamed Geedi wuxuu noqonayaa hadal kaas ka culus oo uu
R/Wasaare Soomaaliyeed ku dhawaaqo oo ah in Gobol kasta
oo Soomaali ah uu xaq uleyahay inuu go’, waliba isagoo
R/Wasaare ah uu u aqoonsanayo sidaas, xitaa haday rabto
jawhar kaliya haku soo hartee.
Waxaan rajaynayaa in
Madaxweynaha Soomaaliya uu tallaabo cad kaqaado Cali
Maxamed Geedi. Waxaan ogahay in shacabka Soomaaliyeed ay
ku farxi doonaan kolka aad marka hore xilka ka qaado
Geedi, kolka xigana aad kiiskiisa u gudbiso Maxkamad
sare oo heer qaran ah.
Dad badan oo qoraalkan
akhrinayaa ayaa is oranaya miyaad waalantahay marka aad
codsi sidaas ah udirayso Madaxweynaha? Mase
tuhunsan-tahay in warkaada wax ka soo qaad yeelanayo?
Waa midda horee:
Madaxweynaha intaan maqlay isagoo hadlay ma’aanan arag
isagoo hadal dabacsa xitaa ka leh arinta midnimda
Jamhuuriyada Soomaaliyeed, cadaaladuna waxay dhigaysaa
inaan ruux waliba wuxuu ku wanaagsan-yahay aan u qirno.
Sidaas awgeed shaki iigama jiro in Madaxweynuhu uu kun
jeer ka wadanisan-yahay Geedi.
Waa midda labaadee: Waxaan
si xog ah ku hayaa in Madaxweynuhu uu si kulul u
canaantay Geedi isagoo u muujiyey inuu ka xunyahay
hadaladii-saas uu Idaacada kasiidaayey, waxanse warqadan
ugu diyrayaa inaan xusuusiyo Madaxweynaha in khaladkan
oo kale aysan canaan kaliya ku filneyn ee ay mudantahay
xil kaqaadis wajiga hore ah iyo xukun saaris wajiga
labaad ah.
Anoo rajo kaqaba in
codsigayu meel mar noqdo, waxaan sii tilmaamayaa hadii
aan taladaas layeelin, oo waliba tan hore aan
lagu-dhaqaaqin, in si’aan shaki lahayn ay iigu muuqato
in C/Laahi Yuusuf uu mari-doono halkii uu maray Cali
Mahdi. Sidoo kale Cali Geedina mari-doono halkii uu
Camar Carte maray.
Rabbow Soomaali adaa u
maqan.
Daabaco
Boggan | Print
