Somalitalk: Sideed u aragtaan sii socoshada shirka daba dheeraaday ee weli ka socda dalka Kenya?

Xildhiban: Waxaan mar kale ku celineynaa taageerada aan u heyno Soomaaliya oo noqota nabad, shirka soconaya uu noqdo mid guuleysta, hadaba walaal waxaan guud ahaan Soomaalida ku dhiiri galineynaa in ay si wadajir ah ugu howl galaan waajibaadka qaran ee saaran iyo xalinta khilaafaadka aan wax macno ah sameyneyn marka laga reebo daadashada dhiiga walaalaha Soomaaliyeed ee weli soconaya.

Somalitalk: Sideed u aragtaan soo noqnoqoshada dagaalada weli ka soconaya guud ahaan Soomaaliya gaar ahaan dagaalkii ugu dambeeyay ee ka dhacaya magaalada Xeraale ee gobolka Galguduud?

Xildhiban: Marka hore waxaan ka xunnahay dagaalada weli ka soconaya Soomaaliya, gaar ahaan kuwa ka soconaya magaalooyin ay ka mid tahay Xeraale, isla markaana ka tacsiyadeeyneynaa dhiiga walaalaha Soomaaliyeed ee u daadanaya macna la'aanta, hadaba waxaan mar kale ugu baaqeynaa kana codsaneynaa qeybaha uu u dhaxeeyo dagaalkaasi in ay u joojiyaan si shuruud la'aan ah, khilaafka jira ku xalliyaan wadahal, dhiiga wiilasha la daadinayana loo hibeeyo sidii loo suurtagalin lahaa dhisme qaran Soomaaliyeed, ileyn dhiiga daadanayaa u daadan mayo ilaalinta sharafta iyo qarannimada Soomaalyieed.

Somalitalk: Wax badan waxaad soo saarteen baaqyo nabadeed oo aad Soomaalida ugu baaqeysaan, hadaba ma is leedahay in ay wax ka hirgaleen baaqyadiina xambaarsan nabadda, maxaase sabab u ah dagaaladan soo noqnoqnaya?

Xildhiban: Walaal waa runtaa, mar haddii ay yihiin dadka dhibaatoonaya dadkeena Soomaaliyeed waxaan u aragnaa baaqyada aan soo saarno kuwo aan qeyb kaga noqoneyno gudashada waajibka damiiriga ah ee ina saaran gudashadiisa ayna tahay arrin muqadas in aan Soomaalida guud ahaan ugu baaqno nabadgalyo ka dhacda dhulkeenii hooyo, waxaan filayaa in dagaalada dhaca si fudud isaga dhacaan, taas ayaana sabab u ah dagaalada soo noqnoqda ee ka dhaca dalka Soomaaliya, ha ahaadeen kuwo siyaasadeed iyo kuwo beeleedba.

Somalitalk: Sideed u aragtaan dhismiha Golaha Abaabulka Qaranka ee dhawaan lagaga dhawaaqay magaalada Jowhar ee gobolka Shabeelada Dhexe ee dalka Soomaaliya?

Xildhiban: Waxaan horey u sheegnay tirada ururada ka jiraa dalka in ay kor u dhaafayaan in ay kor u dhaafayaan 100, taasina aysan wax badan ku kordhineyn geedi u socodka loogu jiro nabad ka aslaaxda Soomaaliya, hadaba ururadan oo aan laheyn ajendayaal siyaasadeed oo lagu dooran karo, iima muuqaneyso in ay wax macna ah sameynayaan koox kasta oo ka soo caroota shirarka dib-u-heshiisiinta ururo kale oo ay sameystaan, bal dib ugu noqo dhismayaashii golayaasha A. Golihii Badbaadada qaranka, B. Golaha SRRC, C. G8 iyo ka dib dhismaha Golaha Samatabixinta Qaranka iyo Golaha Abaabulka Qaranka gaar ahaan 3da ugu dambeeysa oo dhismeen intii lagu guda jiray shirka hadda Soconaya, hadana qaarkood kala qeybsameen ama kala qeybsan yihiin.

Somalitalk: Hadaba maxaad kula talineysaa guud ahaan ururada ama golayaasha ka jira Soomaaliya?

Xildhiban: Taladeenu waxay tahay in ay isu tanasulaan una tanasulaan dadkooda Soomaaliyeed ee dhibaatoonaya kana haray bulshada caalamka dhinac kasta kuna dadaalaan sidoo mar kale loo soo celin lahaa sharaftii uu lahaa qarankeenii ay sababta u noqdeen burburkiisa iyo dib u dhaca ku yimid dalka iyo dalka Soomaaliyeed.

Somalitalk: Waa maxay sababaha dhabta ah ee hortaagan dhismaha qaran Soomaaliyeed oo soo cesha amarkii iyo kala dambeyntii cirka lagu laalay?

Xildhiban: Nasiibdarro waxaan qabaa in Soomaalidu noqotay kuwo ay qaranimadu kaga qiimo badan tahay qabiilka, taas ayaana ah sababta ugu horreysa ee mushkiladda ku noqotay dhisme qaran Soomaaliyeed oo la helaa, waxaanse jeclaan lahaa in guud ahaan Soomaalidu ogaato in aan qabiil waligii qaran noqoneyn, qof kasta oo Soomaali ah ee doonayana in uu wanaag dadkiisa horseed ugu noqo aan lagu qiimeyn heybta uu ka soo jeedo ee ay tahay in lagu qadariyo waxqabadkiisa iyo kartida uu u leeyahay gudashada waajibaadka qaran ee uu doonayo in uu qabto.