WARARKA:
BOOSAASO |
HARGEYSA |
MUQDISHO |
NAIROBI |
QURBAHA |
XORIYO
May11, 2004
Barnamujka caawa Radio
Xoriyo ka baxaya waxuu ka koobanyahay.
-
Ciidamada gumaysiga Itoobiya oo dad rayad
ah laayay.
-
Madaxwaynihii Kililka Gambella oo Norway
iska dhiibay.
-
Taliyahii ciidanka booliska ee Itoobiya
oo xilkii laga qaadayo.
-
Mudaharaad Itoobiya ka dhan ah oo ka
dhacay London.
-
Safiirkii Itoobiya u fadhiyay dalka
Shiinaha oo baxsaday.
-
Wadaado itoobiyaan ah oo u baxsaday
Eritereya.
-
Barnaamuj gaar ah oo aanu ku eegayno
dacatiga wayaanaha iyo damiir xumida dabaqoodhiga iyo walibaa suugaan
halgameed.
Ciidamada gumaysiga
Itoobiya oo dad rayad ah laayay.
Ciidamada gumeysiga Itoobiya ee kusugan
Wadanka Ogaadeeniya oo dhibaatooyin iyo xad-gudubyo joogta ah ku haya
shacabka reer Ogaadeeniya ayaa dhacdooyinkii iyo gumaadyadii ugu dambeeyey
waxaa war-bixintooda inoo haya wariye Dhiidhi Nuur.
20/3/04, waxay
ciidamada Taliska Adis Ababa ee Itoobiya ku layeen Tuulada Goray dad shacab
ah oo aan waxba galabsan. Dadkan oo isugu jiray xooladhaqoto iyo dad tuulada
ku noolaa ayay ciidamada wayaanuhu si ula kac ah u laayeen.
Mar aanu waydiinay
qaar ka mid ah dadka tuuladaas ku nool waxa sababay dilkan ay ciidamada
Itoobiya gaysteen, ayay noogu jawaabeen, ma jiraan wax sabab ah oo ay
ciidamada Itoobiya dadkaas ku laayeen oo aan ka ahayn in ay ku tuhmeen in ay
taageersan yihiin Jabhada dagaalka kula jirta, waana wax nolasha shacabka
Ogaadeenya ka mid ah oo aad ulama yaabno in ay ciidamada Itoobiya ciday
doonaan iska dilaan, iyada oo aysan jirin wax xataa loogu mar marsoodo oo
dilkooda kalifay.
Mid kamid ah dadka
tuuladaas ku nool oo aan rabin in magaciisa lasheego ayaa yidhi su,aal iyo
wax sabab ah uma baahna dadkan lagumaaday sabatoo ah waxaad ogtihiin in
ciidamada gumaysiga Itoobiya halkan loo keenay in ay dadka laayaan.
Dadka halkaas lagu
laayay waxaa ka mid ah:
-
1- Xabiib
Cabaase aw Shafeec.
-
2- Cabdi
Rashiid Ahmed Noor.
-
3- Xaashi
Mohamed Warmooge.
-
4- Cabdi
Faarah.
-
5- Xassan
Dahir Macallin Gurey.
-
6- Iyo laba
haween ah oon weli magacyadoodii la helin.
Sidaa oo kale
07.05.04 waxay ciidamada Itoobiya Tuulada Anabe oo ka tirsan deegaanka
Galaalshe ku dileen gabadh la yiraahdo Ina Maxamed Yuusuf Fidhin.
Ciidamada cadawga
ah ee Itoobiya waxay 02.05.04 Tuulada Ananu oo dagmada Awaare ka tirsan ka
afduubteen 2 Nin oo dadka deegaankaas ka mid ahaa laguna kala magacabi jiray.
Labadaas nin oo
markii hore loo malaynayay in xabsiga ciidamada Itoobiya ee dagmada
Awaare lagu xidhi doono ayaan la hayn meel ay ku danbeeyeen oo la
geeyay. Dadka dagan tuulada nimankaas laga soo qabtay ayaa ka shakisan in ay
ciidamadu ku dileen meelihii ay marayeen, kadibna ay meedkooda qariyeen.
Waxay ciidamada
gumaysigu jadh-dil naxariis dari ah u geysteen gabdho hadda kohor laga soo
qabtay Tuulada Toon-ceeley oo ka tirsan gobolka Qoraxay,
muddana ku xidhnaa Caado, waxayna dhaawac culus gaadhsiiyan gabadha
la yidhahdo:
Ardo Faysal
Ibraahin, oy lug ka jebiyeen siday u garaacayeen.
Madaxwaynihii
Kililka Gambella oo Norway iska dhiibay.
Wariyaha Wakaaladda Wararka Ogadeniya u jooga
wadanka Norway ayaa soo wariyey inuu madaxwayanihii Kililka Gambella Mr.
Okelo magan galyo siyaasadeed ka codsaday dalka Norway.
Mar ay BBC-du la
yeelatay waraysi Mr. Okelo wuxuu caddeeyay in ciidamada dawlada Itoobiya ay
masuul ka ahaayeen xasuuqii ka dhacay Kililka Gambella.
Xasuuqaas oo ay ka
dambeysay dowlada Itoobiya ayay ku dhinteen dad ka badan 700 oo qof, isla
markaana ay ku baro-kaceen dad ay tiradoodu ka badan tahay tobonaan kun.
Waxaa kaloo jirta in dagaalkii u dhaxeeyay dadka Anyuwaka ee dega gobolka
Gambella iyo ciidamada Wayaanaha uu wali sii socdo oo aan wax xal ah loo
helin.
Xasuuqii Gambella
wuxuu keenay in masuuliyiintii u dhalatay gobolka Gambella ee xukuumada
Itoobiya u shaqayn jiray oo dhan ay baxasadaan, ka dib markii ay u adkaysan
waayeen xasuuqa ummadooda lagu hayo.
Wararka Addis
Ababa naga soo gaaraya ayaa sheegaya in xildhibaankii ugu dambeeyay
mudanayaasha ka soo jeeda gobolka Gambella oo lagu magacaabo Debol Manmual
uu hadda isagana baxsaday, isaga oo aaday magaalada Khartuum ee dalka
Sudaan.
Mudaharaad
Itoobiya ka dhan ah oo ka dhacay London.
Wararka naga soo
gaadhaya magaalada London ayaa sheegaya in mudaaharaad aad u wayn oo lagaga
soo horjeedo dawlada Itoobiya uu ka dhacay magaaladaasi London, gaar ahaan
ka soo horjeeda safaarada ay xukuumadda Itoobiya ku leedahay magaalada
London.
Mudaaharaadkan
ayay soo qabanqaabiyeen ururro kala duwan oo ay ugu horreeyaan ururrada u
dooda xaquuqul insaanka. Dadka mudaaharaadkan ka qayb galay oo mucaarad ku
ah maamulka xilligiisii dhammaaday ee Addis Ababa, waxay qaarkood u daateen
dhismihii safarada, iyagoo dusha ka sudhay calan madow oo cadayn u ah in
Itoobiya ay wakhti madaw ku jirto.
Dadkii
mudharaadkaas ka soo qaybgalay waxay ku dhawaaqayeen hal-ku-dhegyo ay ka mid
yihiin:
-
Meles waa
dilaa!
-
Meles
waa kaligii taliye!
-
Meles ha dhaco!
-
Jooji
jidhdilka!
-
Jooji xasuuqa
aad u gaysanayso dadka aan waxba galabsanin
-
Maxakamad ha la
horkeeno Meles!
-
Ingriisku ha ka
joojiyo macaawimada uu Meles siiyo iyo erayo kale oo lid ku ah maamulka
Zanaawi.
Taliyaha
ciidanka booliska oo xilkiisa laga qaadayo.
Taliyaha ciidanka
booliska ee nidaamka Addis Ababa Major Befekadu Tolera oo ah nin u dhashay
qowmiyada Oromada ayaa laga yaaba in dhowaan jagadaasi laga qaado ka dib
markii ay TPLF-tu ka shakiday inuu gacansaar la leeyahay Jabhadda Xoreynta
Oromiya (OLF).
Sida wararku ay
sheegayaan Major Befekadu waxaa laga yaaba in lagu badalo xubin ka tirsan
Golaha Dhexe TPLF oo la yiraahdo Aransha Gebre Tekle si uu gacanta oogu hayo
ciidanka booliska Ururka TPLF ee taliska Itoobiya gacanta ku haya. Aransha
Gebre Tekle ayaa hada ka hor taliye u ahaa ciidanka booliska ee gobolka
Tigray.
Safiirkii
Itoobiya u fadhiyay Shiinaha oo baxsaday.
Wararka naga soo
gaaraya wadanka Australia ayaa sheegaya in safiirkii Itoobiya u fadhiyay
dalka Shiinaha ambashatoor Addis Alem Belema iyo reerkiisii oo dhan ay iska
dhiibeen dalka Australia oo magangelyo siyaasadeed waydiisteen.
Wararku waxay
intaasi ku darayaan in Mr. Addis Alem Belema uu baxsaday muddo hadda bil
laga joogo, ka dib markii lagu amray inuu dib ugu soo noqdo Itoobiya. Addis
Alem waxuu ka mid ahaa safiirada ka dhashay qowmiyada Tigreega ee uu Melez
Zenaawi ku kalsoonaa.
Baxsashada
safiirradii Itoobiya u fadhiya dalalka aduunka ayaa aad usii kordhaysa,
iyadoo ay ugu wacan tahay khilaafka xad-dhaafka ah ee soo kala dhex galay
jabhadda TPLF oo saameeyay guud ahaan kooxda Tigreega u badan ee gacanta ku
haysa talada dalka Itoobiya.
Wadaado
Itoobiyaan ah oo u baxsaday Eritereya.
Sedex wadaad oo
Itoobiyaan ah oo diinta masiixiga haysta ayaa iska dhiibay dalka Eritreya.
Sida ay wararku sheegayaan sedexdaasi wadaad ayaa Itoobiya ka baxsaday, ka
dib markii ay TPLF-tu soo fara-galisay kaniisadahoodii iyaga oo lagu amray
inay dadka u sheegaan in Jabhada Xoreynta Oromiya ay tahay urur argagixiso.
Wadaadadan ayaa
diiday in ay ka amar-qaataan ururka TPLF iyaga oo ilaalinaya sumcada diimeed
ee ay bulshada ku dhex leeyihiin, taasina waxay keentay inay naftooda la
baxsadaan kadib markay ogaadeen in xabsiga loo taxaabayo, waxayna kala
yihiin sadexdaasi wadaad:
Melake Tsehay Aba
Gebremedhin Messelu.
Melake Hiwet Aba
Ghebregziabiher Tayo.
Diakon Teshome
Ghetahun.
11.05.2004
C/Nuur Sh. Mohamed
raadioxoriyo@yahoo.com
Radio Xoriyo waxaad ka dhegaysan kartaa
Mawjadda 19 MB ee dhererkeedu yahay 15670 KHZ, Maalmaha Talaadada iyo
Jimcaha 7: 30PM waqtiga Afrikada
Faafin: SomaliTalk.com | May 11, 2004
Kulaabo bogga hore ee www.somalitalk.com
|