Inta la og yahay guuldarooyinka siyaasadeed ee
hogaamiyayaasha kooxaha Soomaalida waxay horseed u noqdeen daadinta
dhiiga walaalaha Soomaaliyeed ee sida joogtada ah ugu daadanaya
gudaha dalka Soomaaliya.
Waxaa wax laga xumaado ah dagaalada weli ka sii
soconaya qeybo ka mid ah dalka Soomaaliya, dagaaladaas oo kuwii ugu
dambeeyay lagu soo waramayo in ay dhex marayaan qeybo ka tirsan
ururka SNF magaalada Balad Xaawo ee gobolka Gedo dalka Soomaaliya.
Golaha wadatashiga Soomaaliyeed wuxuu guud ahaan
qeybaha uu dagaalku ku dhexmarayo koofurta Dalka Soomaaliya ugu
baaqayaa in ay joojiyaan gacan ka hadalka Soconaya, qilaafaadka
jirana lagu xalliyo si nabad ah.
Dhinaca kale waxaan xunnahay is hortaaga lagu
hayo qeybtii qaliinka ee Isbitaalka SOS ee magaalada muqdisho, Hadaba
waxaan ka codsaneynaa ehellada iyo qaraabada gabadha qaliinka lagu
sameeyay Faduma Cabdulle Cilmi iyaga oo eegaya baahida shaqo iyo wax
qabad ee Isbitaalku u hayay dadka Soomaaliyeed iyo dhaqaatiirta ka
howl gasha in qilaafkooda lagu xaliyo qaab ka duwan in la hor istaago
adeegyadii guud ee Isbitaalka SOS u hayay dadka dhibaatoonaya, kana
haraan eedeymaha ay u jeedinayaan dhaqtarkii qaliinka ku sameeyay
isla markaana badbaadiyay gabadhooda.
Golaha wadatashiga Soomaaliyeed wuxuu ka xun
yahay tacadiyada isa soo taraya ee maamullada Waqooyi galbeed,
Waqooyi bari iyo Shabelada dhexe ee dalka Soomaaliya ku hayaan
suxufiyiinta Soomaaliyeed, hadaba waxaan u soo jeedineyneynaa
maamulladan in ay ka haraan xariga joogtada ah ee ay ku hayaan
Suxufiyiinta isla markaana aqoonsadaanna doorka Suxufiga Soomaaliyeed.
Kaaliyaha Xoghayaha Arrimaha Dibedda ahna
Wakiilka Golaha Wadatashiga Soomaaliyeed
Faafin: SomaliTalk.com | May 9, 2004
Afeef: Aragtida qoraaladan waxaa leh qoraaga ku
saxiixan